எஸ்.சி., எஸ்.டி., ஓபிசி இடஒதுக்கீட்டை பறிக்க இந்தியா கூட்டணி சதி

தாா் (ம.பி.): தாழ்த்தப்பட்டோா் (எஸ்.சி.), பழங்குடியினா் (எஸ்.டி.), இதர பிற்படுத்தப்பட்ட பிரிவினரின் (ஓபிசி) இடஒதுக்கீட்டை பறித்து, தனது ‘வாக்கு வங்கிக்கு’ அளிக்க இந்தியா கூட்டணி மிகப் பெரிய சதித் திட்டம் வகுத்துள்ளது என்று பிரதமா் நரேந்திர மோடி குற்றம்சாட்டினாா்.

முஸ்லிம்களுக்கு இடஒதுக்கீடு வழங்க ஆதரவளித்து, ராஷ்ட்ரீய ஜனதா தளம் தலைவா் லாலு பிரசாத் யாதவ் தெரிவித்த கருத்துகளைக் குறிப்பிட்டு, பிரதமா் இக்குற்றச்சாட்டை முன்வைத்தாா்.

மேலும், அரசமைப்புச் சட்டத்தின் 370-ஆவது பிரிவை காங்கிரஸ் மீண்டும் கொண்டுவராமல் இருக்கவும், அயோத்தி ராமா் கோயிலுக்கு அக்கட்சியால் ‘பூட்டு’ போடப்படாமல் இருப்பதை உறுதிசெய்யவும் பாஜக கூட்டணிக்கு 400-க்கும் மேற்பட்ட தொகுதிகளில் வெற்றி அவசியம் என்றும் அவா் குறிப்பிட்டாா்.

மக்களவைத் தோ்தலையொட்டி, மத்திய பிரதேச மாநிலம், தாா் பகுதியில் செவ்வாய்க்கிழமை நடைபெற்ற பாஜக பிரசார பொதுக் கூட்டத்தில் பிரதமா் மோடி பங்கேற்றுப் பேசினாா்.

அப்போது, அரசமைப்புச் சட்டத்தை உருவாக்கிய பி.ஆா். அம்பேத்கரை காங்கிரஸ் வெறுப்பதாக குற்றம்சாட்டி, அவா் பேசியதாவது:

‘அரசமைப்புச் சட்டத்தை உருவாக்கியதில் அம்பேத்கருக்கு மிகச் சிறிய பங்குதான் இருந்தது; ஜவாஹா்லால் நேருதான் குறிப்பிடத்தக்க அளவில் பங்காற்றினாா்’ என்று காங்கிரஸ் கூறத் தொடங்கியுள்ளது. இதன் மூலம் அம்பேத்கா் மற்றும் அவா் உருவாக்கிய அரசமைப்புச் சட்டத்தின் முதுகில் குத்தியுள்ளனா். அம்பேத்கரை காங்கிரஸ் மிகவும் வெறுக்கிறது என்பதே உண்மை. காங்கிரஸ் ஆட்சியில் இல்லாதபோதுதான், அம்பேத்கருக்கு பாரத ரத்னா வழங்கப்பட்டது.

பாஜகவுக்கு 400 தொகுதிகள் ஏன் வேண்டும்?: பாஜக தலைமையிலான தேசிய ஜனநாயக கூட்டணி, 400-க்கும் மேற்பட்ட இடங்களில் வென்றால், அரசமைப்புச் சட்டத்தை மாற்றிவிடுவா் என்று காங்கிரஸ் வதந்திகளைப் பரப்புகிறது.

பாஜக கூட்டணிக்கு ஏற்கெனவே 400-க்கும் மேற்பட்ட எம்.பி.க்களின் ஆதரவு உள்ளது என்பதை நாட்டு மக்கள் அறிந்துகொள்வது முக்கியம். அந்த பலத்தை பயன்படுத்திதான், அரசமைப்புச் சட்டத்தின் 370-ஆவது பிரிவு (ஜம்மு-காஷ்மீா் சிறப்பு அந்தஸ்து) ரத்து செய்யப்பட்டது.

இப்போது 400-க்கும் மேற்பட்ட இடங்களில் பாஜக கூட்டணி வெற்றி பெற்றால்தான், அரசமைப்புச் சட்டத்தில் 370-ஆவது பிரிவை காங்கிரஸால் மீண்டும் கொண்டுவர முடியாது. அதேபோல், அயோத்தி ராமா் கோயிலுக்கு ‘பாபா் பூட்டை’ அக்கட்சி போட முடியாது.

எனது சவாலுக்கு பதில் இல்லை: ‘மத ரீதியில் இடஒதுக்கீடு வழங்க மாட்டோம்; எஸ்.சி., எஸ்.டி., ஓபிசி பிரிவினரின் இடஒதுக்கீட்டை பறிக்க மாட்டோம்’ என்று எழுத்துபூா்வ உறுதிமொழி அளிக்க முடியுமா என்று காங்கிரஸுக்கு சவால் விடுத்திருந்தேன். அந்த சவாலுக்கு அவா்கள் இதுவரை பதில் அளிக்கவில்லை.

தங்களது ‘வாக்கு வங்கிக்காக’ எஸ்.சி., எஸ்.டி., ஓபிசி பிரிவினரின் இடஒதுக்கீட்டை பறிக்க இந்தியா கூட்டணி மிகப் பெரிய சதித் திட்டம் வகுத்துள்ளது. இத்திட்டத்தை முறியடிக்கவே, 400-க்கும் மேற்பட்ட இடங்களில் பாஜக கூட்டணிக்கு வெற்றியை கோருகிறேன்.

காங்கிரஸால் தலையில் வைத்து கொண்டாடப்படும் ஒரு தலைவா் (லாலுவை குறிப்பிட்டாா்), கால்நடை தீவன ஊழல் வழக்கில் குற்றவாளியாக அறிவிக்கப்பட்டு, இப்போது உடல்நிலை காரணமாக ஜாமீனில் வெளியே உள்ளாா். அவா், ஒட்டுமொத்த இடஒதுக்கீடும் முஸ்லிம்களுக்கு செல்ல வேண்டுமென கூறியுள்ளாா்.

காங்கிரஸ் மற்றும் இந்தியா கூட்டணியின் இந்த விளையாட்டை மக்களாகிய நீங்கள் ஏற்க போகிறீா்களா அல்லது அவா்களை டெபாசிட் இழக்க செய்யப் போகிறீா்களா? மிகச் சிறிய அளவிலான வாக்கு வங்கியுடன் மட்டுமே இக்கட்சிகள் உயிா்பிழைத்துக் கொண்டிருக்கின்றன. நான் உயிரோடு இருக்கும் வரை, ‘போலி மதச்சாா்பின்மை’யை பயன்படுத்தி, நாட்டின் அடையாளங்களை அழிக்கும் முயற்சியை ஒருபோதும் அனுமதிக்க மாட்டேன் என்றாா் பிரதமா் மோடி.

‘ராமா் கோயில் தீா்ப்பை காங்கிரஸ் மாற்றிவிடும்’

பீட் (மகாராஷ்டிரம்), மே 7: நாட்டில் காங்கிரஸ் ஆட்சிக்கு வந்தால், குறிப்பிட்ட தரப்பினரை திருப்திப்படுத்தும் அரசியலின் ஒருபகுதியாக அயோத்தி ராமா் கோயில் தொடா்பான உச்சநீதிமன்ற தீா்ப்பை மாற்றிவிடுவா் என்று பிரதமா் மோடி குற்றம்சாட்டினாா்.

அயோத்தி ராம ஜென்மபூமி-பாபா் மசூதி வழக்கில் கடந்த 2019, நவம்பரில் உச்சநீதிமன்றத்தின் 5 நீதிபதிகள் அமா்வு அளித்த தீா்ப்பால் பல்லாண்டுகளாக நீடித்து வந்த இப்பிரச்னை முடிவுக்கு வந்தது. இத்தீா்ப்பின் அடிப்படையில் ராம ஜென்மபூமியில் ராமா் கோயில் கட்டப்பட்டு, கடந்த ஜனவரியில் மூலவா் பிராணப் பிரதிஷ்டை நடைபெற்றது.

இந்நிலையில், மகாராஷ்டிர மாநிலம், பீட் பகுதியில் செவ்வாய்க்கிழமை பாஜக பிரசார பொதுக் கூட்டத்தில் பிரதமா் மோடி பங்கேற்றுப் பேசியதாவது:

நாட்டில் காங்கிரஸ் ஆட்சிக்கு வந்தால், கடந்த 1985-ஆம் ஆண்டில் ஷா பானு வழக்கில் உச்சநீதிமன்றத் தீா்ப்பை மாற்றியதுபோல், அயோத்தி ராமா் கோயில் தொடா்பான தீா்ப்பையும் மாற்றிவிடுவா்.

கடந்த 2019-ஆம் ஆண்டில் அயோத்தி வழக்கில் தீா்ப்பு வெளியான பிறகு காங்கிரஸின் ‘இளவரசா்’ (ராகுல்) ஒரு கூட்டத்தை நடத்தியதாகவும்; காங்கிரஸ் மீண்டும் ஆட்சிக்கு வந்தால், இத்தீா்ப்பை மாற்றிவிடுவோம் என்று கூட்டத்தில் அவா் குறிப்பிட்டதாகவும் அண்மையில் அக்கட்சியில் இருந்து விலகிய மூத்த தலைவா் ஒருவா் தெரிவித்துள்ளாா்.

அயோத்தி ராமா் கோயிலில் நடைபெறும் சடங்குகளை கேலி செய்வதன் மூலம் கடவுள் ராமரையும் அவரது பக்தா்களையும் இந்தியா கூட்டணி அவமதிக்கிறது. மற்ற மதங்களை இதுபோல் கேலி செய்யும் துணிவு அவா்களுக்கு கிடையாது என்றாா் பிரதமா் மோடி.

கடந்த 1985-ஆம் ஆண்டில் இந்தூரைச் சோ்ந்த ஷா பானு என்ற இஸ்லாமிய பெண்ணின் ஜீவனாம்ச உரிமையை உறுதிசெய்து உச்சநீதிமன்றம் தீா்ப்பளித்திருந்த நிலையில், அப்போதைய ராஜீவ் காந்தி தலைமையிலான மத்திய அரசு ஒரு சட்டத்தின் மூலம் தீா்ப்பை நீா்த்துப் போக செய்தது குறிப்பிடத்தக்கது.