சத்தீஸ்கா் காங். செய்தித் தொடா்பாளா் கட்சியிலிருந்து விலகல்

சத்தீஸ்கா் மாநில காங்கிரஸ் செய்தித் தொடா்பாளரும் ஊடகப் பொறுப்பாளருமான ராதிகா கேரா ஞாயிற்றுக்கிழமை தனது பதவியை ராஜிநாமா செய்துவிட்டு, கட்சியிலிருந்தும் விலகினாா்.

அயோத்தி, ராமா் கோயிலுக்கு சென்று வந்ததையொட்டி மாநில காங்கிரஸ் அலுவலகத்தில் நடைபெற்ற சம்பவத்தில் தன் மீது வைக்கப்பட்ட விமா்சனங்களால் தனக்கு நீதி மறுக்கப்பட்டுள்ளதாக அவா் குற்றஞ்சாட்டியுள்ளாா்.

கட்சியிலிருந்து விலகுவது குறித்து தலைவா் மல்லிகாா்ஜுன காா்கேவுக்கு கேரா எழுதியுள்ள கடிதத்தில், ‘அனைத்து ஹிந்துக்களுக்கும் ராம ஜென்மபூமி மிகுந்த முக்கியத்துவம் வாய்ந்ததாகும். ராம் லல்லாவை நேரில் தரிசிப்பதை வாழ்வின் வெற்றியாக ஹிந்துக்கள் அனைவரும் கருதுவா். ஆனால், காங்கிரஸ் கட்சியிலுள்ள சிலா் அதை எதிா்க்கின்றனா்.

காங்கிரஸுக்காக எனது 22 ஆண்டு வாழ்க்கையை அா்ப்பணித்துள்ளேன். ஆனால், அயோத்தி ராம் லல்லாவை சென்று தரிசித்து வந்ததன் காரணமாக கட்சிக்குள்ளேயே இத்தகைய கடும் விமா்சனங்களை நான் சந்திக்க வேண்டியிருக்கிறது. எனக்கு நீதி மறுக்கப்பட்டுள்ளது.

மற்றவா்களின் நீதிக்காக நான் எப்போதும் போராடியுள்ளேன். ஆனால், எனக்கான நீதியை வெல்வதில் சொந்தக் கட்சியிலேயே நான் தோற்றுவிட்டேன். இதுகுறித்து கட்சியின் மூத்த தலைவா்களிடம் பலமுறை தெரிவித்தும் எனக்கு நீதி கிடைக்காதது வேதனை அளிக்கிறது’ எனத் தெரிவித்துள்ளாா்.

சத்தீஸ்கா் காங்கிரஸ் ஊடகப் பிரிவுத் தலைவா் சுஷில் ஆனந்த் சுக்லா மற்றும் கேராவுக்கும் இடையே மாநிலத் தலைமை அலுவலகத்தில் கடந்த 30-ஆம் தேதி வாக்குவாதம் நடந்ததாக கூறப்படுகிறது.