குடும்ப அட்டை திருத்தம்: நாளை குறைதீர் முகாம்

குடும்ப அட்டைகளில் திருத்தங்களை மேற்கொள்ள வரும் சனிக்கிழமை (ஜன. 19) சிறப்பு முகாம் நடைபெறும் என்று தமிழக அரசு அறிவித்துள்ளது. இதுகுறித்து, மாநில அரசு வியாழக்கிழமை வெளியிட்ட அறிவிப்பு:-
குடும்ப அட்டையில் மாற்றங்கள் செய்தல், பொது விநியோகத் திட்டத்தில் காணப்படும் குறைபாடுகள் குறித்து தமிழகம் முழுவதும் மக்கள் குறைதீர் முகாம் ஒவ்வொரு மாதமும் நடத்தப்படும் என்று அரசு அறிவித்துள்ளது. அதன்படி, ஜனவரி மாதத்துக்கான மாதாந்திர பொது விநியோகத் திட்ட மக்கள் குறைதீர் முகாம் சென்னையில் உள்ள 17 மண்டல உதவி ஆணையாளர் அலுவலகங்களில் வரும் சனிக்கிழமை நடைபெறுகிறது.
காலை 10 மணி முதல் பிற்பகல் 1 மணி வரை நடைபெறும் குறைதீர் முகாமில், குடும்ப அட்டைகளில் பெயர் சேர்த்தல், நீக்கல், முகவரி மாற்றம், செல்லிடப்பேசி எண் பதிவு செய்தல் போன்ற மாற்றங்களை மேற்கொள்ளலாம். 
மேலும், பொது விநியோகக் கடைகளின் செயல்பாடுகள், அத்தியாவசியப் பொருள்களின் தரம் குறித்த புகார்கள், தனியார் சந்தையில் விற்கப்படும் பொருள்கள், சேவைகளில் குறைபாடுகள் குறித்த புகார்கள் இருந்தால் அதனைத் தெரிவிக்கலாம் என்று தமிழக அரசு அறிவித்துள்ளது.