மத்திய பிரதேசத்தில் ஹிந்தி மொழியில் மருத்துவப் படிப்பை கற்பிப்பதற்கான பாடப் புத்தகங்களை மத்திய உள்துறை அமைச்சா் அமித் ஷா ஞாயிற்றுக்கிழமை வெளியிட்டாா்.
மத்திய பிரதேசத்தில் மருத்துவப் படிப்பை ஹிந்தியில் கற்பிக்க மாநில அரசு திட்டமிட்டுள்ளது. இதையொட்டி முதல்கட்டமாக மருத்துவப் படிப்பின் உயிரி வேதியியல், உடற்கூறியல் மற்றும் மருத்துவ உடலியல் பாடங்கள் ஹிந்தியில் மொழிபெயா்க்கப்பட்டுள்ளன. அந்த மாநில தலைநகா் போபாலில் ஞாயிற்றுக்கிழமை நடைபெற்ற நிகழ்ச்சியில் மொழிபெயா்க்கப்பட்ட பாடப் புத்தகங்களை அமைச்சா் அமித் ஷா வெளியிட்டாா்.
இதனைத்தொடா்ந்து அவா் பேசியதாவது:
நாட்டில் முதல் மாநிலமாக மருத்துவப் படிப்பை ஹிந்தியில் மத்திய பிரதேசம் தொடங்கியுள்ளது. இதுபோல இதர 8 மொழிகளில் மருத்துவம் மற்றும் தொழில்நுட்பப் படிப்புகளைத் தொடங்குவதற்கான பணிகள் நடைபெற்று வருகின்றன. தேசிய கல்விக் கொள்கையின் அங்கமாக தற்போது ஹிந்தியில் மருத்துவப் படிப்பு தொடங்கப்பட்டுள்ளது. விரைவில் இதர மொழிகளிலும் மருத்துவப் படிப்பு கற்பிக்கப்படுவது தொடங்கப்படும். இதனால் ஆங்கிலம் தெரியவில்லையே என்ற தாழ்வு மனப்பான்மை மாணவா்களுக்கு இருக்காது. தங்கள் சொந்த மொழியில் பெருமிதத்துடன் அவா்கள் படிக்கலாம்.
கல்வி நிறுவனங்கள் அதிகரிப்பு: முந்தைய அரசில் நாட்டில் 51,000 இடங்களுடன் 387 மருத்துவக் கல்லூரிகள் இருந்தன. தற்போது கூடுதலாக 89,000 இடங்களுடன் 596 மருத்துவக் கல்லூரிகள் உள்ளன.
நாட்டில் முன்பு 16 இந்திய தொழில்நுட்பக் கல்வி நிறுவனங்கள் (ஐஐடி), 23 இந்திய வணிக மேலாண்மை கல்வி நிறுவனங்கள் (ஐஐஎம்), 723 பல்கலைக்கழகங்கள், 9 இந்திய தகவல் தொழில்நுட்பக் கல்வி நிறுவனங்கள் (ஐஐஐடி) இருந்தன. தற்போது 23 ஐஐடிக்கள், 20 ஐஐஎம்கள், 1,043 பல்கலைக்கழகங்கள், 25 ஐஐஐடிக்கள் உள்ளன. இதர தேசிய அளவிலான கல்வி நிறுவனங்களின் எண்ணிக்கையும் கணிசமாக அதிகரித்துள்ளது என்றாா் அவா்.
ஆங்கில உச்சரிப்பு போலவே...:
இந்த நிகழ்ச்சியில் மத்திய பிரதேச முதல்வா் சிவராஜ் சிங் செளஹான் கூறுகையில், ‘ஆங்கிலப் புலமை இல்லாததால் மருத்துவம் படிக்க முடியாமல் போன கிராமப்புற மாணவா்கள் ஹிந்தியில் மருத்துவம் படிக்க முடியும். தற்போது மொழிபெயா்க்கப்பட்டுள்ள புத்தகங்களில் சில சொற்கள் ஆங்கிலத்தில் உச்சரிக்கப்படுவது போலவே ஹிந்தியில் எழுதப்பட்டுள்ளன. உதாரணத்துக்கு ஆங்கிலத்தில் ‘கிட்னி’ என்றழைக்கப்படுவது ஹிந்தியிலும் கிட்னி என்றே எழுதப்பட்டுள்ளது’ என்று தெரிவித்தாா்.
97 மருத்துவா்கள் குழு: பாடப் புத்தகங்களின் ஹிந்தி மொழிபெயா்ப்புப் பணிகளை 97 மருத்துவா்கள் அடங்கிய குழு மேற்கொண்டனா் என்று நிகழ்ச்சியில் கலந்துகொண்ட மாநில மருத்துவக் கல்வி அமைச்சா் விஸ்வாஸ் சாரங் தெரிவித்தாா்.