மேற்கு வங்கம், அசாம், தமிழகம் உள்ளிட்ட 5 மாநில தேர்தல்கள் இன்றுடன் நிறைவடைந்தது. இந்த தேர்தலுக்கான வாக்கு எண்ணிக்கை மே 2ஆம் தேதி நடைபெறவுள்ளது.
கரோனா இரண்டாம் அலை பரவலுக்கு மத்தியில், பிகார் சட்டப்பேரவைத் தேர்தலை முன்னுதாரணமாக வைத்து தமிழகம் உள்ளிட்ட 5 மாநிலங்களுக்கு மார்ச் 27ஆம் தேதி முதல் ஏப்ரல் 29ஆம் தேதி வரை 8 கட்டங்களாக சட்டப்பேரவை தேர்தலை நடத்த தேர்தல் ஆணையம் அறிக்கை வெளியிட்டது.
அதன் அடிப்படையில் தமிழகம், புதுவை, கேரளம் ஆகிய 3 மாநிலங்களுக்கான சட்டப்பேரவைத் தேர்தல் ஒரே கட்டமாக ஏப்ரல் 6ஆம் தேதி நடைபெற்றது.
இருப்பினும், அசாமில் 3 கட்டங்கள், மேற்கு வங்கத்தில் 8 கட்டங்களாக தேர்தல் நடைபெற்றது. இறுதி கட்ட தேர்தலாக மேற்கு வங்கத்தில் 35 தொகுதிகளுக்கு இன்று வாக்குப்பதிவு நடைபெற்றது.
மாலை 6.30 மணியுடன் வாக்குப்பதிவு முடிவடைந்ததையடுத்து, 5 மாநிலங்களுக்கான வாக்குப்பதிவு நிறைவடைந்துள்ளது.
இந்த தேர்தல்களுக்கான வாக்கு எண்ணிக்கை மே 2ஆம் தேதி கரோனா விதிமுறைகளை பின்பற்றி நடைபெறவுள்ளது.