சொத்து வரிக்கான ஊக்கத்தொகையை 10 சதவீதமாக உயா்த்த வேண்டும் என்று சென்னை மாநகராட்சிக்கு மு.க.ஸ்டாலின் வேண்டுகோள் விடுத்துள்ளாா். இது தொடா்பாக சனிக்கிழமை அவா் வெளியிட்ட அறிக்கை:
ஒவ்வோா் அரையாண்டும் முடிந்து 15 தினங்களுக்குள் சொத்து வரி செலுத்துவோருக்கு 5 சதவீதம் ஊக்கத் தொகை என்றும் அப்படிச் செலுத்தத் தவறினால் 16-ஆவது நாளில் இருந்து 2 சதவீதம் அபராதம் வசூலிக்கப்படும் என்றும், சென்னை மாநகராட்சி அறிவித்துள்ளது. இது வலது கையால் ஒரு சலுகையைக் கொடுத்து விட்டு, இடது கையால் அதைப் பறித்துக் கொள்வது போல் அமைந்திருக்கிறது.
கரோனா பேரிடா் காலத்தில் சென்னை மாநகரமே ஸ்தம்பித்து, மக்கள் தங்கள் வாழ்வாதாரத்திற்குச் சிரமப்பட்டு வருகின்றனா். இதுபோன்ற சூழலில், முதல் அரையாண்டு சொத்து வரியை ஏப்ரல் 1 முதல் 15 தேதிக்குள்ளோ, இரண்டாவது அரையாண்டு வரியை அக்டோபா் 1 முதல் 15 தேதிக்குள்ளோ கட்டவில்லை என்றால், அவா்களுக்கு ஊக்கத்தொகை இல்லை என்பதும், அதுமாதிரி செலுத்தத் தவறியவா்கள் அபராதம் செலுத்த வேண்டும் என்பதும், சிறிதும் ஏற்றுக் கொள்ளக் கூடியது அல்ல.
எனவே, கரோனா பேரிடா் பாதிப்புகளை மனதில் வைத்து, ஒவ்வொரு அரையாண்டுக்கும் ஊக்கத் தொகை அளிக்க வழங்கப்பட்டிருக்கும் 15 நாள்கள் கால அவகாசத்தை, குறைந்த பட்சம் 45 நாள்களாக உயா்த்தி, அரையாண்டு வரி ரூ.5 ஆயிரத்துக்குள் செலுத்துவோருக்கு இந்த ஊக்கத் தொகையை 10 சதவீதமாக அதிகரிக்க வேண்டும். அதேபோல் தற்போதுள்ள 2 சதவீத அபராதத் தொகையை அரை சதவீதமாகக் குறைத்திட வேண்டும் அல்லது அறவே ரத்து செய்திட வேண்டும் என்று அவா் கூறியுள்ளாா்.