அஸ்ஸாம் மாநிலத்தில் உள்ள குவாஹாட்டி உயா்நீதிமன்றத்தில் வழக்கு விசாரணையின்போது ஜீன்ஸ் அணிந்து வந்திருந்த மூத்த வழக்குரைஞரை வெளியேற்றும்படி நீதிபதி போலீஸாருக்கு உத்தரவிட்டாா்.
குவாஹாட்டி உயா்நீதிமன்றத்தில் முன்ஜாமீன் கோரி தாக்கல் செய்யப்பட்ட மனு ஒன்று, நீதிபதி கல்யாண் ராய் சுரானா முன் வெள்ளிக்கிழமை விசாரணைக்கு வந்தது.
அப்போது, மனுதாரா் தரப்பில் ஆஜரான வழக்குரைஞா் பி.கே.மஹாஜன் ஜீன்ஸ் பேன்ட் அணிந்திருந்தாா்.
இதைக் கண்ட நீதிபதி, வழக்குரைஞா் பி.கே.மஹாஜனை நீதிமன்றத்திலிருந்து வெளியேற்றும்படி உத்தரவிட்டு, வழக்கின் விசாரணையை அடுத்த வாரத்துக்கு ஒத்திவைத்தாா்.
தொடா்ந்து, உயா்நீதிமன்ற தலைமை நீதிபதி, தலைமை பதிவாளா் ஆகியோரது கவனத்துக்கு இச்சம்பவத்தை கொண்டு செல்லும்படி நீதிபதி கேட்டுக்கொண்டாா்.
மேலும், இச்சம்பவம் குறித்தான நோட்டீஸ் அஸ்ஸாம், நாகாலாந்து, மிசோரம், அருணாச்சல பிரதேசம் ஆகிய மாநிலங்களின் பாா் கவுன்சிலுக்கும் அனுப்பப்படுவதாக நீதிபதி தெரிவித்தாா்.
குவாஹாட்டி உயா் நீதிமன்றத்தின் அதிகார எல்லையின்கீழ் அஸ்ஸாம், நாகாலாந்து, மிசோரம், அருணாசல பிரதேசம் ஆகிய மாநிலங்கள் உள்ளன.