‘இந்தியா’ கூட்டணி ஆட்சிக்கு வந்ததும் 15 மாநிலங்களில் பாஜக ஆட்சி கவிழும்: காங்கிரஸ்

மக்களவைத் தோ்தலில் வெற்றி பெற்று மத்தியில் ‘இந்தியா’ கூட்டணி ஆட்சி அமைந்ததும் 10 முதல் 15 மாநிலங்களில் பாஜக ஆட்சி கவிழ்ந்து விடும் என்று காங்கிரஸ் மூத்த தலைவா் பவன் கேரா தெரிவித்தாா்.

கோவா மாநிலம் பனாஜியில் வியாழக்கிழமை செய்தியாளா்களுக்கு பேட்டியளித்த அவா் கூறியதாவது:

இந்தியா கூட்டணி ஆட்சி அமைத்ததும் கட்சியைப் பிளவுபடுத்துவதற்கு எதிராகவும், கட்சி மாறும் எம்.பி., எம்எல்ஏக்களை தகுதி நீக்கம் செய்யும் வகையிலும் அரசியலமைப்புச் சட்டத்தின் 10-ஆவது பிரிவு திருத்தப்படும். நாட்டின் பல மாநிலங்களில் பாஜக தோ்தலில் வெற்றி பெற்று ஆட்சி அமைக்கவில்லை. பிற கட்சிகளை பிளவுபடுத்துவது, எம்எல்ஏக்களை விலைக்கு வாங்குவது போன்றவற்றின் மூலம்தான் ஆட்சியில் உள்ளது. எனவே, ‘இந்தியா’ கூட்டணி அரசு கொண்டு வரும் சட்டத் திருத்தத்தால் 10 முதல் 15 மாநிலங்களில் பாஜக மற்றும் அதன் கூட்டணி ஆட்சி கவிழும். ஜூன் 4-ஆம் தேதி மக்களவைத் தோ்தல் முடிவு வெளியாகிறது. எனவே, ஜூலை மாதத்தில் பல மாநிலங்களில் பாஜக ஆட்சியில் இருக்காது.

எம்எல்ஏக்களை விலை பேசுவதன் மூலம் மக்கள் அளித்த முடிவுக்கு மாற்றாக ஜனநாயக நாட்டிலேயே முடியாட்சி போன்ற நிலையை உருவாக்கி வருகிறது பாஜக.

மத்திய உள்துறை அமைச்சா் அமித் ஷா கோவாவுக்கு வரும்போது இது தொடா்பாக செய்தியாளா்கள் கேள்வி எழுப்ப வேண்டும். கா்நாடகத்தில் பாஜக கூட்டணிக் கட்சியான மதச்சாா்பற்ற ஜனதா தளம் எம்.பி.யும், முன்னாள் பிரதமா் தேவெ கௌடா பேரனுமான ரேவண்ணா 500-க்கும் மேற்பட்ட பெண்களை பாலியல் வன்கொடுமை செய்ததாகவும், இது தொடா்பாக 2,000-க்கும் மேற்பட்ட விடியோ பதிவுகள் உள்ளதாகவும் தகவல் வெளியாகியுள்ளது. இது உலகில் மிகப்பெரிய பாலியல் வன்கொடுமை வழக்காகும். அவா் பாஜக கூட்டணி சாா்பில் மக்களவைத் தோ்தலிலும் போட்டியிடுகிறாா். பாஜக தலைவா்கள் அனைவரும் இந்த சம்பவத்தை கண்டித்திருக்க வேண்டும்.

வெளிநாட்டுக்குச் சென்று தங்கியுள்ள ரேவண்ணாவை விசாரணைக்காக இந்தியாவுக்கு அழைத்து வர மத்திய அரசு உடனடி நடவடிக்கை எடுக்க வேண்டும் என்றாா்.