பாகிஸ்தான் - தென் ஆப்பிரிக்கா இடையேயான டெஸ்ட் தொடரின் முதல் ஆட்டம் கராச்சியில் செவ்வாய்க்கிழமை தொடங்குகிறது. இதில் முதல் முறையாக டெஸ்ட் அணி கேப்டனாக பாபா் ஆஸம் களம் காண்கிறாா்.
தென் ஆப்பிரிக்க அணி பாகிஸ்தான் வருவது 13 ஆண்டுகளில் இது முதல் முறையாகும். அந்த அணிக்கு குவிண்டன் டி காக் தலைமையேற்றுள்ளாா்.
உலக டெஸ்ட் சாம்பியன்ஷிப் ஃபைனலில் விளையாடும் வாய்ப்பை பாகிஸ்தான் இழந்துவிட்ட நிலையில், தென் ஆப்பிரிக்கா இதர அணிகள் மோதும் ஆட்டங்களின் முடிவை நம்பியுள்ளது. இந்தத் தொடரின் 2-ஆவது டெஸ்ட் பிப்ரவரி 4 முதல் ராவல்பிண்டியில் நடைபெறவுள்ளது. அதையடுத்து பிப்ரவரி 11 முதல் 14 வரை லாகூரில் 3 ஆட்டங்கள் கொண்ட டி20 தொடா் நடைபெறவுள்ளது.