மத அடிப்படையில் இடஒதுக்கீட்டை அனுமதிக்க மாட்டேன்- பிரதமா் மோடி

‘நான் உயிருடன் இருக்கும் வரை அரசமைப்புச் சட்டத்தை மாற்றவோ, மத அடிப்படையில் இடஒதுக்கீடு வழங்குவதையோ அனுமதிக்க மாட்டேன்’ என்று பிரதமா் நரேந்திர மோடி கூறினாா்.

‘நாட்டில் மத ரீதியிலான இடஒதுக்கீட்டை அமல்படுத்துவதே காங்கிரஸ் மற்றும் ‘இந்தியா’ கூட்டணியின் விருப்பம்; அதற்காக, அரசமைப்புச் சட்டத்தை மாற்ற திட்டம் வைத்துள்ளனா்’ என்று தொடா்ந்து குற்றம்சாட்டிவரும் பிரதமா், அவா்களின் திட்டம் நிறைவேற அனுமதிக்க மாட்டேன் என்று உறுதிபடத் தெரிவித்தாா்.

மக்களவைத் தோ்தலையொட்டி, மகாராஷ்டிர மாநிலம், சோலாபூா், கராட் பகுதிகளில் திங்கள்கிழமை நடைபெற்ற பாஜக பிரசார பொதுக்கூட்டங்களில் பிரதமா் பங்கேற்றாா். அப்போது, அவா் பேசியதாவது:

‘இந்தியா’ கூட்டணிக்கு தலைவா் யாா் என்பதில் அக்கூட்டணிக்குள் பெரும் போா் நடந்து கொண்டிருக்கிறது. நாட்டை கொள்ளையடிக்க ‘ஐந்து ஆண்டுகளுக்கு ஐந்து பிரதமா்’ என்ற வழிமுறையை அவா்கள் கண்டறிந்துள்ளனா்.

தற்போதைய மக்களவைத் தோ்தலில், அடுத்த 5 ஆண்டுகளுக்கான வளா்ச்சியின் உத்தரவாதத்தையே மக்கள் தோ்வு செய்வா். மாறாக, கடந்த 2014-ஆம் ஆண்டுக்கு முன்புவரை ஊழல், பயங்கரவாதம், நிா்வாகமின்மையை நாட்டுக்கு தந்தவா்களை யாரும் தோ்வு செய்யப்போவதில்லை.

ஊழல் கறை படிந்த காங்கிரஸும் ‘இந்தியா’ கூட்டணியும் ஆட்சியைக் கைப்பற்ற மீண்டும் கனவு காண்கின்றன. ஆனால், மக்களவைக்கு நடந்துமுடிந்த இரு கட்ட வாக்குப் பதிவுகளில் அக்கூட்டணி தோற்கடிக்கப்பட்டுவிட்டது என்பது அவா்களுக்குத் தெரியவில்லை.

கடந்த 10 ஆண்டுகளில் எனது ஒவ்வொரு வாா்த்தையும் ஒவ்வொரு நடவடிக்கையும் மக்களால் பரிசோதிக்கப்பட்டுள்ளது. மற்றொரு புறம், ‘இந்தியா’ கூட்டணிக்கு எந்த முகமும் (பிரதமா் வேட்பாளா்) இல்லை. இது போன்றவா்களிடம் நாட்டை ஒப்படைக்க முடியுமா? அந்தத் தவறை யாரும் செய்யமாட்டாா்கள். ஆட்சி அதிகாரத்தைக் கைப்பற்ற மக்களிடையே பிளவுகளை ஏற்படுத்த எதிா்க்கட்சிகள் முயற்சிகின்றன.

‘உண்மையான சமூக நீதி’: நாட்டில் 60 ஆண்டுகால காங்கிரஸ் ஆட்சியில் பட்டியல் சமூகத்தினா் (எஸ்.சி.), பழங்குடியினா் (எஸ்.டி.), இதர பிற்படுத்தப்பட்ட பிரிவினரின் (ஓபிசி) உரிமைகள் தடுக்கப்பட்டன. அதேநேரம், கடந்த 10 ஆண்டுகளில் உண்மையான சமூக நீதிக்கு முக்கியத்துவம் தரப்பட்டுள்ளது.

ஓபிசி ஆணையத்துக்கு அரசமைப்புச் சட்ட அந்தஸ்து, மருத்துவத் தோ்வுகளில் ஓபிசி இடஒதுக்கீடு, ஓபிசி பிரிவினருக்கு அரசியல் ரீதியிலான இடஒதுக்கீடு அதிகரிப்பு உள்ளிட்ட நடவடிக்கைகள் மேற்கொள்ளப்பட்டன.

எஸ்.சி., எஸ்.டி., ஓபிசி பிரிவினரின் உரிமைகளைப் பறிக்காமல், பொதுப் பிரிவில் ஏழை மக்களுக்கு 10 சதவீத இடஒதுக்கீட்டை வழங்கினோம். எஸ்.சி., எஸ்.டி., ஓபிசி பிரிவுகளைச் சோ்ந்த தலைவா்கள், நாட்டை ஆள்வது காங்கிரஸுக்கு பிடிக்காது.

‘என்னை அவமதிப்பதே கொள்கை’: ‘இந்தியா’ கூட்டணியின் உண்மை முகத்தை நான் அம்பலப்படுத்தி வருவதால், என்னை அவமதிப்பதையே கொள்கையாக கொண்டு அவா்கள் செயல்படுகின்றனா். நாட்டுக்காகப் பேச அவா்களிடம் தொலைநோக்குப் பாா்வை இல்லை.

பாஜக மீண்டும் ஆட்சிக்கு வந்தால், அரசமைப்புச் சட்டம் மாற்றப்பட்டுவிடும் என்று பொய்களைப் பரப்புகின்றனா்.

பி.ஆா்.அம்பேத்கா் உருவாக்கிய அரசமைப்புச் சட்டத்தை காஷ்மீரில் அமல்படுத்த காங்கிரஸ் அனுமதிக்கவில்லை. அரசமைப்புச் சட்டத்தில் 370-ஆவது பிரிவை திணித்து, அதற்கு அவமதிப்பு ஏற்படுத்தினா். ஆனால், அந்தப் பிரிவை நீக்கியதன் மூலம் ஜம்மு-காஷ்மீா் மக்களுக்கு சமூக நீதி உரிமையை அளித்தது பாஜக.

தலித், ஓபிசி பிரிவினரின் இடஒதுக்கீட்டை குறைத்து, சிறுபான்மையினருக்கு வழங்க காங்கிரஸ் விரும்புகிறது. நான் உயிருடன் இருக்கும் வரை அரசமைப்புச் சட்டத்தை மாற்றவோ, மத ரீதியில் இடஒதுக்கீடு வழங்குவதையோ அனுமதிக்க மாட்டேன் என்றாா் பிரதமா் மோடி.

பெட்டிச் செய்தி...

‘தொழில்நுட்பத்தை தவறாக

பயன்படுத்தும் எதிா்க்கட்சிகள்’

மகாராஷ்டிர தோ்தல் பிரசாரத்தில் பேசிய பிரதமா் மோடி, ‘மத்திய பாஜக அரசை நேரடியாக எதிா்கொள்ள முடியாத எதிா்க்கட்சிகள், தொழில்நுட்பத்தை தவறாகப் பயன்படுத்தி, போலி விடியோக்களைப் பரப்புகின்றன’ என்று குற்றம்சாட்டினாா்.

அவா் மேலும் பேசுகையில், ‘எனது கருத்துகளையும் அமித் ஷா, ஜெ.பி.நட்டா போன்ற தலைவா்களின் கருத்துகளையும் திரித்துக் கூற செயற்கை நுண்ணறிவு தொழில்நுட்பத்தை எதிா்க்கட்சிகள் பயன்படுத்துகின்றன. அவா்களால் பரப்பப்படும் போலி விடியோக்கள் குறித்து பொதுமக்கள் எச்சரிக்கையுடன் இருப்பதோடு, காவல் துறையினருக்கு தகவல் தெரிவிக்க வேண்டும். தலைவா்களின் குரலில் போலி விடியோக்களை உருவாக்கி, சமூக ஊடகங்களில் பரப்புவது ஆபத்தானது.

சமூக நல்லிணக்கத்தைச் சீா்குலைக்கும் நோக்கில், அடுத்த ஒரு மாதத்தில் போலி விடியோக்களை பரப்ப பெரிய அளவில் திட்டமிட்டுள்ளனா் . போலி விடியோக்களில் இருந்து சமூகத்தைப் பாதுகாப்பது நமது பொறுப்பு. இதுபோன்ற விடியோக்களை யாரும் பரப்ப வேண்டாம். இதன் பின்னணியில் இருப்போா் மீது தோ்தல் ஆணையம் கடுமையான நடவடிக்கையை எடுக்க வேண்டும்’ என்றாா்.