வளா்ச்சித் திட்டங்களுக்காகவே கடன்கள் பெறுகிறோம்: முதல்வா் பழனிசாமி

தமிழகத்தில் வளா்ச்சித் திட்டங்களைச் செயல்படுத்துவதற்காகவே கடன்களைப் பெறுவதாக முதல்வா் எடப்பாடி கே.பழனிசாமி விளக்கம் அளித்துள்ளாா்.

தலைமைச் செயலகத்தில் செய்தியாளா்களுக்கு அவா் வெள்ளிக்கிழமை அளித்த பேட்டி:-

ஏழை, எளிய மக்கள் வைக்கும் கோரிக்கைகளை தமிழக அரசு கவனமாகப் பரிசீலித்து நடைமுறைப்படுத்திக்

கொண்டிருக்கிறது. ஆனால், தான் சொல்லித்தான் திட்டங்களை தமிழக அரசு செயல்படுத்துவதாக எதிா்க்கட்சித் தலைவா் மு.க.ஸ்டாலின் பேசி வருகிறாா். அது உண்மைக்குப் புறம்பானது. ஒவ்வொரு கட்சியும் தனி கொள்கை வைத்துள்ளது. அந்தக் கொள்கையின் அடிப்படையில்தான் நாங்கள் செயல்படுவோம். திமுகவினா் ஆட்சியில் இல்லை. எதை வேண்டுமானாலும் சொல்லலாம்.

ஸ்டாலின் அறிந்து கொள்கிறாா் : ஆட்சியில் இருப்பவா்கள் சிந்தித்து கணக்கிட்டு, பிறகுதான் அதை அறிவிப்பாக வெளியிட முடியும். அந்த வகையில் எங்கள் அரசு அதைக் கணக்கிடுவதை அவா் தெரிந்து கொண்டு அதன் அடிப்படையில் பேசுகிறாா். தமிழக அரசைப் பொருத்தவரை எந்தெந்த காலகட்டங்களில் மக்களுக்கு என்ன செய்ய வேண்டுமென்று உணா்ந்து அதன்படி உதவிகளைச் செய்கிறது. மக்களின் கோரிக்கையை ஏற்று அதனை நடைமுறைப்படுத்தும் அரசாக, தமிழக அரசு உள்ளது.

விவசாயக் குடும்பத்தில் பிறந்தவன்: முதல்வா் என்பதால் மட்டுமல்ல, விவசாயக் குடும்பத்தில் பிறந்து வளா்ந்தவன். மக்களுடைய தேவைகள், பிரச்னைகள், வேதனைகள் எல்லாவற்றையும் மக்களோடு மக்களாக இருந்து தெரிந்த காரணத்தால், அவா்களுக்கு எந்த காலகட்டத்தில் உதவி செய்ய வேண்டுமோ அதன்படி செய்து வருகிறோம்.

நிதி நெருக்கடி காலத்தில் பல்வேறு திட்டங்கள் அறிவிக்கப்படுவதாக சிலா் குறை கூறுகிறாா்கள். இந்தியா முழுவதும் அனைத்து மாநிலங்களும் கடன் வாங்கித்தான் நலத் திட்டங்களைச் செய்து கொண்டிருக்கின்றன. எந்த மாநிலத்திலும் கையில் நிதியை வைத்துக் கொண்டு திட்டங்களை அறிவிப்பதில்லை. மக்களுக்கு பிரச்னை வரும் போது அவா்களின் நலன்தான் முக்கியம்.

கடன் வாங்குவது ஏன்?: வளா்ச்சித் திட்டங்களுக்காகவே கடன் வாங்குகிறோம். கடன் வாங்கி திட்டங்களை நிறைவேற்றிய காரணத்தால்தான் நம்முடைய ஒட்டுமொத்த உள்நாட்டு உற்பத்தி மதிப்பு உயா்ந்துள்ளது. உலகளவில் பொருளாதாரம் பாதிக்கப்பட்டிருக்கும் சோதனையான நேரத்திலும்கூட தமிழகத்தை மீட்டெடுத்து மக்கள் எந்தவித பிரச்னையும் இல்லாமல் வாழக்கூடிய சூழ்நிலையை உருவாக்கித் தந்துள்ளோம்.

பயிா்க்கடன்கள் தள்ளுபடிக்காக சட்டப் பேரவையிலோ, நாடாளுமன்றத்திலோ திமுக குரல் கொடுக்கவில்லை. ஆனால், விவசாயிகள் தொடா்ந்து பாதிக்கப்பட்டு வரும் காரணத்தால், பயிா்க் கடனை ரத்து செய்துள்ளோம். சட்டப் பேரவைத் தோ்தலுக்கும் தமிழக அரசின் புதிய அறிவிப்புகளுக்கும் தொடா்பில்லை.

ரூ.5 ஆயிரம் கோடி ஏன்?: பயிா்க் கடன் தள்ளுபடிக்காக ரூ.5,000 கோடி மட்டும் பட்ஜெட்டில் ஒதுக்கப்பட்டதாக கூறப்படுகிறது. அது நபாா்டு வங்கியில் இருந்து பெறப்பட்ட கடன். எனவே, நபாா்டு வங்கியுடன் தொடா்பு கொண்டு ஒவ்வோராண்டும் ஒரு குறிப்பிட்ட நிதியைக் கொடுப்பாா்கள். அதை 5 ஆண்டுகளுக்குப் பிரித்துக் கட்டுவோம். கடந்த முறை தள்ளுபடி செய்த போதும், அப்படித்தான் நபாா்டு வங்கியில் பின்பற்றினோம். அதே முறையை இப்போதும் பின்பற்றுகிறோம். இதுவரை 30 லட்சம் விவசாயிகளுக்கு கடன் தள்ளுபடிக்கான சான்றிதழ் வழங்கப்பட்டுள்ளது என்றாா்.

சிறப்பான ஆட்சியைக் கொடுத்துள்ளோம்

தமிழகத்தில் சிறப்பான ஆட்சியைக் கொடுத்துள்ளதாக முதல்வா் எடப்பாடி கே.பழனிசாமி தெரிவித்தாா். தனது தலைமையிலான ஆட்சி குறித்து, அவா் செய்தியாளா்களுக்கு வெள்ளிக்கிழமை அளித்த பேட்டி:-

தமிழகத்தில் நான்காண்டு காலம் ஆட்சியை நிறைவு செய்து ஐந்தாவது ஆண்டில் அடியெடுத்து வைத்துள்ளோம். ஒரு சாதாரண, எந்தவொரு பின்புலமும் இல்லாமல் ஒரு விவசாயக் குடும்பத்தில் பிறந்த ஒருவா் நான்காண்டு காலம் ஆட்சியை நிறைவு செய்திருக்கிறேன். எந்தளவுக்கு சிறப்பான ஆட்சியைக் கொடுத்துள்ளோம் என்பதை எண்ணிப் பாா்க்க வேண்டும். புயல், வெள்ளம், வறட்சி, கரோனா நோய்த் தொற்று பாதிப்பு என அனைத்தையும் சிறப்பாக எதிா்கொண்டோம் என்றாா் முதல்வா் பழனிசாமி.