ஊடகத் துறையினர் உடல்நலனில் அக்கறை தேவை -பிரதமர் மோடி

மக்களவை 3-ஆம் கட்ட தோ்தலையொட்டி, குஜராத், கா்நாடகம் உள்ளிட்ட 10 மாநிலங்கள் மற்றும் ஒரு யூனியன் பிரதேசத்தில் உள்ள 93 தொகுதிகளில் செவ்வாய்க்கிழமை (மே 7) காலை 7 மணிக்கு தொடங்கி நடைபெற்று வருகிறது.

குஜராத் தலைநகர் காந்திநகரில் உள்ள ஆளுநர் மாளிகையில் இருந்து காலை புறப்பட்ட மோடி, அகமதாபாத்தில் உள்ள நிஷான் மேல்நிலைப்பள்ளியில் அமைக்கப்பட்டுள்ள வாக்குச் சாவடியில் வாக்கு செலுத்தினார்.

அதன் பின், செய்தியாளர்களுடன் பேசிய அவர், ”தேர்தல் கள நிலவரத்தை ஆய்வு செய்ய செல்லும் ஊடகத் துறையினர் உடல்நலனில் அக்கறை தேவை. அதிகளவில் தண்ணீர் பருக வேண்டும். இது உடல்நலனுக்கு நல்லது. இன்னும் 4 கட்ட வாக்குப்பதிவு நடைபெற உள்ளது. குஜராத்தை சேர்ந்த வாக்காளராக நான் இங்கே வழக்கமாக வாக்களித்து வருகிறேன். வாக்காளர்கள் அதிகளவில் வாக்களிக்க வேண்டும்” என்றார்.

இதனிடையே, வாக்கு செலுத்திவிட்டு வாக்குச்சாவடியை விட்டு வெளியே வந்த பிரதமர் மோடி, வாக்குச்சவடிக்கு வெளியே நின்றிருந்த வாக்காளர்களிடம் மகிழ்ச்சியாக கலந்துரையாடியதையும் காண முடிந்தது.

அப்போது, வயதான பெண்மணி ஒருவர் அவருக்கு கையில் ராக்கி கயிறு கட்டி மகிழ்ந்தார்.