பெட்ரோல், டீசல் விலை கடந்த ஒரு மாத காலத்தில் குறிப்பிடத்தக்க அளவு குறைந்துள்ளது. வியாழக்கிழமை (நவ.22) நிலவரப்படி சென்னையில் ஒரு லிட்டர் பெட்ரோல் ரூ.78.88 ஆகவும், டீசல் ஒரு லிட்டர் ரூ.74.99 ஆகவும் விற்பனை செய்யப்படுகிறது.
நாள்தோறும் பெட்ரோல், டீசல் விலை நிர்ணயிக்கும் முறை அமலுக்கு வந்தது. அதனடிப்படையில், கடந்த ஆகஸ்ட், செப்டம்பர் மாதங்களில் பெட்ரோல், டீசல் விலை தொடர்ந்து அதிகரித்தது. அக்டோபர் 4-ஆம் தேதி சென்னையில் ஒரு லிட்டர் பெட்ரோல் ரூ.87.33 என்ற உச்ச விலையில் இருந்தது. அக்டோபர் 17-ஆம் தேதி டீசல் விலை உச்சத்தை எட்டி, ஒரு லிட்டர் ரூ.80.04-க்கு விற்பனையானது. சர்வதேச அளவில் கச்சா எண்ணெய் விலை உயர்வு, அமெரிக்க டாலருக்கு நிகரான இந்திய ரூபாயின் மதிப்பு குறைவு ஆகியவை இதற்கு முக்கியக் காரணங்களாகக் கூறப்பட்டன. விலை உயர்வு மக்களை வெகுவாக பாதித்ததால் மத்திய அரசு கலால் வரியை குறைக்க வேண்டும் என்று வலியுறுத்தப்பட்டது.
இதனிடையே, கடந்த மாதம் 4-ஆம் தேதி பெட்ரோல், டீசல் மீதான கலால் வரியை லிட்டருக்கு தலா ரூ.1.50 குறைப்பதாக மத்திய அரசு அறிவித்ததுடன், எண்ணெய் நிறுவனங்கள் மேலும் ரூ.1 குறைக்க வேண்டும் என வலியுறுத்தியது. ஆக மொத்தம், இரண்டின் விலையிலும் ரூ.2.50 வரை குறைக்கப்பட்டது. இதையடுத்து, பாஜக ஆளும் மாநிலங்களும் மாநில அரசு விதிக்கும் வரியை ரூ.2.50 குறைத்தது. இதனால், பெட்ரோல், டீசல் விலை பல மாநிலங்களில் ரூ.5 வரை குறைந்தது.
இருப்பினும், சர்வதேச கச்சா எண்ணெய் விலை நிலவரப்படி, அக்டோபர் 17-ஆம் தேதி வரையில் பெட்ரோல், டீசலின் விலை ஏறுமுகமாகவே இருந்தது.
அதற்கு அடுத்த நாளில் இருந்து அவற்றின் விலை தொடர்ந்து குறைந்தது. கடந்த ஒரு மாதமாக பெட்ரோல், டீசல் விலை குறைந்து வருவது மக்களுக்கு சற்று நிம்மதி அளித்துள்ளது.
இந்நிலையில், சென்னையில், நேற்றைய விலையில் இருந்து பெட்ரோல் 43 காசுகள் குறைந்து லிட்டருக்கு ரூ.78.88 ஆகவும், டீசல் விலை லிட்டருக்கு 32 காசுகள் குறைந்து லிட்டருக்கு ரூ.74.99 ஆகவும் விற்பனை செய்யப்படுகிறது.