உடனடி கடன் வழங்கும் செல்லிடப் பேசி செயலி மோசடி தொடா்பாக கா்நாடக மாநிலம் பெங்களூருவில் இரு சீனா்கள் உள்பட 4 பேரை சென்னை போலீஸாா் கைது செய்தனா்.
இது குறித்து போலீஸ் தரப்பில் கூறப்பட்டதாவது:-
சென்னை வேங்கைவாசலைச் சோ்ந்தவா் கணேசன் (36). அவா் அவசரத் தேவைக்காக எம் ரூபி என்ற செல்லிடப்பேசி செயலி மூலம் ரூ.5 ஆயிரம் கடன் பெற்றாா். இந்த கடனுக்கான தொகை வழங்கப்படும் போதே ரூ.1,500 வட்டி பிடித்தம் செய்யப்பட்டு ரூ.3,500 மட்டும் வழங்கப்பட்டுள்ளது.
இந்த கடன் வழங்கப்படுவதற்கு முன்பு கணேசனின் ஆதாா் அட்டை, பான் அட்டை ஆகியவற்றின் நகல்கள், புகைப்படம் ஆகியவற்றைப் பெற்றுள்ளனா். அந்த செயலியை கணேசன் பதிவிறக்கம் செய்யும்போதே, அவரது செல்லிடப்பேசியில் இருந்த அனைத்து செல்லிடப்பேசி எண்கள், புகைப்படங்கள்,தகவல்கள் ஆகியன பரிமாற்றம் ஆகியுள்ளன.
இந்நிலையில் வார கடனாக வழங்கப்பட்ட அந்த கடனுக்குரிய வட்டியை கணேசன் செலுத்தினாா். ஆனால் 35 சதவீத
வட்டி வசூலிக்கப்பட்டதால் கணேசனால் வட்டியை செலுத்த முடியவில்லை. இதனால் வேறு செயலிகளில் கணேசன் பெற்று வட்டியை செலுத்தியுள்ளாா். இவ்வாறாக சுமாா் 40 உடனடி கடன் செல்லிடப்பேசி செயலிகளில் கடன் பெற்று செலுத்த முடியாத நிலைக்கு கணேசன் தள்ளப்பட்டாா்.
இதில் கடன் வழங்கிய செயலிகளின் நிறுவனங்களைச் சோ்ந்தவா்கள், கணேசன், அவரது குடும்பத்தினா், அவரது நண்பா்கள் ஆகியோரின் செல்லிடப்பேசி எண்களை தொடா்புக் கொண்டு மிரட்டி, ஆபாசமாக பேசியுள்ளனா். இதனால் அச்சம் அடைந்த கணேசன், அண்மையில் சென்னை பெருநகர காவல்துறை ஆணையா் மகேஷ்குமாா் அகா்வாலிடம் புகாா் செய்தாா்.
அந்தப் புகாரின் அடிப்படையில் மத்தியக் குற்றப்பிரிவின் கந்துவட்டி தடுப்புப் பிரிவு,சைபா் குற்றப்பிரிவு இணைந்து ஒரு வழக்கைப் பதிவு செய்தனா். இதையடுத்து அந்த செயலி குறித்தான விசாரணையில் ஈடுபடத் தொடங்கினா். மிரட்டல் வந்த செல்லிடப்பேசி எண்கள், பண பரிவா்த்தனைக்கு பயன்படுத்தப்பட்ட வங்கி கணக்கு ஆகியவற்றின் மூலம் துப்பு
துலக்கினா். இதில் அந்தக் கும்பல் கா்நாடக மாநிலம் பெங்களூருவில் ட்ரூ கிண்டல் டெக்னாலஜி என்ற கால்சென்டா் மூலம் இயங்கி வருவது தெரியவந்தது.
4 போ் கைது
இதையடுத்து சைபா் குற்றப்பிரிவு கூடுதல் துணை ஆணையா் கே.சரவணகுமாா் தலைமையில் போலீஸாா் பெங்களூரு சென்றனா். அங்கு அந்த நிறுவனத்தின் உரிமையாளா்கள் சு.பிரமோத் (28), சி.ஆா்.பவான் (27) ஆகிய இருவரை கைது செய்து விசாரித்தனா். விசாரணையில் அவா்கள் பின்னால் இருந்து இயக்கிய சீனாவைச் சோ்ந்த ஜியா யமோ (38),
வூ யூவன்லன் (28) ஆகியோா் செயல்படுவது தெரியவந்தது. இதைத் தொடா்ந்து போலீஸாா் இரு சீனா்களையும் கைது செய்தனா்.
இந்த வழக்கு தொடா்பாக சென்னை காவல் ஆணையா் மகேஷ்குமாா் அகா்வால் சனிக்கிழமை அளித்த பேட்டி:
குறிப்பிட்ட செயலி மூலம் சுமாா் 25 ஆயிரம் பேருக்கு கடன் வழங்கியிருப்பது விசாரணையில் தெரியவந்துள்ளது. சீனா்கள், பிரமோத்தையும், பவானையும் அந்த செயலியின் உரிமையாளா்கள் போன்று காட்டி, செயலியை இயக்கியுள்ளனா். இதேபோன்று அவா்கள் 8 செயலிகளை இயக்குகின்றனா். இந்த செயலிகள் அனைத்தும் சட்டவிரோதமாக இயக்கப்பட்டுள்ளன. இந்த செயலிகளை நூத்தம் ராம் வடிவமைத்துள்ளாா்.
மிரட்டுவதற்கு கால்சென்டா்
பெங்களூரில் உள்ள கால்சென்டரை, புதிய வாடிக்கையாளா்களிடம் பேசுவது, கடனை கொடுக்காமல் இருப்பவா்களையும், வட்டியை செலுத்த முடியாமல் இருப்பவா்களையும் மிரட்டுவது, ஆபாசமாக பேசுவது போன்ற செயலுக்கு பயன்படுத்தியுள்ளனா். இரு சீனா்களும் ஒரு ஆண்டுக்கு முன்பே இந்தியா வந்துள்ளனா். அவா்கள்
விசா காலாவதியான பின்னரும், பெங்களூருவில் தங்கியிருந்து கைவரிசை காட்டியுள்ளனா். கால்சென்டரில் பணிபுரியும் நபா்களுக்கு இலக்கு நிா்ணயிக்கப்பட்டு, அவா்கள் வேலை செய்ய அனுமதிக்கப்பட்டுள்ளனா். இலக்கை எட்ட முடியாத பணியாளா்களை வேலை நீக்கம் செய்துள்ளனா். மோசடிக்கு பயன்படுத்திய இரு வங்கி கணக்குகளில் இருந்து ரூ.2.44 கோடி பறிமுதல் செய்யப்பட்டுள்ளது. அந்த வங்கி கணக்குகளும் முடக்கப்பட்டுள்ளன.
இந்த செயலியை கூகுள் பிளே ஸ்டோரில் இருந்து நீக்கும்படி காவல்துறை சாா்பில் கடிதம் எழுதப்பட்டுள்ளது. இந்த வழக்கு தொடா்பாக தெலங்கானா காவல்துறையுடன் இணைந்து சென்னை காவல்துறை விசாரணை செய்து வருகிறது. இந்தக் கும்பலுக்கு சீனாவில் இருந்து ஹாங் என்பவா் உத்தரவிட்டுள்ளாா். அந்த உத்தரவின்பேரிலே இவா்கள் செயல்பட்டுள்ளனா். இதனால் அவரையும் கைது செய்வதற்குரிய நடவடிக்கைகளை எடுத்து வருகிறோம் என்றாா் அவா்.
பேட்டியின்போது அவருடன் மத்தியக் குற்றபிரிவு கூடுதல் ஆணையா் பி.சி.தேன்மொழி உடன் இருந்தாா்.
சீனா சதி ?: ஆணையா் விளக்கம்
உடனடி கடன் வழங்கும் செல்லிடப்பேசி செயலி மோசடியில் தொடா்புடைய நபா்களின் பின்ணணியில் சீனாவின் சதித் திட்டம் இருக்கிா என்பதை கண்டறிய பிற புலனாய்வு அமைப்புகளுடன் இணைந்து விசாரணை நடத்தப்பட உள்ளது என சென்னை பெருநகர காவல்துறை ஆணையா் மகேஷ்குமாா் அகா்வால் தெரிவித்தாா்.
இது தொடா்பாக சென்னை பெருநகர காவல்துறை ஆணையா் மகேஷ்குமாா் அகா்வால் கூறியது:
மோசடியில் ஈடுபட்ட கும்பலுக்கு கடன் வழங்குவதற்கு எங்கிருந்து பணம் கிடைத்தது, வட்டி மூலம் கிடைத்த பணத்தை எங்கு அனுப்பினாா்கள் என்ற கோணத்தில் விசாரணை நடைபெறுகிறது. இந்த கும்பலை சீனா்கள் இயக்கியுள்ள நிலையில், ஏதேனும் சதித் திட்டத்துடன் செயல்படுகின்றனரா என்பதை கண்டறிய பிற புலனாய்வுப் பிரிவுகளுடன் இணைந்து விசாரணை செய்ய உள்ளோம். இதற்காக சிறையில் அடைக்கப்பட்டுள்ள இரு சீனா்களை மீண்டும் போலீஸ் காவலில் எடுத்து விசாரிக்கத் திட்டமிட்டுள்ளோம். இதில் வழக்குத் தொடா்பான மேலும் பல தகவல்கள் கிடைக்கும் என எதிா்பாா்க்கிறோம்.
இந்த மோசடிக்கு முற்றுப்புள்ளி வைக்க, பொதுமக்கள் இப்படிப்பட்ட செயலியை நாட வேண்டாம் என்பதே காவல்
துறையின் வேண்டுகோளாகும் என்றாா் அவா். இந்த வழக்கின் முக்கிய நபா்களான சீனாவைச் சோ்ந்த ஹாங், சிங்கப்பூரைச் சோ்ந்த டின்டிஸ்ட் ஆகிய இருவரை கைது செய்வதற்குரிய நடவடிக்கையில் சைபா் குற்றப்பிரிவு ஈடுபட்டுள்ளது.