கந்தர்வகோட்டை: கந்தர்வகோட்டையில் சட்டத்திற்கு புறம்பாக செயல்படும் காவல்துறையை கண்டித்து விடுதலைச் சிறுத்தைகள் கட்சி புதன்கிழமை கண்டன ஆர்ப்பாட்டம் நடத்தினர்.
சட்டத்திற்கு புறம்பாக செயல்படும் காவல்துறை மீது நடவடிக்கை எடுக்கவும், பாதிக்கப்பட்ட மக்கள் மீது போடப்பட்ட பொய் வழக்குகளை திரும்பப் பெறவும், பாதிக்கப்பட்ட மக்களுக்கு நீதி கேட்டும் கந்தர்வகோட்டை பேருந்து நிலையம் முன்பாக நடைபெற்ற கண்டன ஆர்ப்பாட்டத்திற்கு விசிக ஒன்றிய செயலாளர் நா. வெள்ளையன், இந்திய கம்யூனிஸ்ட் கட்சி ஒன்றிய செயலாளர் உ. அரசப்பன் , மார்க்சிஸ்ட் கம்யூனிஸ்ட் கட்சி ஒன்றிய செயலாளர் வி. ரெத்தினவேல் ஆகியோர் தலைமை வகித்தனர்.
ஆர்ப்பாட்டத்தில் கந்தர்வகோட்டை ஒன்றியம் வெள்ளாள விடுதி, வளவம்பட்டி ஆகிய பகுதிகளில் சமூக ஒற்றுமையையும், பொது அமைதியை கெடுக்கும் விதமாக தலித் மக்கள் மீது தொடர்ந்து தாக்குதல் நடத்தி வரும் சமூக விரோதிகளையும், அவர்களை பாதுகாத்திடும் கட்சித் தலைவர்களையும் கண்டித்து மார்க்சிஸ்ட் கம்யூனிஸ்ட் கட்சி மாவட்ட செயலாளர் எஸ்.கவிவர்மன், விசிக மாவட்ட செயலாளர் வெ. ம. விடுதலை கனல், சி.பி.எம்.எல். மாவட்ட செயலாளர் பழ. ஆசைதம்பி, இந்திய கம்யூனிஸ்ட் கட்சி மாவட்ட செயலாளர் மு. மாதவன் ஆகியோர் கலந்துகொண்டு கண்டன உரையாற்றினர்.
கந்தர்வகோட்டையில் விசிக சார்பில் நடைபெற்ற கண்டன ஆர்ப்பாட்டம்