புழக்கத்தில் இருக்கும் ரூ.2,000 நோட்டுகளை திரும்பப் பெறுவதாக ஆா்பிஐ கடந்த வெள்ளிக்கிழமை அறிவித்தது. அதன்படி, வங்கிகளில் ரூ.2,000 நோட்டுகளை இன்று முதல் மாற்றிக்கொள்ளலாம்.
அதாவது, மக்கள், தங்களிடம் உள்ள ரூ.2,000 நோட்டுகளை செவ்வாய்க்கிழமை முதல் வரும் செப்டம்பா் 30-ஆம் தேதி வரை வங்கிக் கணக்கில் செலுத்தலாம் அல்லது வங்கியில் கொடுத்து சில்லறை மாற்றிக் கொள்ளலாம் என்று ஆர்பிஐ தெரிவித்திருந்தது.
ரூ.2,000 நோட்டுகளை மாற்ற வரும் வாடிக்கையாளா்கள், மக்களுக்கு விரைவாகவும், வசதியாகவும் சேவையை வழங்க தேவையான ஏற்பாடுகளை வங்கிகள் மும்முரமாக செய்து வருகின்றன.
ரூ.2,000 நோட்டுகளை மாற்ற வங்கிகளில் நீண்ட வரிசைகளில் மக்கள் காத்திருப்பதையும், வெளியில் மக்களை காக்க வைக்கக்கூடாது என்பதிலும் கவனம் செலுத்த வேண்டும் என்றும் வங்கிகளுக்கு ஆர்பிஐ அறிவுறுத்தியிருந்தது.
ஏற்கனவே ரூ.2,000 நோட்டுகளை திரும்பப்பெறப்பட்டது தொடர்பாக பல்வேறு விமரிசனங்கள் எழுந்திருக்கும் நிலையில் வங்கிகளில் நீண்ட வரிசைகள் காணப்பட்டால் அது மேலும் பேசுபொருளாகும் என்பதால், அதனைத் தவிர்க்க வேண்டும் என்று கருதப்படுகிறது.
பொதுமக்களும் வங்கிகளுக்கு 2000 ரூபாய் நோட்டுகளை மாற்ற விரைய வேண்டாம் என்றும், போதுமான கால அவகாசம் வழங்கப்பட்டுள்ளது என்றும் ஆர்பிஐ தரப்பில் தெரிவிக்கப்பட்டுள்ளது.
ரூ.500,ரூ.1,000 நோட்டு பணமதிப்பிழப்பு நடவடிக்கையின்போது மக்களின் ரூபாய் நோட்டுகள் தேவையை உடனடியாகப் பூா்த்தி செய்ய ரூ.2,000 நோட்டு அறிமுகப்படுத்தப்பட்டது.
செப்டம்பா் 30-ஆம் தேதி வரை ரூ.2,000 நோட்டுகளை எந்த வங்கிக் கிளையிலும் மாற்றிக் கொள்ளலாம். அத்தகைய நோட்டுகளை வங்கி சேமிப்புக் கணக்கில் செலுத்தலாம், வங்கியில் கொடுத்து சில்லறை மாற்றிக் கொள்ளலாம். வங்கிகள் மட்டுமல்லாமல் ஆா்பிஐ-யின் 19 பிராந்திய அலுவலகங்களிலும் ரூ.2,000 நோட்டுகளுக்கு சில்லறை மாற்றலாம்.
சேமிப்புக் கணக்கில் ரூ.2,000 நோட்டுகளை எவ்வளவு வேண்டுமானாலும் செலுத்தலாம். ஆனால், சில்லறையாக மாற்றும்பட்சத்தில் ஒரு முறைக்கு அதிகபட்சமாக ரூ.20,000 மதிப்பிலான தொகையை மட்டுமே மாற்ற முடியும். மக்களின் தேவையைப் பூா்த்தி செய்ய வேண்டிய ஏற்பாடுகளை மேற்கொள்ள வங்கிகளுக்கு அறிவுறுத்தப்பட்டுள்ளது.
செப்டம்பா் 30-ஆம் தேதிக்குள் பெரும்பாலான ரூ.2,000 நோட்டுகள் திரும்ப பெறப்படும் என எதிா்பாா்க்கிறோம். ரிசா்வ் வங்கியிடம் மட்டுமின்றி வங்கிகளிடமும் மற்ற ரூபாய் நோட்டுகளின் போதிய கையிருப்பு இருப்பது உறுதிபடுத்தப்பட்டுள்ளது. இந்த நடைமுறையில் மக்கள் எதிா்கொள்ளும் சிரமங்களைக் கருத்தில்கொண்டு விதிமுறைகளை மாற்றவும் ஆா்பிஐ தயாராக உள்ளது.
வங்கி கணக்குகளில் ரூ.50,000க்கும் அதிகமாக பணம் செலுத்தும்பொழுது பான் காா்டு எண் உள்ளிட்ட தகவல்கள் சேகரிக்கப்படும் நடைமுறை தொடரும். நாட்டின் பணப்புழக்கம் நாள்தோறும் கண்காணிக்கப்பட்டு வருகிறது.
வாடிக்கையாளா்களுக்கு நீரும் நிழலும் அவசியம்
கடந்த 2016-ஆம் ஆண்டு, பழைய ரூ.500, ரூ.1,000 நோட்டுகள் மதிப்பிழப்பு செய்வதாக அறிவித்தபோது அந்த ரூபாய் நோட்டுகளை மாற்றுவதற்கு வங்கிகள் முன் நீண்ட வரிசையில் காத்திருந்து மக்கள் சிலா் உயிரிழந்தது பெரும் விமா்சனத்துக்கு உள்ளானது.
தற்போது திரும்ப பெறப்படுவதாக அறிவிக்கப்பட்டுள்ள ரூ.2,000 நோட்டுகளை மாற்றும் சேவை செவ்வாய்க்கிழமை முதல் தொடங்கியிருக்கும் நிலையில், முந்தைய சூழல்களைக் கருத்தில் கொண்டு வங்கிகளுக்கு ஆா்பிஐ திங்கள்கிழமை வெளியிட்ட சுற்றறிக்கையில், ‘கோடை காலத்தையொட்டி ரூ.2000 நோட்டுகளை மாற்ற வரும் வாடிக்கையாளா்கள், மக்களின் பாதுகாப்புக்காக நிழல் உள்ள காத்திருப்பு இடங்களைத் தயாா்நிலையில் வைத்திருக்க வேண்டும்.
குடிநீா் வசதியும் செய்து தரப்பட வேண்டும். நோட்டுகளை மாற்றும் சேவையைப் பல்வேறு கவுன்ட்டா்களில் வழங்கி மக்களின் பணியை எளிதாக்க வேண்டும். வங்கிகளில் கொடுத்து மாற்றப்படும், கணக்குகளில் செலுத்தப்படும் ரூ.2,000 நோட்டுகள் குறித்து வங்கிகள் உரிய தினசரி கணக்கை பராமரிக்க வேண்டும்’ என அறிவுறுத்தப்பட்டுள்ளது.
பெட்ரோல் நிலையங்களில் அதிகரிப்பு
நாடு முழுவதும் பெட்ரோல் பங்குகளில் ரூ.2,000 நோட்டுகளின் புழக்கம் 90 சதவீதம் அதிகரித்துள்ளதாக அகில இந்திய பெட்ரோல் விற்பனையாளா்கள் சங்கத்தின் தலைவா் அஜய் பன்சல் தெரிவித்தாா். ரூ.100 -ரூ.200க்கும் பெட்ரோலை நிரப்பிவிட்டு வாடிக்கையாளா்கள் ரூ.2,000 நோட்டுகளைத் தருவதாகவும், இதனால் சில்லறை நோட்டுகளுக்கு தட்டுப்பாடு உள்ளதாகவும் அவா் தெரிவித்தாா்.
