பிரதமா் மீது தோ்தல் ஆணையத்தில் காங்கிரஸ் புகாா்-பிரசாரத்தில் முஸ்லிம்கள் குறித்த பேச்சு விவகாரம்

பிரதமா் மீது தோ்தல் ஆணையத்தில் காங்கிரஸ் புகாா்-பிரசாரத்தில் முஸ்லிம்கள் குறித்த பேச்சு விவகாரம்

பிரதமா் நரேந்திர மோடி மீது நடவடிக்கை எடுக்க வலியுறுத்தி காங்கிரஸ் கட்சி சாா்பில் தோ்தல் ஆணையத்தில் திங்கள்கிழமை புகாா் அளிக்கப்பட்டது.

தோ்தல் பிரசார பொதுக்கூட்டத்தில் பேசியபோது முஸ்லிம்கள் குறித்து கருத்து தெரிவித்தது தொடா்பாக பிரதமா் நரேந்திர மோடி மீது நடவடிக்கை எடுக்க வலியுறுத்தி காங்கிரஸ் கட்சி சாா்பில் தோ்தல் ஆணையத்தில் திங்கள்கிழமை புகாா் அளிக்கப்பட்டது.

காங்கிரஸ் மூத்த தலைவா்களைக் கொண்ட குழு, பிரதமா் மோடி மற்றும் பாஜக மீது 16 புகாா்களை தோ்தல் ஆணையத்தில் சமா்ப்பித்தது. ‘இந்தப் புகாா்கள் மீது தோ்தல் ஆணையம் நடவடிக்கை எடுக்காவிடில், அதன் மதிப்பின் மீது களங்கம் ஏற்படும்’ என்றும் அக் கட்சி தெரிவித்துள்ளது.

மக்களவைத் தோ்தலையொட்டி ராஜஸ்தான் மாநிலத்தில் ஞாயிற்றுக்கிழமை பிரசாரத்தில் ஈடுபட்ட பிரதமா் மோடி, பின்னா் அங்கு நடைபெற்ற பொதுக்கூட்டத்தில் பேசியபோது, ‘காங்கிரஸ் மீண்டும் ஆட்சிக்கு வந்தால், மக்களுடைய சொத்துகளை மறுவிநியோகம் செய்துவிடும்’ என்று குறிப்பிட்டாா். ‘நாட்டின் வளங்களில் முஸ்லிம்களுக்கே முன்னுரிமை’ என்று முன்னாள் பிரதமா் மன்மோகன் சிங் குறிப்பிட்டதைச் சுட்டிக்காட்டி இந்தக் கருத்தை பிரதமா் மோடி தெரிவித்தாா். மேலும், ‘இந்திய மக்கள் கடின உழைப்பில் சம்பாதித்த பணம் மற்றும் மதிப்புமிக்க பொருள்களை ஊடுருவல்காரா்களுக்கும், அதிக குழந்தைகளைக் கொண்டுள்ளவா்களுக்கும் பிரித்தளிக்க காங்கிரஸ் திட்டமிட்டுள்ளது’ என்று காங்கிரஸின் தோ்தல் அறிக்கையைக் குறிப்பிட்டு பிரதமா் மோடி விமா்சித்தாா்.

பிரதமரின் இந்தக் கருத்துகள் சா்ச்சையை ஏற்படுத்தியுள்ளது. பிரதமரின் பேச்சு தொடா்பாக அவா் மீது நடவடிக்கை எடுக்க வலியுறுத்தி, காங்கிரஸ் சாா்பில் தோ்தல் ஆணையத்தில் புகாா் மனு அளிக்கப்பட்டது. அதில் கூறியிருப்பதாவது:

ராஜஸ்தான் மாநிலத்தில் தோ்தல் பிரசாரத்தின்போது பிரதமா் நரேந்திர மோடி மதத்தைப் பயன்படுத்தி, காங்கிரஸுக்கு வாக்களிப்பதைத் தவிா்க்குமாறு வாக்காளா்களைக் கேட்டுக்கொண்டாா். மேலும், காங்கிரஸ் கட்சி மற்றும் அதன் தலைவா்களுக்கு எதிராக தவறான மற்றும் அவதூறான கருத்துகளைப் பரப்பியுள்ளாா். இதன்மூலம் வாக்காளா்களை தவறாக வழிநடத்த பிரதமா் முற்பட்டுள்ளாா். இது தோ்தல் நடத்தை விதி மீறலாகும்.

மேலும், தோ்தல் நடத்தை விதிகள் அமலில் உள்ள நிலையில் பல்கலைக்கழக மானியக் குழுவில் (யுஜிசி) காலியாக இருந்த உறுப்பினா் பணியிடங்களுக்கு புதிய நியமனங்களை மத்திய அரசு மேற்கொண்டுள்ளது. 2023 ஆகஸ்ட் மாதம் முதல் இந்தப் பணியிடங்கள் காலியாக இருந்த நிலையில், தற்போது அரசியல் உள்நோக்கத்துடன் நிரப்பப்பட்டுள்ளன. இந்த விவகாரங்கள் மீது தோ்தல் ஆணையம் உரிய நடவடிக்கை எடுக்க வேண்டும் என்று காங்கிரஸ் கட்சி வலியுறுத்தியுள்ளது.

ராகுல் குற்றச்சாட்டு: நாட்டின் வேலைவாய்ப்பின்மையைக் குறைக்கவும், விலைவாசி உயா்வைக் கட்டுப்படுத்தவும் கவனம் செலுத்தப்படும் என்ற காங்கிரஸ் கட்சியின் புதிய விளம்பரத்தை தனது ‘எக்ஸ்’ பக்கத்தில் காங்கிரஸ் எம்.பி. ராகுல் காந்தி திங்கள்கிழமை இணைத்து வெளியிட்ட பதிவில், ‘நாடு சந்தித்து வரும் இதுபோன்ற உண்மையான பிரச்னைகளிலிருந்து மக்களைத் திசைதிருப்பும் பிரதமா் மோடியின் புதிய உத்திதான் இந்த பொய்களும், வெறுப்புப் பேச்சும். வேலைவாய்ப்பின்மையும் பணவீக்கமும் புதிய உச்சத்தை எட்டி வருகின்றன. ஆனால், எல்லாம் நலமாக செல்வதாக பிரமா் மோடி கூறுகிறாா். இத்தகைய பொய் வியாபாரத்தின் முடிவு நெருங்கிவிட்டது’ என்று குறிப்பிட்டாா்.

காங்கிரஸ் பொதுச் செயலா் கே.சி.வேணுகோபால் தில்லியில் அளித்த பேட்டியில், ‘தோ்தல் ஆதாயத்துக்காக, காங்கிரஸ் தோ்தல் அறிக்கையில் இல்லாத ஒரு விஷயத்தை கூறி, நாட்டில் மதரீதியிலான பிளவை ஏற்படுத்த பிரதமா் மோடி முயற்சிக்கிறாா். காங்கிரஸின் தோ்தல் அறிக்கையில் இடம்பெற்றுள்ள விவரங்கள் குறித்து பிரதமா் மோடிக்கு தெளிவாக எடுத்துரைப்பதற்காக, அவரை நேரில் சந்திக்க காங்கிரஸ் தலைவா் மல்லிகாா்ஜுன காா்கே நேரம் கேட்டுள்ளாா்’ என்றாா்.

சீதாராம் யெச்சூரி: மாா்க்சிஸ்ட் கம்யூனிஸ்ட் கட்சியின் பொதுச் செயலா் சீதாராம் யெச்சூரி தனது எக்ஸ் பக்கத்தில் வெளியிட்ட பதிவில், ‘பிரதமரின் பேச்சு தோ்தல் நடத்தை விதிமீறல் என்பதோடு, வெறுப்புப் பேச்சுக்கு எதிரான உச்சநீதிமன்றத் தீா்ப்பையும் மீறும் செயலாகும். இந்த விஷயத்தில் தோ்தல் ஆணையம் மெளனமாக இருப்பது மோசமானது. இந்த விவகாரத்தில் உச்சநீதிமன்றம் தானாக முன்வந்து வழக்கு பதிந்து விசாரணை நடத்த வேண்டும்’ என்று குறிப்பிட்டாா்.

கருத்து தெரிவிக்க தோ்தல் ஆணையம் மறுப்பு: பிரதமரின் பேச்சு குறித்து எழுப்பப்பட்ட கேள்விக்கு, கருத்து தெரிவிக்க மறுப்பதாக தோ்தல் ஆணைய செய்தித் தொடா்பாளா் ஒருவா் திங்கள்கிழமை தெரிவித்தாா்.

மக்களின் உணா்வையே பிரதமா் வெளிப்படுத்தினாா்: பாஜக

பிரதமரின் கருத்து குறித்து எதிா்க்கட்சிகள் விமா்சனங்களை முன்வைத்த நிலையில், ‘மக்களின் உணா்வையே பிரதமா் மோடி எதிரொலித்தாா்’ என்று பாஜக சாா்பில் பதிலளிக்கப்பட்டது.

இதுகுறித்து பாஜக செய்தித் தொடா்பாளா் கெளரவ் பாட்டியா கூறியதாவது: காங்கிரஸ் கட்சியின் முந்தைய பிம்பத்தை பிரதமா் மோடி தெரியப்படுத்தியது, எதிா்க்கட்சிகளுக்கு வலியை ஏற்படுத்தியுள்ளது. மேலும், சட்டவிரோதமாக நாட்டுக்குள் நுழையும் முஸ்லிம்களை நாட்டின் குடிமக்களைவிட முக்கியமானவா்களாக எதிா்க்கட்சிகளின் ‘இந்தியா’ கூட்டணி கருதும் என்ற மக்களின் உணா்வையே பிரதமா் மோடி தனது பேச்சில் வெளிப்படுத்தினாா் என்றாா்.

X
Dinamani
www.dinamani.com