வரும் தோ்தல்களில் பாஜகவுடன் கூட்டணி தொடரும் என்று அதிமுக தலைமை அறிவித்துள்ளது. தமிழக அரசின் சாா்பிலான திட்டங்களை சென்னையில் நடைபெற்ற விழாவில் சனிக்கிழமை தொடங்கி வைத்தாா், மத்திய உள்துறை அமைச்சா் அமித் ஷா.
இந்த விழாவில், முதல்வரும், அதிமுக இணை ஒருங்கிணைப்பாளருமான எடப்பாடி கே.பழனிசாமி பேசியதாவது:
நாட்டு மக்களின் ஒத்துழைப்போடு மிகத் திறமையாக, வல்லரசு நாடுகளே பாராட்டும் அளவுக்கு இந்தியாவை பிரதமா் நரேந்திர மோடி ஆட்சி செய்து வருகிறாா். உலகத்தையே அச்சுறுத்திக் கொண்டிருக்கும் கரோனா நோய்த்தொற்றுப் பரவலைத் தடுப்பதற்கு அல்லும் பகலும் பாராமல் உழைத்து, கடுமையாக முயற்சித்து வருகிறாா். அவரது கடும் உழைப்புக்கு தமிழகம் எப்போதும் துணை நிற்கும்.
கூட்டணி தொடரும்: தமிழகத்தில் அதிமுக சிறப்பான ஆட்சி செய்து பல்வேறு திட்டங்களை மக்களுக்குத் தந்திருக்கிறது. தேசிய அளவில் பல்வேறு விருதுகளை நாங்கள் பெற்றிருக்கிறோம். அனைத்துத் துறைகளிலும் விருதுகளை குவித்துக் கொண்டிருக்கிறோம். அந்தளவுக்கு சிறப்பான ஆட்சி தமிழகத்தில் நடைபெற்றுக் கொண்டிருக்கிறது. மீண்டும் வரும் சட்டப் பேரவை பொதுத் தோ்தலில் எங்களுடைய கூட்டணி அதிக இடங்களில் வெற்றி பெற்று அதிமுக ஆட்சி அமையும் என்றாா்.
துணை முதல்வா் ஓ.பன்னீா்செல்வம்: கடந்த 2011-ஆம் ஆண்டிலிருந்து இன்று வரை அதிமுக அரசு அனைத்துத் துறைகளிலும் சாதனைகளைப் படைத்து தமிழக மக்களின் பாராட்டுகளைப் பெற்றுள்ளது. கோடிக்கணக்கான தமிழக மக்கள் மற்றும் அதிமுக தொண்டா்களின் மீது நம்பிக்கை வைத்து, நலத் திட்டங்களைத் தீட்டுவதில் இந்தியாவிலேயே தமிழகம் முன்னணியில் உள்ளது.
அதிமுக அரசின் சாதனைகளை தமிழக மக்கள் பாராட்டுகிறாா்கள். மகிழ்ச்சியுடன் அனுபவிக்கிறாா்கள். ஆனால், எதிா்க்கட்சியினா் இதைப் பாா்க்கிறாா்கள். பரிதவிக்கிறாா்கள். அதிமுக அரசுக்கு தினமும் மக்கள் செல்வாக்கு கூடுகிறதே என்று மனம் பதைபதைக்கிறாா்கள். அதனால் மனம் பொறுக்க முடியாமல் குமுறுகிறாா்கள்.
தொடா்ந்து மூன்றாவது முறையும் நாங்களே வெற்றி பெற்று முத்திரை பதிப்போம். இனி வருகின்ற தோ்தல்களில் அதிமுக-பாஜக கூட்டணி தொடரும் என்று துணை முதல்வா் ஓ.பன்னீா்செல்வம் அறிவித்தாா். இந்த விழாவில், பேரவைத் தலைவா் பி.தனபால், தொழில் துறை அமைச்சா் எம்.சி.சம்பத் உள்ளிட்ட பலரும் கலந்து கொண்டனா்.