ஸ்மார்ட்டா இருக்கணும்னா ஸ்மார்ட் போன் பயன்படுத்துங்கள் என்று கூறும் அளவுக்கு நம்முடைய ஆறாவது விரலாக மாறிவிட்டது இந்த மொபைல். குழந்தைகள் முதல் பெரியவர்கள் வரை சகலரும் தங்கள் உலகில் ஆழ்ந்திருப்பது என்பது போனில் மூழ்கியிருக்கையில்தான். நவீன வாழ்க்கையில் எல்லாம் மெய் நிகர் உலகமாகிவிட்ட நிலையில், உங்கள் ஸ்மார்ட்போன்களில் உள்ள ஜிமெயில், வாட்ஸ்ஆப், ஃபேஸ்புக், டிவிட்டர், இன்ஸ்டாகிராம் உள்ளிட்ட சமூக வலைதளங்களை தினந்தோறும் கையடக்க ஃபோனிலேயே பயன்படுத்திக் கொண்டிருப்பீர்கள்.
ஆன்லைன் பயன்பாடுகளையும் தற்போது ஸ்மார்ட்போன்கள் நிறைவு செய்வதால் சதா போனும் கையுமாக பலர் உள்ளனர். ஆன்லைன் ஷாப்பிங் மட்டுமல்லாமல் புகைப்படங்களை ஆன்லைனில் பதிவேற்றவும், பதிவிறக்கவும் செய்வது முதல், திரைப்படங்கள் பார்த்து வரை இணையத்தில் பயன்படுத்தும் நிலை வந்துவிட்டது. இப்படி நாளில் பெரும்பாலான நேரத்தை ஆக்கிரமிக்கும் உங்கள் ஸ்மார்ட்போனை யாரேனும் களவாடி விட்டால்? போன் கையில்தானே உள்ளது எப்படி இது சாத்தியம் என்று நினைக்காதீர்கள். எதிக்கல் ஹாக்கிங் முதல் சைபர் க்ரைம் வரை பலவகையான ஹேக்கிங் உள்ளது. ஒருவரது தகவல்களை அவருக்குத் தெரியாமல் தொழில்நுட்பத்தைப் பயன்படுத்தி வேவு பார்ப்பது முதல் டேட்டாக்களைத் திருடி விற்பது வரை பல குற்றச் செயல்கள் நடந்துவருகின்றன. தகவல் திருட்டுதான் இந்த நவீன யுகத்தின் மிகப் பெரிய சவாலாக இருந்து வருகிறது. வங்கியில் வைத்திருக்கும் இருப்புத் தொகை ஒரே நொடியில் திடீரென்று காணாமல் போய்விட்டால் என்ன செய்வது? உங்களுடைய போன் ஹேக் செய்யப்பட்டுள்ளதா என்பதைத் தெரிந்து கொள்ள சில வழிகள் உள்ளன. அவை
மொபைல் டேட்டா பயன்பாடு : உங்கள் ஸ்மார்ட்போனில் உளவுக் கருவிகள் உங்களுக்கே தெரியாமல் இணைக்கப்பட்டிருந்தால் அதிக டேட்டா பயன்பாடு இருக்கும். உஷாராக எந்தளவு உங்கள் பயன்பாடு உள்ளது என்பதைக் கண்டறியுங்கள். மேலும் உங்கள் போன் ஹேக் செய்யப்பட்டு இருந்தால் டேட்டா அதிகமாக செலவழியும். கூகுள் தரும் டெட்டாலி எனும் செயலி உங்களது இணைய பயன்பாட்டைக் கணித்துச் சொல்லும்.
மெதுவான செயல்திறன்: உங்கள் மொபைல் அடிக்கடி ஹாங் ஆனாலோ அல்லது மெதுவாகச் செயல்பாட்டாலோ நீங்கள் ஹேக்கர்களின் பிடியில் சிக்கியிருக்கலாம். சில சமயம் குறிப்பிட்ட சில செயலிகளின் பயன்பாடுகள், அதிக டேட்டா பயன்பாடு இருந்தாலும்கூட மொபைல் ஸ்லோவாக இருக்கலாம்.
எஸ்எம்எஸ்: புதிய நம்பர்கள், அல்லது உங்களுக்குத் தெரியாத நம்பருக்கான அழைப்புகள் சென்றிருந்தால் உடனடியாக அது என்னவென்று ஆராய்ந்து பாருங்கள். மற்ற நம்பர்களுக்கு கால் செய்யும் போது அல்லது குறுஞ்செய்தி அனுப்புகையில் கவனமாக குறித்து வைத்துக் கொள்ளுங்கள். புதிய நம்பர் பதிவு பில்லில் இருந்தால் உங்கள் ஃபோனில் உளவுக் கருவிகள் இருக்கலாம். உங்களது தொலைபேசிக்கு சம்பந்தமே இல்லாத பல ஃபைல்கள் தாமாகவே தோன்றியிருக்கும். உங்களது அனுமதி இல்லாமலேயே போன் அழைப்புகள் மற்றும் குறுஞ்செய்திகள் உங்கள் தொலைபேசியில் இருந்து செல்லும். உங்களது மின்னஞ்சல்கள் நீங்கள் திறப்பதற்கு முன்னதாகவே திறக்கப்பட்டுப் படிக்கப்பட்டிருக்கும்.
பேட்டரி ஆயுள்: உங்களுக்குத் தேவையில்லாத செயலிகளைத் தரவிறக்கம் செய்யாதீர்கள். உங்கள் கைபேசியில் அவற்றின் மூலம் தகவல்கள் பதிவு செய்யப்பட்டு இயக்கத்தில் இருக்கும். பேட்டரி ஆயுள் காலப்போக்கில் தவிர்க்க முடியாமல் குறையும். உளவு கருவிகள் இருந்தாலும், அவைகள் ஸ்னேன் செய்வதாலும் ஆட்டோ மேடிக்காக ஸ்மார்ட்போன் குறையும்.
உங்களுக்குத் தெரியாத மின்னஞ்சல் இணைக்கப்பட்டிருந்தால் போன் ஹேக் செய்யப்பட்டுள்ளது என்று அர்த்தம். உங்களது போனிலுள்ள காமிரா தானாகவே திறந்துவிடும். உங்கள் போன் முழுவதும் உங்களுடைய கட்டுப்பாட்டில் இல்லாமலேயே தானியங்கி தொடல்களைச் (Automatic Touches) செய்யும். மொபைல் எப்போதும் சூடாகவே இருக்கும். மேலும் முக்கியமாக மொபைலில் பேட்டரி சீக்கிரமாகத் தீர்ந்துவிடும். மர்ம பாப் ஆப்கள் தாமாகவே திறக்கும்.
மேற்சொன்னவற்றில் மூன்று அல்லது அதற்கு மேற்பட்டவை இருந்தால் நிச்சயம் உங்கள் போன் ஹேக் செய்யப்பட்டு இருக்கலாம் எனத் தெரிந்து கொண்டு உரிய நடவடிக்கை எடுத்துவிடுங்கள்.