திருமலைக்குச் செல்லும் நடைபாதை மாா்க்கமான ஸ்ரீவாரிமெட்டில் சிறுத்தை நடமாட்டம் இருப்பதாக பாதுகாப்புத் துறை அதிகாரிகள் கண்டறிந்து பக்தா்களை எச்சரித்து வருகின்றனா்.
திருமலைக்கு திருப்பதியில் உள்ள அலிபிரி மற்றும் சீனிவாசமங்காபுரத்தில் உள்ள ஸ்ரீவாரிமெட்டு உள்ளிட்ட 2 நடைபாதை மாா்க்கங்கள் உள்ளன. ஸ்ரீவாரிமெட்டுக்குச் செல்ல தேவஸ்தானம் ரயில் நிலையத்திலிருந்து தா்ம ரதத்தை இயக்கி வருகிறது. இங்கு 2,500 படிகளை கொண்டதால், பக்தா்கள் எளிதாக ஒன்றரை மணிநேரம் முதல் 2 மணி நேரத்துக்குள் திருமலையை அடைந்து விடுகின்றனா். இவ்வழியாகச் செல்லும் பக்தா்களுக்கு 6 ஆயிரம் திவ்ய தரிசன டோக்கன்களை தேவஸ்தானம் வழங்கி வருகிறது.
இந்த வழி அடா்ந்த வனப்பகுதியில் உள்ளதால் காலை 6 மணி முதல் மாலை 6 மணி வரை மட்டுமே பக்தா்கள் இவ்வழியாகச் செல்ல அனுமதிக்கப்படுவா். இந்நிலையில், திங்கள்கிழமை இரவு 8 மணியளவில் ஸ்ரீவாரிமெட்டு மாா்க்கத்தில் உள்ள 250-ஆவது படி அருகில் ஒரு மான் குட்டி வேட்டையாடப்பட்டிருப்பதை பாதுகாப்புத் துறை ஊழியா்கள் கண்டனா். மான் குட்டியை சிறுத்தை வேட்டையாடியதாக அங்கிருந்த அடையாளங்களை வைத்து போலீஸாா் உறுதிப்படுத்தினா். எனவே, அப்பகுதியில் சிறுத்தை நடமாட்டம் இருப்பதால், செவ்வாய்க்கிழமை காலை 7 மணிக்குப் பின்னரே பக்தா்கள் அப்பாதையில் செல்ல அனுமதி வழங்கினா்.
தற்போது பின்பனிகாலம் என்பதால், காலை வேளையில் பனிமூட்டம் அதிகமாக உள்ளது. எனவே, காலை 7 மணிக்கு நன்கு வெளிச்சம் வந்த பின் பக்தா்களை அவ்வழியாக மலைக்குச் செல்ல பாதுகாப்பு ஊழியா்கள் அனுமதித்து வருகின்றனா்.
பக்தா்களும் தேவையில்லாமல், வனத்துக்குள் செல்ல வேண்டாம் எனவும் அவா்கள் எச்சரித்துள்ளனா்.