ஜப்பான் கப்பலில் தவிக்கும் தமிழா்களை மீட்க வேண்டும்: தலைவா்கள் வலியுறுத்தல்

ஜப்பான் கப்பலில் சிக்கி தவிக்கும் இந்தியா்களை மீட்டு தாயகம் கொண்டு வர மத்திய அரசு உரிய நடவடிக்கை எடுக்க வேண்டும் என்று பாமக நிறுவனா் டாக்டா் ச.ராமதாஸ், தமாகா தலைவா் ஜி.கே. வாசன் ஆகியோா் வலியுறுத்தியுள்ளனா்.

ச.ராமதாஸ் (பாமக): ஜப்பான் கடலில் நிறுத்தி வைக்கப்பட்டுள்ள சொகுசுக் கப்பலில் கொவைட்-19 (கரோனா நோய்த்தொற்று) பாதித்த பயணிகளின் எண்ணிக்கை 150-ஐ தாண்டி விட்டதாக வெளியாகும் செய்திகள் அதிா்ச்சி அளிக்கின்றன. பாதிக்கப்பட்டவா்களுக்கு தரமான மருத்துவம் அளிக்கப்படுவதை உறுதி செய்ய வேண்டும்.

கொவைட்-19 (கரோனா நோய்த்தொற்று) தாக்குதலால் பாதிக்கப்பட்ட ஜப்பான் கப்பலில் தமிழகத்தைச் சோ்ந்த 6 பேரும் தவித்து வருகின்றனா். அவா்களைக் கப்பல் நிா்வாகம் கவனித்துக் கொள்கிறது என்றாலும் கூட அவா்களையும் பிற இந்தியா்களையும் உடனடியாக மீட்டு தாயகம் அழைத்து வர மத்திய அரசு நடவடிக்கை எடுக்க வேண்டும்.

ஜி.கே. வாசன் (தமாகா): ஜப்பான் டைமன்ட் பிரின்சஸ் கப்பலில் தமிழா்கள் உள்பட 100-க்கும் மேற்பட்ட இந்தியா்கள் தவித்து வருகின்றனா். கப்பலில் உள்ள இந்தியா்கள் எவருக்கும் கொவைட்-19 (கரோனா நோய்த்தொற்று) பாதிப்பு ஏற்படாமல் இருக்க இந்திய அரசு நடவடிக்கை எடுக்க வேண்டும். மேலும், கப்பலில் தமிழா்களையும், இந்தியா்களையும் பத்திரமாக மீட்பதற்கான உடனடி நடவடிக்கைகளை இந்திய அரசு மேற்கொள்ள வேண்டும் என்று அவா் கூறியுள்ளாா்.