சென்னையில் நேற்று நடைபெற்ற ராஜஸ்தான் ராயல்ஸ் அணிக்கு எதிரான ஐபிஎல் ஆட்டத்தில் தோனியின் அதிரடியால் சென்னை அணி 175 ரன்களை குவித்தது. தோனி 46 பந்துகளில் 4 சிக்ஸர், 4 பவுண்டரிகளுடன் 75 ரன்கள் எடுத்து ஆட்டமிழக்காமல் இருந்தார். இதன்பிறகு விளையாடிய ராஜஸ்தான் அணி, 20 ஓவர்களில் 8 விக்கெட் இழப்புக்கு 167 ரன்கள் எடுத்தது. இதனால் மிகவும் பரபரப்பாக நடைபெற்ற ஆட்டத்தில் 8 ரன்கள் வித்தியாசத்தில் வென்றது சென்னை அணி. இதையடுத்து புள்ளிகள் பட்டியலில் சிஎஸ்கே அணி 6 புள்ளிகளுடன் முதலிடத்துக்கு முன்னேறியுள்ளது. இத்துடன் 8 அணிகளும் 3 ஆட்டங்கள் விளையாடியுள்ள நிலையில் சென்னை அணி மட்டுமே ஒரு தோல்வியும் அடையாமல் உள்ளது.
சென்னையில் மூன்று வெற்றிகளிலும் சத்தமில்லாமல் பங்களித்துள்ளார் வேகபந்துவீச்சாளரான தீபக் சஹார். இத்தனைக்கும் 3 ஆட்டங்களிலும் அவர் 3 விக்கெட்டுகள் மட்டுமே எடுத்துள்ளார். சிஎஸ்கேவின் இம்ரான் தாஹிர் 6 விக்கெட்டுகளுடன் அதிக விக்கெட்டுகள் எடுத்த வீரர்களின் பட்டியலில் முதலிடத்தில் உள்ளார்.
எனினும் ரன்களைக் கட்டுப்படுத்துவதில் கில்லியாக இருக்கிறார் சஹார். 3 ஆட்டங்களிலும் விளையாடி குறைந்த ரன்களைக் கொடுத்த வீரர்களின் பட்டியலில் சஹார் தான் முதலிடத்தில் உள்ளார். 3 ஆட்டங்களிலும் 12 ஓவர்களில் 56 ரன்கள் மட்டுமே கொடுத்துள்ளார். எகானமி - 4.66. இந்தப் பட்டியலில் அடுத்த இரு இடங்களிலும் சிஎஸ்கே வீரர்களே உள்ளார்கள். 2. இம்ரான் தாஹிர் 5.20, ஜடேஜா 6.10.
அதேபோல டாட் பந்துகளிலும் சாஹர் தான் முதலிடத்தில் உள்ளார். 3 ஆட்டங்களிலும் வீசிய 12 ஓவர்களில் 36 பந்துகளை டாட் பந்துகளாக வீசியுள்ளார். அடுத்த இடத்தில் 35 டாட் பந்துகளுடன் ஜோஃப்ரா ஆர்ச்சர் உள்ளார்.
ஐபிஎல் 2019: அதிக டாட் பந்துகள் (3 ஆட்டங்கள்)
தீபக் சஹார் - 36
ஜோஃப்ரா ஆர்ச்சர் - 35
பும்ரா - 34
ரஷித் கான் - 30
இம்ரான் தாஹிர் - 29
ஐபிஎல் 2019: சிறந்த எகானமி (3 ஆட்டங்கள்)
தீபக் சஹார் - 4.66
இம்ரான் தாஹிர் - 5.20
ஜடேஜா - 6.10
ரஷித் கான் - 6.25
ஜோஃப்ரா ஆர்ச்சர் - 6.33
மேலும் 3 ஆட்டங்களிலும் பவர்பிளே பகுதியில் பந்துவீசி குறைவான ரன்களைக் கொடுத்து சென்னை அணிக்குப் பேருதவி செய்துள்ளார் சஹார். இதனால் பவர்பிளேவில் அதிக ரன்களைக் கொடுப்பது குறித்த கவலையைத் தோனிக்கு இல்லாமல் செய்துவிட்டார்.
அதிக ரன்கள் எடுத்த பேட்ஸ்மேன்களின் பட்டியலில் டாப் 10-ல் ஒரு சிஎஸ்கே வீரரும் இல்லை. 13-வது இடத்தில் தோனியும் 17-வது இடத்தில் ரெய்னாவும் உள்ளார்கள். ஆனால் பந்துவீச்சாளர்கள் சிஎஸ்கே அணிக்குப் பெரிய பலமாக உள்ளார்கள். அவர்களில் அதிக விக்கெட்டுகள் எடுக்காமல் போனாலும் ரன்களைக் கட்டுப்படுத்துவதில் வேறெந்த வீரருக்கும் தான் சளைத்தவர் இல்லை என்பதை நிரூபித்துள்ளார் தீபக் சஹார்.
2012-ல் ராஜஸ்தான் ராயல்ஸ் அணிக்குத் தேர்வான தீபக் சஹார், 2016, 2017-ம் ஆண்டுகளில் புணே அணிக்காக விளையாடினார். 26 வயது சஹாரைக் கடந்த வருட ஐபிஎல் ஏலத்தில் ரூ. 80 லட்சத்துக்குத் தேர்வு செய்தது சென்னை அணி. கடந்த வருடம் 12 ஆட்டங்களில் விளையாடி 10 விக்கெட்டுகளை எடுத்தார் சஹார். எகானமி - 7.28. இந்நிலையில் இந்த வருடமும் அசத்தலான பந்துவீச்சால் சென்னை அணிக்குத் தகுந்த வெற்றி வாய்ப்புகளை உருவாக்கி வருகிறார்.
