குஜராத்தை சேர்ந்த சமூக செயல்பாட்டாளரான அமித் ஜெத்வா, குஜராத் உயர்நீதிமன்றத்துக்கு எதிரே கடந்த 2010-ஆம் ஆண்டு ஜூலை 20ஆம் தேதி சுட்டுக் கொல்லப்பட்டார். அவரை துப்பாக்கியால் சுட்டுக்கொன்ற இரு நபர்களும், சம்பவ இடத்திலிருந்து தப்பிவிட்டனர்.
சட்டவிரோத சுரங்கப் பணிகளுக்கு எதிரான போராட்டத்தை முன்னெடுத்து வந்த அமித் ஜெத்வா, கொலை செய்யப்படுவதற்கு சில வாரங்களுக்கு முன், கிர் வனவிலங்கு சரணாலயம் அமைந்துள்ள வனப்பகுதி அருகே, சட்டவிரோதமாக சுரங்கப் பணிகள் நடைபெறுவதாகவும், அதில் பாஜக முன்னாள் எம்.பி. டினு சோலங்கிக்கு தொடர்பு உள்ளதாக குற்றஞ்சாட்டியிருந்தார். அதற்கான ஆவணங்களையும் சமர்ப்பித்திருந்தார்.
இந்த நிலையில், அவரது கொலையில் பாஜக முன்னாள் எம்.பி. டினு சோலங்கிக்கு தொடர்பு உள்ளதாக சந்தேகிக்கப்பட்டது.
இதையடுத்து, இந்த வழக்கை விசாரித்த சிபிஐ, இந்த கொலையில், முக்கிய குற்றவாளியாக டினு சோலங்கியின் பெயரை குற்றப்பத்திரிகையில் கடந்த 2013இல் இணைத்தது. அத்துடன், டினு சோலங்கியின் உறவினர்களான சிவ சோலங்கி, சஞ்சய் சௌஹான், ஷைலேஷ் பாண்டியா, பிரதீஷ் தேசாய், உதாஜி தாகூர் மற்றும் பகதூர் சிங் வேந்தர் ஆகிய 6 பேருக்கும் இந்த கொலையில் தொடர்பிருப்பதாகவும் குற்றஞ்சாட்டப்பட்டது.
கொலை வழக்கில் குற்றஞ்சாட்டப்பட்ட டினு சோலங்கி மற்றும் 6 பேரும் சிபிஐ நீதிமன்றத்தால் கடந்த 2019இல் குற்றவாளிகள் என தீர்ப்பளிக்கப்பட்டிருந்த நிலையில், அவர்கள் 7 பேருக்கும் ஆயுள் தண்டனை விதித்திருந்தது கீழமை நீதிமன்றம்.
இந்த நிலையில், இந்த கொலை வழக்கின் மேல்முறையீட்டு மனு, இன்று(மே. 6) குஜராத் உயர்நீதிமன்றத்தில் விசாரணைக்கு வந்தது. வழக்கை விசாரித்த நீதிபதிகள் ஏ.எஸ். சுபேஹியா, விமல் கே. வியாஸ் அடங்கிய அமர்வு, சிபிஐ நீதிமன்றம் பிறப்பித்த உத்தரவை தள்ளுபடி செய்ததோடு, அவர்கள் 7 பேரையும் விடுதலை செய்து உத்தரவிட்டுள்ளது.
இந்த கொலை வழக்கில் முறையான விசாரணை நடத்தப்படவில்லை என்றும், உண்மை குழி தோண்டிப் புதைக்கப்பட்டுள்ளதாகவும், சிபிஐ நீதிமன்றம் சாட்சியங்களிடம் முறையான விசாரணை நடத்தவில்லை உயர்நீதிமன்றம் கண்டனம் தெரிவித்துள்ளது.