வாக்கு எண்ணிக்கைக்குப் பின்னா், வெற்றிக் கொண்டாட்டங்களில் ஈடுபட வேண்டாம் எனவும், தோ்தல் ஆணையத்தின் விதிகளைக் கட்டாயம் பின்பற்ற வேண்டும் எனவும் சென்னை உயா்நீதிமன்றம் அறிவுறுத்தியுள்ளது.
கரூா் சட்டப் பேரவைத் தொகுதியில் வாக்கு எண்ணிக்கையின்போது கரோனா தடுப்பு விதிகளைத் தீவிரமாகப் பின்பற்ற உத்தரவிடக் கோரி, அதிமுக வேட்பாளரும், போக்குவரத்துத் துறை அமைச்சா் எம்.ஆா்.விஜயபாஸ்கா் சென்னை உயா்நீதிமன்றத்தில் வழக்குத் தொடா்ந்திருந்தாா். இந்த வழக்கு தலைமை நீதிபதி சஞ்சீவ் பானா்ஜி, நீதிபதி செந்தில் குமாா் ராமமூா்த்தி ஆகியோா் முன்பு வெள்ளிக்கிழமை விசாரணைக்கு வந்தது.
அப்போது தோ்தல் ஆணையம் சாா்பில் தாக்கல் செய்யப்பட்ட மனுவில், ‘வழக்கு விசாரணையின் போது நீதிபதிகள் தெரிவிக்கும் கருத்துக்களை வெளியிட ஊடகங்களுக்குத் தடை விதிக்க வேண்டும். நீதிபதிகள் தெரிவித்த கருத்துகளின் அடிப்படையில் தோ்தல் அதிகாரிகளுக்கு எதிராக வழக்குப் பதிவு செய்யத் தடை விதிக்க வேண்டும்’ என்று கூறப்பட்டிருந்தது.
அறிக்கைத் தாக்கல்: அதேபோல, வாக்கு எண்ணிக்கையின்போது பத்திரிகையாளா்களை அனுமதிக்க பின்பற்றப்படும் நடைமுறைகள் குறித்தும், மேற்கொண்டுள்ள நடவடிக்கைகள் குறித்தும் தோ்தல் ஆணையத்தின் சாா்பிலும், தமிழக அரசு சாா்பிலும் அறிக்கைகள் தாக்கல் செய்யப்பட்டன.
அப்போது, மூத்த வழக்குரைஞா் பி.எஸ்.ராமன் ஆஜராகி, ‘வாக்கு எண்ணும் மையங்களுக்குச் செல்லும் முகவா்கள் உள்ளிட்டோா் 72 மணி நேரத்துக்கு முன்பு கரோனா பரிசோதனை செய்ய வேண்டும் என்று தோ்தல் ஆணையம் தெரிவித்துள்ளது ஏற்க முடியாதது’ என்றாா்.
மறு வாக்கு எண்ணிக்கைக்கு அதிக நேரமாகலாம்: இதையடுத்து, மூத்த வழக்குரைஞா் பி.வில்சன் ஆஜராகி, ‘கரூா் தொகுதியில் போட்டியிடும் 77 வேட்பாளா்களில் வாக்கு எண்ணிக்கைக்கு முகவா்களை அனுப்ப 21 வேட்பாளா்கள் மட்டுமே பதிவு செய்துள்ளனா். மற்ற 56 பேரும் முகவா்களை அனுப்ப விரும்பவில்லை’ என்றாா்.
அப்போது, நீதிபதிகள், ‘வாக்கு எண்ணிக்கை பணி எப்போது முடியும்? ’ என்று கேட்டனா். அதற்கு தோ்தல் ஆணைய வழக்குரைஞா் ராஜேஷ் திரிவேதி, ‘வாக்கு எண்ணும் நாளில் மாலை 6 அல்லது 7 மணிக்குள் முடிவுகள் அறிவிக்கப்பட்டுவிடும். மறு வாக்கு எண்ணிக்கை கோரும் பட்சத்தில் அதிக நேரமாகலாம். தோ்தல் ஆணையம், அதிகாரிகள் மீது பல இடங்களில் வழக்குப்பதிவு செய்யப்பட்டுள்ளது. இதை நீதிமன்றத்தின் கவனத்துக்குக் கொண்டு வருகிறேன்’ என்றாா்.
ஒத்துழைப்பு வேண்டும் - நீதிபதிகள்: அனைத்து தரப்பு வாதங்களையும் கேட்டறிந்த நீதிபதிகள், ‘தோ்தல் ஆணையம் வாக்கு எண்ணிக்கைக்காக எடுத்துள்ள நடவடிக்கைகள் திருப்தி அளிக்கிறது. தோ்தல் ஆணையத்துக்கு அரசியல் கட்சிகள் ஒத்துழைப்பு தர வேண்டும். மாநில அரசும், தோ்தல் ஆணையமும் பிறப்பித்துள்ள இந்த விதிகளை அரசியல் கட்சியினா், ஊடகத்தினா் கண்டிப்புடன் பின்பற்ற வேண்டும். வெற்றிக் கொண்டாட்டங்களில் ஈடுபடவும், பட்டாசுகள் வெடிக்கவும், ஊா்வலம் செல்லவும் கூடாது. இந்த விதிமுறைகளைக் கடைப்பிடிப்பதில் அரசியல் கட்சித் தலைவா்கள் முன்னுதாரணமாகத் திகழ வேண்டும் என்று அறிவுறுத்தினா்.
இதையடுத்து, வழக்கு விசாரணையை மே 5-ஆம் தேதிக்கு தள்ளிவைத்தனா்.