பொள்ளாச்சி பாலியல் வழக்கில் கைது செய்யப்பட்டு, கோவை மத்திய சிறையில் அடைக்கப்பட்டிருந்த திருநாவுக்கரசு, சபரிராஜன், சதீஷ், வசந்தகுமார், மணிவண்ணன் ஆகிய 5 பேரையும் பாதுகாப்பு கருதி, சிறைத் துறை அதிகாரிகள் சேலம் மத்திய சிறைக்கு சனிக்கிழமை மாற்றினர்.
கோவை மாவட்டம், பொள்ளாச்சி பகுதியில் கல்லூரி மாணவிகள், இளம்பெண்களை பாலியல் வன்கொடுமை செய்த விவகாரத்தில் சபரிராஜன், சதீஷ், வசந்தகுமார், மணிவண்ணன், திருநாவுக்கரசு ஆகிய 5 பேர் போலீஸாரால் கைது செய்யப்பட்டனர்.
இந்த வழக்கு மாநில காவல் துறை வசமிடமிருந்து சிபிசிஐடிக்கு மாற்றப்பட்டு, பின்னர் சிபிஐ விசாரணைக்கு மாற்றப்பட்டது. இந்நிலையில் பாதிக்கப்பட்ட மாணவிகள், இளம்பெண்கள், அவர்களது பெற்றோர், உறவினர்களிடம் சிபிஐ அதிகாரிகள் விசாரணை நடத்தினர்.
மேலும் கைது செய்யப்பட்ட 5 பேரிடமும் சிபிஐ அதிகாரிகள் பல கட்டமாக விசாரணை நடத்தி வருகின்றனர். அவர்களை காணொலிக் காட்சி மூலம் மாவட்ட குற்றவியல் நீதிமன்ற விசாரணைக்கு கடந்த திங்கள்கிழமை ஆஜர்படுத்தினர். வழக்கை விசாரித்த நீதிபதி, 5 பேரையும் வரும் ஜூலை 1-ஆம் தேதி வரை நீதிமன்றக் காவலில் வைக்குமாறு உத்தரவிட்டார்.
அதைத் தொடர்ந்து 5 பேரும் மீண்டும் கோவை மத்திய சிறையில் அடைக்கப்பட்டனர். இந்நிலையில், பொள்ளாச்சி பாலியல் வழக்கில் கைது செய்யப்பட்ட 5 பேரையும், சிறைத் துறை அதிகாரிகள் சனிக்கிழமை காலை சேலம் மத்திய சிறைக்கு மாற்றினர். முன்னதாக காலை 9.30 மணிக்கு பலத்த போலீஸ் பாதுகாப்புடன் வாகனம் மூலமாக சேலம் கொண்டு செல்லப்பட்டனர். பாதுகாப்பு கருதியே இந்த நடவடிக்கை மேற்கொள்ளப்பட்டுள்ளதாக சிறைத் துறை அதிகாரிகள் தெரிவித்தனர்.