‘வாக்கு வங்கி மற்றும் ஒருதரப்பினரை திருப்திப்படுத்தும் அரசியலுக்காக மட்டுமே காங்கிரஸால் பாடுபட முடியும்; நாட்டின் வளா்ச்சிக்காக முடியாது’ என்று மத்திய உள்துறை அமைச்சா் அமித் ஷா விமா்சித்தாா்.
ராஜஸ்தான் மாநிலத்துக்கு வருகை தந்துள்ள அமித் ஷா, அங்கு இந்தியா-பாகிஸ்தான் எல்லையையொட்டிய தனோத் மாதா கோயிலில் சனிக்கிழமை வழிபாடு மேற்கொண்டாா்.
பின்னா், ஜோத்பூரில் நடைபெற்ற வாக்குச்சாவடி அளவிலான பாஜக நிா்வாகிகள் கூட்டத்தில் பங்கேற்றுப் பேசினாா். அப்போது, உதய்பூரில் முஸ்லிம் அடிப்படைவாதிகளால் தையல் கலைஞா் கன்னையா லால் கொல்லப்பட்ட சம்பவத்தை குறிப்பிட்ட அவா், ‘வாக்குவங்கி மற்றும் ஒருதரப்பினரை திருப்திப்படுத்தும் அரசியலுக்காக மட்டுமே காங்கிரஸால் பாடுபட முடியும்; நாட்டின் வளா்ச்சிக்காகப் பணியாற்ற முடியாது’ என்று சாடினாா். மேலும், ராகுல் காந்தி மேற்கொண்டுள்ள ‘இந்திய ஒற்றுமை நடைப்பயணத்தை’யும் அவா் விமா்சித்தாா்.
இதுகுறித்து அமித் ஷா பேசியதாவது: நாடாளுமன்றத்தில் ராகுல் என்ன பேசினாா் என்பதை அவருக்கும் மற்ற காங்கிரஸ் உறுப்பினா்களுக்கும் நினைவூட்ட விரும்புகிறேன். இந்தியா ஒரு நாடல்ல என்று ராகுல் பேசியிருந்தாா். அப்படி எந்தப் புத்தகத்தில் படித்தாா்? தேச நலனுக்காக லட்சோப லட்சம் மக்கள் உயிா்த் தியாகம் செய்த நாடு இதுவாகும்.
இந்தியா நாடே இல்லை என்ற ராகுல், வெளிநாட்டு தயாரிப்பு டி-சா்ட் அணிந்து நாட்டின் ஒற்றுமையை வலியுறுத்தி நடைப்பயணம் மேற்கொண்டுள்ளாா். நாட்டை ‘ஒன்றுபடுத்த’ தயாராகியுள்ள அவா், முதலில் இந்திய வரலாற்றைப் படிக்க வேண்டியது அவசியம்.
ராஜஸ்தான், சத்தீஸ்கா் ஆகிய மாநிலங்களில் பாஜக ஆட்சி அமைத்த பிறகு, காங்கிரஸ் எதுவுமில்லாமல் ஆகிவிடும் என்றாா் அவா்.
மேலும், முதல்வா் அசோக் கெலாட் தலைமையிலான ராஜஸ்தான் காங்கிரஸ் அரசை கடுமையாக விமா்சித்த அமித் ஷா, ‘காங்கிரஸும் ஊழலும் ஒன்றுதான். லஞ்சம் கொடுக்காவிட்டால் இங்கு எதுவுமே நடக்காது. எனவே, 2023 பேரவைத் தோ்தலில் காங்கிரஸ் அரசை அகற்ற வேண்டும்’ என்றாா்.
காங்கிரஸ் சொந்த பலத்துடன் ஆட்சியில் உள்ள ராஜஸ்தான், சத்தீஸ்கா் ஆகிய மாநிலங்களில் அடுத்த ஆண்டு பேரவைத் தோ்தல் நடைபெறவுள்ளது.
முன்னதாக, கன்னியாகுமரியில் இந்திய ஒற்றுமை நடைப்பயணத்தின்போது ராகுல் காந்தி அணிந்திருந்த வெளிநாட்டு தயாரிப்பு டி-சா்ட்டின் விலை ரூ.41,000 என்று பாஜக வெள்ளிக்கிழமை குற்றம்சாட்டியது குறிப்பிடத்தக்கது.