20 மாநிலங்களுக்கு 122 பேரிடர் மீட்புப் படை குழுக்கள் அனுப்பிவைக்கப்பட்டுள்ளதாக தேசிய பேரிடர் மீட்புப் படையின் தலைவர் எஸ்.என். பிரதான் தெரிவித்துள்ளார்.
இதுபற்றி இன்று (வியாழக்கிழமை) செய்தியாளர்கள் சந்திப்பில் அவர் தெரிவித்ததாவது:
"தேசிய பேரிடர் மீட்புப் படையைச் சேர்ந்த 122 குழுக்கள் 20 மாநிலங்களுக்கு அனுப்பப்பட்டுள்ளன. அதில் அசாம் மாநிலத்திற்கு 16 குழுக்களும் பிகார் மாநிலத்திற்கு 21 குழுக்களும் அனுப்பிவைக்கப்பட்டுள்ளன.
இந்த ஆண்டு பருவமழையில் இயல்பை விட அதிகமாக மழை பெய்து வருகிறது. இதனால் நாட்டின் பல்வேறு பகுதிகளில் வெள்ளப்பெருக்கு ஏற்படும் நிலைமை ஏற்பட்டுள்ளது. பிகார் மற்றும் அசாம் மாநிலங்கள் தொடர்ந்து வெள்ளத்தால் பாதிக்கப்பட்ட முக்கியமான பகுதிகளாக இருக்கின்றன.
பிகாரில் ஏற்பட்டுள்ள வெள்ளப்பெருக்கு நேபாளத்தின் தெராய் பிராந்தியத்தில் பெய்யும் மழையைப் பொறுத்தது. அங்கு மீட்புப் பணிகள் தொடர்ந்து நடைபெற்று வருகின்றன. பேரிடர் மேலாண் மீட்புக் குழுவினர் முன்னெச்சரிக்கை நடவடிக்கையாக பிபிஇ உடை அணிந்து மீட்புப்பணிகளை மேற்கொண்டு வருகிறார்கள்.
தற்போது நாங்கள் இரு சாவால்களை எதிர்கொண்டு வருகிறோம். ஒன்று வெள்ளப்பெருக்கு, மற்றொன்று கரோனா. ஒரே நேரத்தில் இரு பெரும் இயற்கை பேரழிவைச் சந்தித்து வருகிறோம். தற்போது கோசி, கந்தக், கமலாபனல், மஹானந்தா ஆகிய நதிகள் ஆபத்து கட்டத்தை கடந்து இயல்பு நிலைக்கு திரும்புகின்றன." என்றார் பிரதான்.
அசாமில் ஏற்பட்ட வெள்ளத்தால் 30 மாவட்டங்களில் 89 பேர் பலியானதாகவும், 56,27,389 பேர் பாதிக்கப்பட்டுள்ளதாகவும் அந்த மாநில பேரிடர் மேலாண்மை ஆணையம் தெரிவித்துள்ளது.