அமேதி, ரே பரேலி தொகுதி காங்கிரஸ் வேட்பாளா்கள் யாா்?: காா்கே பதில்

‘உத்தர பிரதேச மாநிலத்தில் இடம்பெற்றுள்ள அமேதி, ரே பரேலி தொகுதிகளுக்கான வேட்பாளா்கள் யாா் என்பது ஒரு சில நாள்களில் அறிவிக்கப்படும்’ என்று காங்கிரஸ் கட்சியின் தேசியத் தலைவா் மல்லிகாா்ஜுன காா்கே சனிக்கிழமை தெரிவித்தாா்.

நாடு முழுவதும் 543 மக்களவைத் தொகுதிகளுக்கான தோ்தல் கடந்த 19-ஆம் தேதி தொடங்கி 7 கட்டங்களாக நடைபெற்று வருகிறது. இதுவரை 2 கட்ட வாக்குப் பதிவுகள் நிறைவடைந்துள்ளன.

இதில் பிரதான எதிா்க்கட்சியான காங்கிரஸ், பெரும்பாலான தொகுதிகளுக்கு வேட்பாளா்களை அறிவித்து விட்ட நிலையில், உத்தர பிரதேசத்தில் நேரு குடும்பத்தின் ஆஸ்தான தொகுதிகளாக கருதப்படும் அமேதி, ரே பரேலி தொகுதிகளுக்கான வேட்பாளா்களை காங்கிரஸ் இதுவரை அறிவிக்கவில்லை.

அமேதி தொகுதியில் காங்கிரஸ் கட்சி தொடா்ந்த பல ஆண்டுகளாக வெற்றி பெற்று வந்தது. முன்னாள் பிரதமா் ராஜீவ் காந்தி, அவருடைய மனைவி சோனியா காந்தி, கங்கிரஸ் எம்.பி. ராகுல் காந்தி ஆகியோா் போட்டியிட்டு வெற்றிபெற்றனா். இந்தத் தொகுதியில் கடந்த 1984-முதல் ராகுல் போட்டியிட்டு தொடா்ந்து மூன்று முறை எம்.பி.யானாா். கடந்த 2019 மக்களவைத் தோ்தலில் அமேதி, கேரளத்தின் வயநாடு என இரு தொகுதிகளில் போட்டியிட்ட ராகுல், வயநாட்டில் வெற்றிபெற்றாா். ஆனால், குடும்ப தொகுதியாக இருந்தவந்த அமேதியில் பாஜக சாா்பில் போட்டியிட்ட மத்திய அமைச்சா் ஸ்மிருதி இரானியிடம் தோல்வியுற்றாா்.

இந்த நிலையில், இந்த மக்களவைத் தோ்தலில் வயநாடு தொகுதியில் ராகுல் மீண்டும் போட்டியிட்டாா். ஆனால், அமேதி தொகுதியில் அவா் மீண்டும் போட்டியிடுவாரா என்பது குறித்து எந்த அறிவிப்பையும் காங்கிரஸ் வெளியிடவில்லை. இதுகுறித்து கட்சியினரிடையே எதிா்பாா்ப்பு எழுந்த நிலையில், ‘கட்சி எடுக்கும் முடிவுக்கு கட்டுப்படுவேன்’ என்று ராகுல் பதிலளித்தாா்.

இந்த நிலையில், சோனியாவின் மருமகனும் காங்கிரஸ் பொதுச் செயலாளா் பிரியங்கா காந்தியின் கணவருமான ராபா்ட் வதேராவுக்கு வரவேற்பு தெரிவித்து அமேதி தொகுதியில் கடந்த சில தினங்களுக்கு முன்பு ஆங்காங்கே பதாகைகள் வைக்கப்பட்டன. இதனால், ராபா்ட் வதேரா வேட்பாளராக அறிவிக்கப்படுவாரா என்ற எதிா்பாா்ப்பும் கட்சியினரிடையே எழுந்துள்ளது.

அதுபோல, ரே பரேலி தொகுதியில் கடந்த 2004-ஆம் ஆண்டு முதல் மக்களவைத் தோ்தலில் போட்டியிட்டு தொடா்ந்து எம்.பி.யாக தோ்ந்தெடுக்கப்பட்ட சோனியா, இந்த முறை கட்சி சாா்பில் ராஜஸ்தான் மாநிலத்திலிருந்து மாநிலங்களவைக்கு தோ்ந்தெடுக்கப்பட்டாா். இதனால், இந்தத் தொகுதியில் யாா் போட்டியிடப்போகிறாா் என்ற எதிா்பாா்ப்பு எழுந்துள்ளது. இத் தொகுதியில் பிரியங்கா காந்தி நிறுத்தப்படலாம் என கட்சி வட்டாரங்கள் தரப்பில் பரவலாக பேசப்படுகிறது.

இந்த நிலையில், அஸ்ஸாம் மாநிலம் குவாஹாட்டியில் செய்தியாளா்களை சனிக்கிழமை சந்தித்த காங்கிரஸ் தலைவா் மல்லிகாா்ஜுன காா்கேவிடம் இதுகுறித்து கேள்வி எழுப்பப்பட்டது. அதற்கு பதிலளித்த அவா், ‘இரு தொகுதிகளுக்குமான வேட்பாளா்கள் ஒரு சில நாள்களில் அறிவிக்கப்படுவா்’ என்றாா்.

மேலும், ‘ஊழல்வாதிகள் சிறைக்கு அனுப்பப்பட வேண்டும் என்று பாஜக கூறுகிறது. ஆனால், ஊழல் குற்றச்சாட்டுகளை சந்திப்பவா்கள் பாஜகவில் சோ்ந்தவுடன், மாநிலங்களவை அல்லது சட்டபேரவை உறுப்பினா்களாக ஆக்கப்படுகின்றனா். மக்களவைத் தோ்தலில் காங்கிரஸ் தலைவா்கள் தொகுதியை மாற்றுவது குறித்து கேள்வி எழுப்புபவா்கள், முன்னாள் பிரதமா் வாஜ்பாயும், அத்வானியும் எத்தனை முறை தொகுதியை மாற்றினா் என்பதை முதலில் கூறவேண்டும். பொய்யா்களின் தலைவராக பிரதமா் மோடி செயல்பட்டு வருகிறாா். ஆண்டுக்கு 2 கோடி வேலைவாய்ப்புகள் உருவாக்கப்படும், கருப்பு பணம் மீட்கப்பட்டு ஒவ்வொரு குடிமகனுக்கு ரூ. 15 லட்சம் வழங்கப்படும், விவசாயிகளின் வருவாய் இரட்டிப்பாக்கப்படும் என பல பொய்களை பிரதமா் மோடி வெளியிட்டாா். மக்களவைத் தோ்தலில் வெற்றி பெற்று இந்தியா கூட்டணி நிச்சியம் ஆட்சியமைக்கும். ஆட்சி அமைந்ததும் விலைவாசி உயா்வு கட்டுப்படுத்தப்படுவதோடு, அரசு துறைகளில் காலியாக உள்ள 30 லட்சம் பணியிடங்கள் உடனடியாக நிரப்பப்படும்’ என்றும் அவா் கூறினாா்.