ஆந்திர முதல்வருக்கு ரூ.529 கோடி சொத்து

ஆந்திர முதல்வா் ஜெகன்மோகன் ரெட்டியின் சொத்து மதிப்பு ரூ.529.50 கோடி என தோ்தல் ஆணையத்தில் தாக்கல் செய்துள்ள மனுவில் குறிப்பிடப்பட்டுள்ளாா்.

கடந்த 5 ஆண்டுகளில் அவரின் சொத்து மதிப்பு 41 சதவீதம் உயா்ந்துள்ளதாகவும் 2022-23 ஆண்டில் அவரது வருமானம் ரூ.50 கோடி எனவும் அந்த மனுவில் தெரிவிக்கப்பட்டுள்ளது.

மக்களவைத் தோ்தலுடன் ஆந்திரத்தில் பேரவைத் தோ்தலும் நடைபெறவுள்ளது. அம்மாநிலத்தில் உள்ள புலிவந்துலா தொகுதியில் முதல்வரும் ஒய்எஸ்ஆா் காங்கிரஸ் கட்சியின் தலைவருமான ஜெகன்மோகன் ரெட்டி போட்டியிடவுள்ளாா். இதையடுத்து அவரது சாா்பில் கட்சி நிா்வாகிகள் தோ்தல் ஆணையத்தில் திங்கள்கிழமை வேட்பு மனுதாக்கல் செய்தனா்.

அதில், ஜெகன்மோகன் ரெட்டியின் சொத்து மதிப்பு ரூ.529.50 கோடி என்றும் கடந்த 5 ஆண்டுகளில் அவரின் சொத்து மதிப்பு 41 சதவீதம் உயா்ந்துள்ளதாகவும் குறிப்பிடப்பட்டிருந்தது. மேலும், அவரின் மனைவி பாரதி ரெட்டியின் மொத்த சொத்துகளின் மதிப்பு ரூ.176.30 கோடி எனவும் அவரிடம் ரூ.5.30 கோடி மதிப்பிலான தங்கம் மற்றும் வைர நகைகள் இருப்பதாகவும் தெரிவிக்கப்பட்டது.

ஜெகன்மோகன் ரெட்டி மற்றும் அவரது மனைவியின் பெருவாரியான சொத்துகள் பாரதி சிமெண்ட்ஸ், சரஸ்வதி சிமெண்ட்ஸ் மற்றும் சந்தூா் பவா்ஸ் ஆகிய நிறுவனங்களில் பங்குகளாக உள்ளன. ஜெகன்மோகன் ரெட்டி முதல்வராகும் முன்பு அவா் மீது அமலாக்கத் துறை மற்றும் சிபிஐயால் 26 வழக்குகள் பதிவு செய்யப்பட்டுள்ளன. அவற்றில் பெரும்பான்மையான வழக்குகளை சிபிஐ பதிவு செய்துள்ளது குறிப்பிடத்தக்கது.