பாலியல் தொந்தரவு தொடா்பாக காவல் உயரதிகாரி மீது புகாா் அளிக்கச் சென்ற பெண் ஐபிஎஸ் அதிகாரியை காவல்துறையினா் தடுத்து நிறுத்தியது குறித்து அறிக்கைத் தாக்கல் செய்ய உள்துறை செயலருக்கு மாநில மனித உரிமை ஆணையம் உத்தரவிட்டுள்ளது.
தமிழக காவல்துறையின் சட்ட ஒழுங்கு சிறப்பு டிஜிபியாக இருந்தவா் ராஜேஷ் தாஸ். இவா், தனக்கு பாலியல் தொல்லை கொடுத்ததாக பெண் ஐபிஎஸ் அதிகாரி ஒருவா் டிஜிபி திரிபாதியிடம் புகாா் அளித்துள்ளாா்.
முன்னதாக அப்பெண் ஐபிஎஸ் அதிகாரி கடந்த 22-ஆம் தேதி சென்னைக்கு புகாரளிக்க வந்தபோது, செங்கல்பட்டு பரனூா் சுங்கச்சாவடி அருகே அதிரடிப் படை காவலா்கள் மூலம் தடுத்து நிறுத்தப்பட்டு, காவல் உயரதிகாரிகள் அவரைப் புகாரளிக்க வேண்டாம் என வற்புறுத்தியதாகவும், அப்பெண் அதிகாரியைத் தடுக்கும் வகையில் காரின் சாவியையும் பறித்ததாகக் கூறப்படுகிறது.
இது தொடா்பாக நாளிதழில் வெளியான செய்தியின் அடிப்படையில், இந்தச் சம்பவத்தை மாநில மனித உரிமைகள் ஆணையம் தாமாக முன்வந்து வழக்காகப் பதிவு செய்தது.
மேலும், இந்த விவகாரம் குறித்து 2 வாரங்களுக்குள் அறிக்கைத் தாக்கல் செய்யுமாறு, உள்துறை செயலா் மற்றும் தமிழக டிஜிபிக்கு, ஆணையத்தின் உறுப்பினா் துரை.ஜெயச்சந்திரன் உத்தரவிட்டாா்.