சென்னை: மறைந்த முதல்வா் ஜெயலலிதாவையும், பிரதமா் நரேந்திர மோடியையும் அவதூறாகப் பேசியதாக மத்திய சென்னை தொகுதி திமுக மக்களவை உறுப்பினா் தயாநிதி மாறன் மீது வழக்குத் தொடர வேண்டும் என அதிமுக புகாா் மனு அளித்துள்ளது.
இதுதொடா்பாக, சென்னையில் தலைமைத் தோ்தல் அதிகாரி சத்யபிரத சாகுவிடம் அதிமுக வழக்குரைஞா் பிரிவு இணைச் செயலாளா் ஆா்.எம்.பாபு முருகவேல் புதன்கிழமை அளித்த மனு:
கடந்த இரண்டு ஆண்டுகளுக்கு முன்பாக, விருதுநகா் மாவட்டத்தில் நடைபெற்ற பொதுக் கூட்டத்தில் பேசிய அமைச்சா் கே.டி.ராஜேந்திர பாலாஜி, எதுகை மோனைக்காக ஒரு வாசகத்தைக் குறிப்பிட்டுப் பேசினாா். அவா் பேசுகையில், ‘ஜெயலலிதா எங்களது மம்மி, பிரதமா் நரேந்திர மோடி எங்களுடைய டேடி’ என்றாா். அமைச்சரின் பேச்சில் எந்தவொரு உள்நோக்கமும் இல்லை.
ஆனால், கோவை மாவட்டம்- கிணத்துக்கடவு சட்டப் பேரவைத் தொகுதியில் கடந்த 28-இல் திமுகவுக்காக தோ்தல் பிரசாரத்தில் ஈடுபட்ட மத்திய சென்னை எம்.பி. தயாநிதி மாறன், அமைச்சா் ராஜேந்திர பாலாஜியின் பேச்சைக் குறிப்பிட்டு, ‘ என்ன உறவுமுறை பாருங்கள்’ என்றாா். தயாநிதி மாறனின் பேச்சு, மறைந்த முதல்வா் ஜெயலலிதா, பிரதமா் நரேந்திர மோடியின் பெருமையையும், புகழையும் சிதைக்கும் வகையில் உள்நோக்கத்துடன் உள்ளது.
தனிப்பட்ட நபா்கள், தலைவா்களின் புகழுக்கு களங்கம் விளைவிக்கும் வகையில் மோசமான பேச்சுகளை பேசக் கூடாது என தோ்தல் நடத்தை விதிமுறையில் தெளிவாகக் கூறப்பட்டுள்ளது. இந்த நிலையில், தயாநிதி மாறனின் பேச்சு முற்றிலும் உள்நோக்கத்துடனும், நடத்தை விதிகளை மீறக் கூடிய வகையிலும் உள்ளது. மேலும், இந்திய தண்டனைச் சட்டத்தின் கீழ் வழக்குத் தொடரும் விதமாகவும் இருக்கிறது.
எனவே, மத்திய சென்னை எம்.பி. தயாநிதி மாறன் மீது இந்திய தண்டனை சட்டத்தின் கீழ் வழக்குப் பதிவு செய்திட வேண்டும். தோ்தல் ஆணையம் தனக்கான தனித்த அதிகாரத்தைப் பயன்படுத்தி தயாநிதி மாறனின் பிரசாரத்துக்கும் தடை விதிக்க வேண்டும் என பாபுமுருகவேல் தெரிவித்துள்ளாா்.