தோ்தல் வியூகம்: அமித் ஷாவுடன் ஓபிஎஸ் - இபிஎஸ் ஆலோசனை

சட்டப் பேரவைத் தோ்தல் வியூகம் வகுப்பது குறித்து உள்துறை அமைச்சா் அமித் ஷாவுடன் அதிமுக ஒருங்கிணைப்பாளா் ஓ.பன்னீா்செல்வம், இணை ஒருங்கிணைப்பாளா் எடப்பாடி பழனிசாமி ஆகியோா் சனிக்கிழமை 40 நிமிஷங்களுக்கு ஆலோசனை நடத்தினா்.

முன்னதாக கலைவாணா் அரங்கில் சனிக்கிழமை நடைபெற்ற நிகழ்ச்சியில் அதிமுக ஒருங்கிணைப்பாளரும் துணை முதல்வருமான ஓ.பன்னீா்செல்வம் பேசும்போது, வரும் சட்டப்பேரவைத் தோ்தலிலும் பாஜகவுடன் கூட்டணி தொடரும் என்று அறிவித்தாா். அதே போல் அதிமுகவின் இணை ஒருங்கிணைப்பாளரும், முதல்வருமான எடப்பாடி பழனிசாமி பேசும்போதும், பாஜகவுடன் கூட்டணி தொடரும் என்றும் அறிவித்தாா்.

இந்தக் கூட்டத்தைத் தொடா்ந்து லீலா பேலஸ் ஹோட்டலில் அமித் ஷாவை ஓ.பன்னீா்செல்வம், எடப்பாடி பழனிசாமி, அமைச்சா் டி.ஜெயக்குமாா், நாடாளுமன்ற உறுப்பினா் ரவீந்திரநாத் ஆகியோா் சந்தித்துப் பேசினாா். அமித்ஷாவுடன் பாஜக தேசிய பொதுச் செயலாளா் சி.டி. ரவி உடனிருந்தாா்.

இந்தச் சந்திப்பு சுமாா் 40 நிமிஷங்களுக்கு மேலாக நீடித்தது.

சந்திப்பின்போது தொகுதிப் பங்கீடு குறித்து ஆலோசிக்கப்பட்டுள்ளது. மக்களவைத் தோ்தலில் அதிமுக கூட்டணியில் பாஜக 5 தொகுதிகளில் போட்டியிட்டது. தற்போது சட்டப்பேரவைத் தோ்தலில் போட்டியிட அதிமுகவிடம் 30 தொகுதிகளுக்கு மேல் பாஜக கேட்டு வருகிறது. இது தொடா்பாக கூட்டத்தில் ஆலோசிக்கப்பட்டது.

தமிழக சட்டப்பேரவைத் தோ்தல் வியூகம் குறித்தும் ஆலோசிக்கப்பட்டுள்ளது. திமுக கூட்டணியைத் தோற்கடிப்பதற்கான வழிவகைகள் என்னென்ன என்பது குறித்தும் கூட்டத்தில் ஆராயப்பட்டுள்ளது.

பாஜக நிா்வாகிகளுடன் ஆலோசனை: தமிழக சட்டப்பேரவைத் தோ்தல் குறித்தும் பாஜக நிா்வாகிகளுடன் அமித்ஷா ஆலோசனை நடத்தினாா். முதல் கட்டமாக மாநில நிா்வாகிகளுடன் ஆலோசனை நடைபெற்றது. அதைத் தொடா்ந்து உயா்நிலைக்குழு உறுப்பினா்களுடன் அவா் ஆலோசனை நடத்தினாா்.