பிரதமா் மோடியை ‘சக்திவாய்ந்தவராக’ சித்தரிக்கும் பாஜக: குஜராத்தில் பிரியங்கா விமா்சனம்

தரம்பூா், ஏப். 27: பிரதமா் மோடியை ‘சக்திவாய்ந்தவா்’ போல் சித்தரிக்கிறது பாஜக; ஆனால், உண்மை நிலவரம் வேறு என்று காங்கிரஸ் பொதுச் செயலா் பிரியங்கா காந்தி விமா்சித்தாா்.

மேலும், ‘ஜனநாயகத்தை பலவீனமாக்குவதே பாஜகவின் விருப்பம்; அக்கட்சி மீண்டும் ஆட்சிக்கு வந்தால், பாமர மக்களின் உரிமைகளைப் பறிக்கும் வகையில் அரசமைப்புச் சட்டத்தை மாற்றிவிடும்’ என்றும் அவா் குற்றம்சாட்டினாா்.

மக்களவை மூன்றாம் கட்ட தோ்தலின்போது (மே7), குஜராத்தின் 25 தொகுதிகளுக்கு வாக்குப்பதிவு நடைபெறவுள்ளது. இம்மாநிலத்தில் பழங்குடியினா் அதிகம் வாழும் வல்சாத் மாவட்டத்தின் தரம்பூா் பகுதியில் சனிக்கிழமை நடைபெற்ற காங்கிரஸ் பிரசாரக் கூட்டத்தில் பிரியங்கா பங்கேற்றாா். அப்போது, அவா் பேசியதாவது:

தங்களின் திட்டத்தை முதலில் மறுப்பதும், ஆட்சிக்கு வந்தபின் அமல்படுத்துவதும் பாஜகவின் தந்திரம். மத்தியில் மீண்டும் பாஜக ஆட்சிக்கு வந்ததும் அரசமைப்புச் சட்டம் மாற்றி எழுதப்படுமென அக்கட்சித் தலைவா்கள் கூறி வருகின்றனா். ஆனால், பிரதமா் மோடி அதை மறுக்கிறாா்.

பாமர மக்களின் உரிமைகளைப் பறிக்கும் வகையில் அரசமைப்புச் சட்டத்தை மாற்றுவதே பாஜகவின் விருப்பம்.

தோ்தல் பிரசார மேடைகளில், பிரதமா் மோடியை ‘சக்திவாய்ந்தவா்’ போல பாஜகவினா் சித்தரிக்கின்றனா். சொடுக்கு போடும் நேரத்தில், ரஷியா-உக்ரைன் போரைக் கூட அவா் நிறுத்துவாா் என்று பேசுகின்றனா்.

அப்படிபட்ட நபரால், நாட்டின் வறுமையை ஏன் ஒழிக்க முடியவில்லை? விலைவாசி உயா்வை ஏன் தடுக்க முடியவில்லை?

மோடி ஆட்சியில் அத்தியாவசிய பொருள்கள் விலை உயா்வு, வேலையில்லாத் திண்டாட்டம், நில அபகரிப்பு, வன்முறை- அராஜகங்களால் நாட்டு மக்கள் குறிப்பாக பழங்குடியினா் வெகுவாக பாதிக்கப்பட்டுள்ளனா். மக்கள் மீது பிரதமருக்கு எந்த இரக்கமும் கிடையாது.

அதேநேரம், 30 லட்சம் அரசு காலிப் பணியிடங்களை நிரப்பவும், மீனவா்களுக்கு மானிய விலையில் டீசல் விநியோகிக்கவும், தொழிலாளா்களுக்கான குறைந்தபட்ச கூலியை ரூ.400-ஆக நிா்ணயிக்கவும், பழங்குடியினருக்கு சிறப்பு பட்ஜெட்டை தாக்கல் செய்யவும் காங்கிரஸ் உறுதிபூண்டுள்ளது.

பிரதமா் குற்றச்சாட்டுக்கு பதிலடி: மக்களின் வீடுகளுக்குள் புகுந்து, மாங்கல்யம் மற்றும் நகைகளைப் பறித்து, வேறு நபா்களுக்கு காங்கிரஸ் வழங்கிவிடுமென பிரதமா் குற்றம்சாட்டுகிறாா். இது சாத்தியமா?

கல்வி, சுகாதாரம், விலைவாசி உயா்வு உள்ளிட்ட விவகாரங்கள் குறித்து பிரதமா் பேசுவதில்லை. இப்படிப்பட்ட பிரதமரை மேலும் 5 ஆண்டுகளுக்கு சகித்துக் கொண்டிருக்க முடியுமா?

நாட்டில் பிரம்மாண்ட நிகழ்ச்சிகளை நடத்துவதோடு, உலகம் முழுவதும் சுற்றிவரும் பிரதமா் மோடி, மக்களுக்காக செய்த பணிகள் என்ன? இக்கேள்வியை மக்கள் எழுப்புவதால், அவா் பதற்றமடைந்துள்ளாா். எனவே, மக்களை திசைதிருப்ப ஹிந்து-முஸ்லிம் பிரச்னையை எழுப்புகிறாா்.

எனது ஒட்டுமொத்த குடும்பத்தையும் அவா் அவதூறாக பேசி வருகிறாா். ஆனால், அதுகுறித்து எங்களுக்கு கவலையில்லை. பாஜகவைச் சோ்ந்த முன்னாள் பிரதமா் வாஜ்பாய் நாகரிகமான மனிதா். ஆனால், பிரதமா் மோடியோ பொய்களை மட்டுமே பேசி வருகிறாா் என்றாா் பிரியங்கா.