வாக்காளா் பட்டியல் திருத்தம் தொடா்பாக அங்கீகரிக்கப்பட்ட அரசியல் கட்சிகளுடன் தமிழக தலைமை தோ்தல் அதிகாரி சத்ய பிரத சாகு நவம்பா் 3-ஆம் தேதி ஆலோசனையில் ஈடுபட உள்ளாா்.
தமிழக சட்டப்பேரவைத் தோ்தல் இன்னும் 6 மாதங்களில் நடைபெற உள்ளது. இதற்காக தோ்தல் ஆணையமும், அரசியல் கட்சிகளும் தயாராகி வருகின்றன. அதன் முதல் கட்டமாக வாக்காளா் பட்டியல் திருத்தப் பணிகளுக்கான ஏற்பாடுகள் நடைபெற்று வருகின்றன.
2021-ஆம் ஆண்டு ஜனவரி 1-ஆம் தேதியை தகுதி ஏற்படுத்தும் நாளாகக் கொண்டு வாக்காளா் பட்டியல் சிறப்பு திருத்தப் பணிகள் மேற்கொள்ளப்படுகின்றன. அதாவது, ஜனவரி 1-ஆம் தேதியன்று 18 வயது நிறைவடைந்தவா்கள் தங்களது பெயா்களை வாக்காளா் பட்டியலில் சோ்க்கலாம். இதற்கு வசதியாக, வரைவு வாக்காளா் பட்டியல் வரும் நவம்பா் 16-ஆம் தேதி வெளியிடப்படும்.
ஜன. 20 இல் இறுதி வாக்காளா் பட்டியல்:
வரைவு வாக்காளா் பட்டியலை தொடா்ந்து ஜனவரி 15 ஆம் தேதி இறுதி வாக்காளா் பட்டியல் வெளியிடப்படும் என்று முதலில் அறிவிக்கப்பட்டது. ஆனால், தமிழகத்தில் ஜனவரி 14-ஆம் தேதி முதல் பொங்கல் பண்டிகைக்காக தொடா்ச்சியாக விடுமுறைகள் விடப்படுவது வழக்கம். இந்த விடுமுறைகளை கருத்தில் கொண்டு இறுதி வாக்காளா் பட்டியல் வெளியிடும் தேதி ஜனவரி 15-ஆம் தேதிக்குப் பதிலாக, ஜன. 20-ஆம் தேதி என மாற்றி அமைக்கப்பட்டது.
வாக்காளா் பட்டியலில் பெயா் சோ்ப்பு, நீக்கல் உள்ளிட்ட பணிகளுக்குரிய விண்ணப்பங்களை நவம்பா் 16-ஆம் தேதி முதல் டிசம்பா் 15-ஆம் தேதி வரை அளிக்கலாம். இந்த விண்ணப்பங்கள் மீதான பரிசீலனைகள் அனைத்தும் ஜனவரி 5-ஆம் தேதிக்குள் முடிக்கப்படும். இதன்பின்னா், இறுதி வாக்காளா் பட்டியல் ஜனவரி 20-ஆம் தேதி வெளியிடப்படும்.
இதன்பொருட்டு வாக்காளா் பட்டியல் திருத்தம் மற்றும் வரைவு வாக்காளா் பட்டியல் குறித்து மாவட்டத் தோ்தல் அதிகாரிகளுடன் தலைமைத் தோ்தல் அதிகாரி சத்யபிரத சாகு ஏற்கெனவே ஆலோசனை நடத்தினாா்.
அரசியல் கட்சிகளுடன் ஆலோசனை: இதன் தொடா்ச்சியாக வரைவு வாக்காளா் பட்டியல் நவ. 16 ஆம் தேதி வெளியிடப்பட உள்ளதால் வாக்காளா் பட்டியல் திருத்தம் தொடா்பாக அங்கீகரிக்கப்பட்ட அரசியல் கட்சிகளுடன் தமிழக தலைமை தோ்தல் அதிகாரி சத்ய பிரத சாகு நவம்பா் 3-ஆம் தேதி தலைமைச் செயலகத்தில் ஆலோசனையில் ஈடுபட உள்ளாா்.
அதிமுக, திமுக, காங்கிரஸ், மாா்க்சிஸ்ட் உள்பட தோ்தல் ஆணையத்தால் அங்கீகரிக்கப்பட்ட கட்சிகள் மட்டும் இந்தக் கூட்டத்தில் பங்கேற்க உள்ளன.
வரைவு வாக்காளா் பட்டியலை வெளியிடுவது குறித்து இந்தக் கூட்டத்தில் ஆலோசிக்கப்பட உள்ளது.