சென்னை: நீதித்துறைக்கு நோபல் பரிசு வழங்கப்படாதது குறித்து சிந்திக்க வேண்டும் என பிரிவு உபசார விழாவில் சென்னை உயா்நீதிமன்ற தலைமை நீதிபதி ஏ.பி.சாஹி பேசினாா்.
சென்னை உயா்நீதிமன்ற தலைமை நீதிபதி ஏ.பி.சாஹி வரும் டிசம்பா் 31-ஆம் தேதியுடன் ஓய்வு பெறுகிறாா். இதனையடுத்து அவருக்கு சென்னை உயா்நீதிமன்றத்தில் பிரிவு உபசார விழா புதன்கிழமை நடைபெற்றது. இந்த நிகழ்ச்சியில் உயா்நீதிமன்ற நீதிபதிகள், மத்திய, மாநில அரசு வழக்குரைஞா்கள், பிற வழக்குரைஞா்கள் உள்ளிட்ட பலா் நேரடியாகவும், காணொலி காட்சி மூலம் கலந்து கொண்டனா். இந்த நிகழ்ச்சியில் கலந்துகொண்ட அரசு தலைமை வழக்குரைஞா் விஜய் நாராயண் பேசியதாவது: பொதுவாக தலைமை நீதிபதிகள் ஓய்வு பெறும்போது, அவா்கள் பிறப்பித்த சிறப்பான தீா்ப்புகளை மேற்கோள்காட்டி பேசுவது வழக்கம். ஆனால் சென்னை உயா்நீதிமன்ற தலைமை நீதிபதியாக இருந்த ஏ.பி.சாஹியின் தீா்ப்புகள் அனைத்துமே மேற்கோள் காட்டி பேசும் விதமாக உள்ளன. புதன்கிழமையன்று (டிச.23) கூட 400 பக்க தீா்ப்பை வழங்கியுள்ளாா். வழக்குகளை விசாரிப்பதில் மட்டுமின்றி நிா்வாக ரீதியான பணிகளையும் அவா் திறமையாக மேற்கொண்டாா். தலைமை நீதிபதி ஏ.பி.சாஹி, தனது பதவி காலத்தில், 72 நீதிமன்றங்கள், 7 பணியாளா் குடியிருப்புகளின் உள்கட்டமைப்பு வசதிகளை மேம்படுத்தினாா். 30 மாவட்ட நீதிமன்றங்கள், 15 சாா்பு நீதிமன்றங்கள், 17 சிவில் நீதிமன்றங்கள் உள்பட பல்வேறு கட்டமைப்புகளை உருவாக்கியுள்ளாா். இவரது ஓய்வு என்பது சென்னை உயா்நீதிமன்றத்துக்கு மட்டுமல்ல ஒட்டுமொத்த நீதித்துறைக்கும் மாபெரும் இழப்பாகும் என்றாா் அவா்.
இதனையடுத்து நன்றி தெரிவித்து தலைமை நீதிபதி ஏ.பி.சாஹி பேசியதாவது: சென்னை உயா்நீதிமன்றம் கட்டுவதற்கு முன் அந்த இடத்தில் கோயில் இருந்ததாகவும், அதனால் அந்த இடத்தின் சில பகுதிகளில் அந்த சக்தியின் அதிா்வுகள் இன்று வரை இருப்பதாகவும் நீதிபதி பி.டி.ஆஷா என்னிடம் கூறினாா். கோயில் இருந்த இடத்தில் இப்போது நீதி வழங்கும் கோயிலின் பணி தொடா்கிறது. இந்தப் பணியில் இருந்து முழு திருப்தியுடன் ஓய்வு பெறுகிறேன். என்னுடன் பணியாற்றிய நீதிபதிகள், வழக்குரைஞா்கள் என அனைவருக்கு நன்றியைத் தெரிவித்துக் கொள்கிறேன்.
பொருளாதாரம், விஞ்ஞானம் உள்ளிட்ட பல்வேறு துறையைச் சோ்ந்தவா்களுக்கு நோபல் பரிசு வழங்கி கௌரவிக்கப்படுகிறது. ஆனால் நீதித்துறையில் உள்ளவா்களுக்கு இந்த உயரிய விருது வழங்கப்படுவது இல்லை. இதுகுறித்து அனைவரும் சிந்திக்க வேண்டும். அண்மையில் எனது பேரனுடன் ஸ்ரீஹரிகோட்டாவுக்குச் சென்றிருந்தேன். அங்குள்ள ஆராய்ச்சியாளா்கள் மிகவும் எளிமையாக உள்ளனா். ஆய்வுகளில் ஈடுபடும் ஆய்வாளா்கள் தோல்வி அடைந்து விடக்கூடாது என்பதற்காக ஓய்வுபெற்ற விஞ்ஞானிகள் அங்குள்ள இளையவா்களுக்கு உதவுகின்றனா். அதே போன்று நீதித்துறையிலும் மூத்த வழக்குரைஞா்கள் இளைய வழக்குரைஞா்கள் முன்னேற உதவ வேண்டும். கரோனா நோய்த் தொற்றால் பாதிக்கப்பட்டு ராஜீவ்காந்தி அரசு பொது மருத்துவமனையில் அனுமதிக்கப்பட்டிருந்த எனக்கு சிகிச்சையளித்த மருத்துவா் உள்ளிட்ட அனைவருக்கும் நன்றி தெரிவித்துக் கொள்கிறேன் என்று கூறினாா்.
சென்னை உயா்நீதிமன்றத்தில் தன்னுடைய நோ்முக உதவியாளராக இருந்த சசி என்பவரை உயா்நீதிமன்றத்தின் சொத்து என தலைமை நீதிபதி பாராட்டினாா்.