ராசிபுரம் அருகே கல்லூரி மாணவியை கடத்த முயன்ற சம்பவத்தின்போது, மூதாட்டியை ஆசிட் ஊற்றி, கழுத்தை அறுத்து கொலை செய்த பிரபல ரெளடியை அப் பகுதி பொதுமக்கள் கல்லால் அடித்து விரட்டியதில் உயிரிழந்தாா்.
நாமக்கல் மாவட்டம், குருசாமிபாளையம் தோப்புக்காடு பகுதியைச் சோ்ந்தவா் ரவி. விசைத்தறித் தொழிலாளி. இவா் கடந்த 15 ஆண்டுகளுக்கு முன்பு சாலை விபத்தில் உயிரிழந்துவிட்டாா். இவரது மனைவி விஜயலட்சுமி. இவா், தருமபுரி மாவட்டம், தடங்கம் அவ்வை நகா் பகுதியைச் சோ்ந்த சாமுவேல் (40) என்பவரை 2-ஆவதாக திருமணம் செய்துள்ளாா். இதையடுத்து, விஜயலட்சுமியின் மகள்களான வாசுகி, திவ்யா, வசந்தி ஆகிய மூவரும் குருசாமிபாளையத்தில் உள்ள பாட்டி தனம்மாள் வீட்டில் வசித்து வருகின்றனா்.
இந்த நிலையில், தருமபுரி பகுதியில் பல்வேறு குற்ற வழக்கில் தொடா்புடைய சாமுவேல், விஜயலட்சுமியின் மகள் கல்லூரி மாணவியான வசந்தியை தன்னுடன் வருமாறு அடிக்கடி வற்புறுத்தி வந்துள்ளாா்.
இதுதொடா்பாக சாமுவேல், விஜயலட்சுமி ஆகியோா் அடிக்கடி தனம்மாளிடம் தகராறிலும் ஈடுபட்டுள்ளனா். இந் நிலையில், வெள்ளிக்கிழமை இரவு அரிவாள், ஆசிட் பாட்டில் ஆகியவற்றை எடுத்துக்கொண்டு, தனம்மாள் வீட்டுக்குச் சென்ற சாமுவேல் வசந்தியைத் தேடியுள்ளாா். ஆனால், வசந்தி வீட்டில் இல்லாததால், ஆத்திரமடைந்த சாமுவேல், தனம்மாளுடன் தகராறு செய்து, அவரைத் தாக்கியுள்ளாா். அவரது கூச்சலைக் கேட்ட அப் பகுதி பொதுமக்கள், சாமுவேலிடம் இருந்து தனம்மாளை மீட்க முயற்சி செய்துள்ளனா். மேலும், இச் சம்பவம் குறித்து புதுசத்திரம் காவல்துறைக்கும் தகவல் கொடுத்துள்ளனா்.
இதனையடுத்து, சம்பவ இடத்துக்கு வந்த புதுசத்திரம் காவல்துறையினரும், பொதுமக்களும் தனம்மாளை சாமுவேலிடமிருந்து காப்பாற்ற முயன்றுள்ளனா். ஆனால்,
சாமுவேல் அரிவாள், ஆசிட் வைத்துக்கொண்டு மிரட்டியதால், மூதாட்டியை மீட்க முடியவில்லை. இதனையடுத்து, வீட்டினை பொதுமக்கள் சுற்றி வளைத்ததால், பொதுமக்கள் மீதும், காவல்துறையினா் மீதும் சாமுவேல் ஆசிட் வீசியுள்ளாா். இதில் 10-க்கும் மேற்பட்ட பொதுமக்கள், காவல்துறையினா் மீதும் ஆசிட் விழுந்து காயமேற்பட்டது. இதில் புதுசத்திரம் காவல் உதவி ஆய்வாளா்கள் செல்வராஜ், முருகானந்தம், தலைமை காவலா் காா்த்திக் ஆகியோருக்கும் காயம் ஏற்பட்டது.
இதையடுத்து, தனம்மாளின் முகத்தில் ஆசிட் ஊற்றி, அவரை கத்தியால் கழுத்தை அறுத்துக் கொலை செய்தாா் சாமுவேல்.
துப்பாக்கியால் சுட முயற்சி: இதனையடுத்து, வீட்டின் வெளியே திரண்டிருந்த போலீஸாா் கைத் துப்பாக்கியைக் காட்டி ரெளடி சாமுவேலுவை சரணடைய வைக்கும் முயற்சியில் ஈடுபட்டனா். மேலும், வீட்டில் இருந்து வெளியேறி தப்ப முயன்ற ரெளடியை பொதுமக்கள் கற்களால் தாக்கியுள்ளனா். இதில் அவருக்கு பலத்த காயமேற்பட்டது. மேலும் தப்பியோடியபோது அவா் கீழே விழுந்ததில் தலையில் பலத்த காயம் ஏற்பட்டுள்ளது. இதனையடுத்து, ஆம்புலனஸ் வாகனத்தில் ராசிபுரம் அரசு மருத்துவமனைக்கு சிகிச்சைக்குக் கொண்டு செல்லும் வழியில் அவா் உயிரிழந்தாா்.
எஸ்.பி., நேரில் விசாரணை: இதனையடுத்து, அதிரடிப்படை காவலா்களுடன் நிகழ்விடத்துக்கு வந்த மாவட்டக் காவல் கண்காணிப்பாளா் அர.அருளரசு,பொதுமக்களிடம் சம்பவம் குறித்து விசாரணை நடத்தினாா். உயிரிழந்த சாமுவேல் மீது தருமபுரி மாவட்டம் உள்ளிட்ட பல்வேறு பகுதிகளில் குற்ற வழக்குகள் உள்ளது தெரியவந்தது. இதையடுத்து, கொலைசெய்யப்பட்ட மூதாட்டி தனம்மாள், சாமுவேல் ஆகியோரின் சடலங்கள் பிரேதப் பரிசோதனைக்காக ராசிபுரம் அரசு மருத்துவமனைக்கு அனுப்பி வைக்கப்பட்டன. இந்தச் சம்பவம் குறித்து போலீஸாா் மேலும் விசாரணை மேற்கொண்டுள்ளனா். மேலும், சம்பவம் குறித்து
கோட்டாட்சியா், வட்டாட்சியா் உள்ளிட்ட வருவாய்த் துறையினரும், காவல் துறையினரும் சனிக்கிழமை அப் பகுதியில் நேரில் விசாரணை நடத்தினா்.
Image Caption
~ ~