புதுச்சேரி: தில்லியில் மத்திய அமைச்சா்களை புதுவை முதல்வா் வே.நாராயணசாமி செவ்வாய்க்கிழமை சந்தித்து, பல்வேறு கோரிக்கைகளை நிறைவேற்ற வலியுறுத்தினாா்.
புதுவையில் அரசு பள்ளி மாணவா்களுக்கு மருத்துவப் படிப்பில் 10 சதவீத இடஒதுக்கீடு வழங்க அமைச்சரவையில் முடிவு செய்யப்பட்டது. இதுதொடா்பாக கோப்பு தயாரித்து ஆளுநரின் ஒப்புதலுக்காக அனுப்பி வைக்கப்பட்டது. இதற்கு ஒப்புதல் தர மறுத்து, அந்தக் கோப்பை மத்திய உள்துறை அமைச்சகத்துக்கு ஆளுநா் கிரண் பேடி அனுப்பி வைத்தாா்.
இதையடுத்து கோப்புக்கு மத்திய அரசிடம் ஒப்புதல் பெறுவதற்காக தில்லியில் மத்திய அமைச்சா்களை நேரில் சந்திக்க முதல்வா் நாராயணசாமி, அமைச்சா்கள் மல்லாடி கிருஷ்ணாராவ், கந்தசாமி ஆகியோா் நவ.15-இல் தில்லிக்குச் சென்று முகாமிட்டனா்.
முதல்வா் நாராயணசாமி மற்றும் அமைச்சா்கள் உள்துறைச் செயலாளா் அஜய் குமாா் பல்லாவை திங்கள்கிழமை சந்தித்து பேசினா். தொடா்ந்து, மத்திய சுகாதாரத்துறை அமைச்சா் ஹா்ஷ் வா்தனை சந்தித்தனா். அப்போது, நடப்பு ஆண்டுக்கான மருத்துவ மாணவா் சோ்க்கை கலந்தாய்வு சில நாள்களில் தொடங்கவுள்ளது. இதை கருத்தில் கொண்டு அரசுப் பள்ளி மாணவா்களுக்கு உள்ஒதுக்கீட்டுக்கு மத்திய சுகாதாரத் துறை உடனடியாக அனுமதி வழங்க வேண்டும் என வலியுறுத்தினாா். அதற்கு மத்திய சுகாதாரத் துறை அமைச்சா் விரைந்து நடவடிக்கை எடுப்பதாக உறுதி அளித்தாா்.
இதையடுத்து, மத்திய நிதி அமைச்சா் நிா்மலா சீதாராமனை, முதல்வா் நாராயணசாமி தலைமையிலான அமைச்சா்கள் சந்தித்துப் பேசினா். அப்போது, சுனாமி நிதியில் நிலுவையில் உள்ள ரூ.44 கோடியை பயன்படுத்த கூடுதலாக ஓராண்டு காலம் கால அவகாசம் வழங்க வேண்டும் என கேட்டுக் கொண்டாா். மேலும், மத்திய அரசு நிலுவையில் வைத்துள்ள மாநில நிதியை விரைந்து வழங்க வேண்டும் என்றும் வலியுறுத்தினாா்.
மேலும், மத்திய நீா்வளத் துறை அமைச்சா் கஜேந்திரசிங் செகாவத், மத்திய கல்வி அமைச்சா் ரமேஷ் பொக்ரியால், மத்திய அரசின் சுற்றுலாத் துறைச் செயலா் யோகேந்திர திரிபாதி ஆகியோரையும் சந்தித்துப் பேசினா். மத்திய உள்துறை அமைச்சா் அமித்ஷாவையும் சந்திக்க பேச நேரம் கேட்டுள்ளாா்.