பின்னணிப் பாடகர் எஸ்.பி. பாலசுப்பிரமணியம் உடல்நிலை கவலைக்கிடமாக உள்ளதாக மருத்துவமனைத் தரப்பில் தெரிவிக்கப்பட்ட நிலையில் நடிகர் கமல்ஹாசன் நேரில் வருகை தந்தார்.
கரோனா தொற்று காரணமாக கடந்த ஆகஸ்ட் மாதம் 5-ஆம் தேதி சென்னையில் உள்ள தனியார் மருத்துவமனையில் பின்னணிப் பாடகர் எஸ்.பி.பாலசுப்பிரமணியம் அனுமதிக்கப்பட்டார். தொடர்ந்து சிகிச்சையில் இருந்த அவரின் உடல்நிலையில் முன்னேற்றம் உள்ளதாக அவரின் மகன் பாடகர் சிபிசரண் கடந்த சில தினங்களுக்கு முன் உறுதிப்படுத்தியிருந்தார்.
கடந்த சில நாள்களாக எஸ்.பி.பி.யின் உடல்நிலையில் முன்னேற்றம் ஏற்பட்டு வந்த நிலையில் தற்போது அவரது உடல்நிலை மீண்டும் கவலைக்கிடமாகியுள்ளதாக மருத்துவமனை நிர்வாகம் வியாழக்கிழமை தெரிவித்திருந்தது.
இந்நிலையில் பிரபல நடிகர் கமல்ஹாசன் எஸ்.பி.பி.யின் உடல்நிலைக் குறித்து விசாரிக்க அவர் சிகிச்சை பெறும் தனியார் மருத்துவமனைக்கு நேரில் வருகை தந்தார். தொடர்ந்து மருத்துவர்களிடம் கேட்டறிந்த கமல்ஹாசன் செய்தியாளர்களிடம், “உயிர்காக்கும் கருவிகள் மூலம் சிகிச்சை அளிக்கப்பட்டு வருகிறது. அவர்கள் நம்பும் இறைவனை வேண்டிக் கொண்டிருக்கிறார்கள். நலமாக உள்ளார் என சொல்ல முடியாது. கவலைக்கிடமான நிலையில் உள்ளார்.” எனத் தெரிவித்தார்.