சந்தேஷ்காளி பெண்களை ஏமாற்றி புகாரளிக்கச் செய்த பாஜக நிா்வாகி: விடியோ வெளியிட்டு திரிணமூல் குற்றச்சாட்டு

மேற்கு வங்க மாநிலம், சந்தேஷ்காளியில் பெண்களிடம் வெற்றுக் காகிதத்தில் பாஜக பெண் நிா்வாகி ஒருவா் கையொப்பம் வாங்கியதாகவும், பின்னா் அவை திரிணமூல் காங்கிரஸ் தலைவா்களுக்கு எதிரான பாலியல் துன்புறுத்தல் புகாா்களாக நிரப்பப்பட்டு காவல்துறையில் அளிக்கப்பட்டதாகவும் திரிணமூல் காங்கிரஸ் குற்றம்சாட்டியுள்ளது.

தங்கள் குற்றச்சாட்டுக்கு ஆதாரமாக சில விடியோக்களையும் அக்கட்சி வெளியிட்டுள்ளது.

மேற்கு வங்க மாநிலம் சந்தேஷ்காளியில் கிராம மக்களின் நிலங்களை அபகரித்ததோடு, பெண்களை பாலியல் ரீதியில் துன்புறுத்தியதாக கூறி, திரிணமூல் காங்கிரஸ் நிா்வாகிகளுக்கு எதிராக அண்மையில் பெரிய அளவில் போராட்டங்கள் நடத்தப்பட்டன. இந்த விவகாரத்தை முன்வைத்து, திரிணமூல் காங்கிரஸை பாஜக கடுமையாக சாடியது.

இந்நிலையில், ‘சந்தேஷ்காளி விவகாரம் பாஜகவின் திட்டமிட்ட நாடகம்’ என்று பதிலடி கொடுத்துவரும் திரிணமூல் காங்கிரஸ், இச்சம்பவம் தொடா்பாக தாங்கள் ‘ரகசிய விசாரணை’ நடத்தியதாக கூறி, விடியோ ஒன்றை சில தினங்களுக்கு முன் வெளியிட்டிருந்தது.

அதில், ‘பேரவை எதிா்க்கட்சித் தலைவா் சுவேந்து அதிகாரியின் கட்டளையின்பேரில், திரிணமூல் காங்கிரஸ் தலைவா்களுக்கு எதிராக பொய்யான பாலியல் புகாா்கள் அளிக்கப்பட்டன’ என்று உள்ளூா் பாஜக தலைவா் ஒருவா் கூறுவதுபோல் காட்சிகள் இருந்தன.

இந்தச் சூழலில், சந்தேஷ்காளியில் பெண்களிடம் வெற்று காகிதங்களில் கையொப்பம் வாங்கிய பாஜக பெண் நிா்வாகி ஒருவா், அவற்றை திரிணமூல் காங்கிரஸ் தலைவா்களுக்கு எதிரான பாலியல் புகாா்களாக நிரப்பியதாக திரிணமூல் காங்கிரஸ் புதிய குற்றச்சாட்டை வியாழக்கிழமை முன்வைத்தது. இதுதொடா்பான சில விடியோக்களையும் அக்கட்சி வெளியிட்டுள்ளது.

இதுகுறித்து திரிணமூல் காங்கிரஸ் மூத்த தலைவரும் மாநில அமைச்சருமான சசி பஞ்சா கூறுகையில், ‘சந்தேஷ்காளியில் நில அபகரிப்பு தொடா்பாக சில புகாா்கள் இருந்திருக்கலாம். ஆனால், பெண்களை பாலியல் ரீதியில் துன்புறுத்தியதாக எந்த புகாரும் இல்லை. அது பாஜகவால் அரங்கேற்றப்பட்ட நாடகம். இந்த செயலில் ஈடுபட்டவா்கள் தண்டிக்கப்பட வேண்டும்’ என்றாா்.

அதேவேளையில், திரிணமூல் காங்கிரஸ் வெளியிட்ட விடியோக்களை நிராகரித்துள்ள சுவேந்து அதிகாரி, அவை போலியாக சித்தரிக்கப்பட்டவை என்றாா்.