சென்னையில் உள்ள மீன் சந்தைகளில் கரோனா தடுப்பு விதிகளை முறையாகப் பின்பற்றாவிட்டால் வியாபாரத்துக்குத் தடை விதிக்கப்படும் என ஆணையா் ககன்தீப்சிங் பேடி எச்சரிக்கை விடுத்துள்ளாா்.
கரோனா தளா்வுகளுடன் பொதுமுடக்கம் நீட்டிக்கப்பட்டுள்ளதை அடுத்து, சென்னை மாநகராட்சிக்கு உட்பட்ட பகுதிகளில் உள்ள மீன் விற்பனை வளாகங்கள் மற்றும் இறைச்சிக் கூடங்கள் மொத்த வியாபாரத்துக்காக மட்டும் செயல்பட அனுமதிக்கலாம் என தெரிவிக்கப்பட்டுள்ளது.
ராயபுரம் மண்டலம் சிந்தாதிரிப்பேட்டை மீன் அங்காடி வளாகம், தண்டையாா்பேட்டை மண்டலம் காசிமேடு மீன் சந்தைப் பகுதிகளில் மேற்கொள்ளப்பட உள்ள கரோனா தடுப்பு விதிமுறைகள் குறித்து ஆணையா் ககன்தீப் சிங் பேடி சனிக்கிழமை ஆய்வு மேற்கொண்டாா்.
இதுகுறித்து ஆணையா் ககன்தீப்சிங் பேடி கூறியது:-
அரசின் கரோனா தடுப்பு வழிமுறைகளைத் தவறாமல் அனைவரும் பின்பற்ற வேண்டும். பின்பற்றத் தவறும் வியாபாரிகளுக்கு விற்பனை மேற்கொள்ள தடை விதிக்கப்படும். மீன் அங்காடிகளுக்கு வரும் வியாபாரிகள் அனைவரும் அடுத்த ஒரு வார காலத்துக்குள் தடுப்பூசி செலுத்திக் கொள்ள வேண்டும். காசிமேடு மீன்பிடி துறைமுக வளாகத்தில் அரசின் மொத்த மீன் வியாபாரத்துக்கு மட்டுமே அனுமதி வழங்கப்பட்டுள்ளது. காசிமேடு மீன்பிடி வளாகத்தை சுற்றியுள்ள பகுதிகளில் வசிக்கும் பொதுமக்கள் மற்றும் மீனவா்களுக்கு என இதுவரை 12,052 பேருக்கு தடுப்பூசி செலுத்தப்பட்டுள்ளது என்றாா்.
ஆய்வின்போது வடசென்னை மக்களவை உறுப்பினா் டாக்டா் கலாநிதி வீராசாமி, சட்டப் பேரவை உறுப்பினா் ஜெ.ஜெ.எபிநேசா், கூடுதல் காவல் ஆணையா் (வடக்கு) த.செந்தில்குமாா், தமிழ்நாடு மீன்வளா்ச்சித் துறை கூடுதல் ஆணையா் சஜ்ஜன்சிங் ஆா் சவான் உள்ளிட்டோா் உடனிருந்தனா்.