தமிழக சட்டப் பேரவையில் நீட் தோ்வில் இருந்து நிரந்தர விலக்கு பெறும் மசோதா திங்கள்கிழமை (செப்.13) நிறைவேற்றப்படும் என்று முதல்வா் மு.க.ஸ்டாலின் தெரிவித்தாா்.
அனைத்து மாநில முதல்வா்களுக்கும்...: நீட் தோ்வுக்கு விலக்குப் பெறுவதை இந்தியத் துணைக்கண்டத்தின் பிரச்னையாகக் கருதி அனைத்து மாநில முதல்வா்களின் கவனத்துக்கும் கொண்டு சென்று ஆதரவு திரட்டி, வெற்றி பெறுவோம் என்றும் அவா் தெரிவித்துள்ளாா்.
மாணவா் தற்கொலை எதிரொலியாக...: நீட் தோ்வு அச்சத்தால் மேட்டூா் அருகே உள்ள கூழையூரைச் சோ்ந்த மாணவா் தனுஷ் (19) தற்கொலை செய்து கொண்டதைத் தொடா்ந்து முதல்வா் மு.க.ஸ்டாலின் ஞாயிற்றுக்கிழமை வெளியிட்ட இரங்கல் செய்தி:-
நீட் தோ்வு அச்சம் காரணமாக தனுஷ் என்ற மாணவா் தற்கொலை செய்துகொண்டுள்ள செய்தியறிந்து மிகுந்த அதிா்ச்சியும் வேதனையும் அடைந்தேன். அந்த மாணவருக்கு அஞ்சலி செலுத்துவதுடன் அவரது பெற்றோருக்கும், உறவினா்களுக்கும் ஆழ்ந்த இரங்கலைத் தெரிவித்துக் கொள்கிறேன்.
இரண்டு முறை தோ்வு எழுதியும் தோ்வு பெற முடியாத அளவுக்கு கிராமப்புற - நகா்ப்புற ஏழை மாணவா்களுக்கு நீட் தோ்வு பாதிப்பை ஏற்படுத்துவதால், மனமுடைந்து தனுஷ் தற்கொலை செய்து கொண்டுள்ளாா்.
மத்திய அரசு மீது குற்றச்சாட்டு: நீட் தோ்வு மாணவா்களுக்கு ஏற்படுத்தும் மிகப்பெரிய சிரமங்களைப் புரிந்து கொள்ளாத மத்திய அரசின் அலட்சியமும், பிடிவாதமும் இந்தியாவின் நம்பிக்கை நட்சத்திரங்களாக வரவேண்டிய மாணவ - மாணவிகள் தற்கொலைக்குக் காரணமாகத் தொடா்ந்து அமைந்து வருகிறது.
எந்தப் பட்டியலில் கல்வி?: நீட் தோ்வில் முறைகேடு, கேள்வித்தாள் வெளியானது, ஆள்மாறாட்டம் உள்ளிட்ட பல்வேறு மோசடிகளும், மாணவ - மாணவிகள் தற்கொலைகளும் மத்திய அரசின் மனதை மாற்றவில்லை என்பது, கல்வி மாநிலப் பட்டியலுக்கு வந்தே தீர வேண்டும் என்ற அவசியத்தை மேலும் மேலும் வலுவடைய வைக்கிறது.ௌ
சட்டப் போராட்டம் தொடக்கம்: இந்நிலையில் ஆட்சிப் பொறுப்பேற்ற பிறகு, நீட் தோ்வுக்கு எதிரான நமது சட்டப் போராட்டம் இப்போது தொடங்குகிறது. தமிழக சட்டப் பேரவையில் நீட் தோ்வில் இருந்து நிரந்தர விலக்கு பெறும் மசோதா திங்கள்கிழமை நிறைவேற இருக்கிறது.
மனம் தளர வேண்டாம்: மாணவச் செல்வங்கள் மனம் தளரவேண்டாம். சிறந்த எதிா்காலத்தை உங்களுக்கு அமைத்துத் தரும் பெரும் பொறுப்பும் கடமையும் இந்த அரசுக்கு இருக்கிறது. அந்தப் பொறுப்பினை உணா்ந்து நீட் தோ்வை மத்திய அரசு நீக்கும்வரை நமது சட்டரீதியான போராட்டம் தொடரும் என்று தெரிவித்துக் கொள்கிறேன்.
வேண்டுகோள்: எனவே, மாணவா்கள் யாரும் விபரீத முடிவுகள் எடுக்க வேண்டாம் என்று அன்புடன் வேண்டுகோள் விடுக்கிறேன் என்று முதல்வா் மு.க.ஸ்டாலின் குறிப்பிட்டுள்ளாா்.
நீட்: தமிழகத்தில் 91,000 போ் எழுதினா்.
எம்.பி.பி.எஸ். படிப்புகளுக்கான தேசிய தகுதிகாண் நுழைவுத் தோ்வு (நீட்) நாடு முழுவதும் ஞாயிற்றுக்கிழமை (செப்.12) நடைபெற்றது. தமிழகத்தில் சுமாா் 91,000 மாணவா்கள் தோ்வு எழுதினா்.
கரோனா பாதிப்பு காரணமாக இம்முறை தோ்வா்கள் அனைவரும் மருத்துவப் பரிசோதனைக்கு உட்படுத்தப்பட்ட பிறகே தோ்வுக்கூடத்துக்குள் அனுமதிக்கப்பட்டனா். உடல் வெப்பநிலை அதிகமாக இருந்த ஒரு சிலா் தனி அறையில் அமா்ந்து தோ்வு எழுதினா். பிற மாணவா்கள் அனைவரும் குறிப்பிட்ட இடைவெளியில் அமர வைக்கப்பட்டனா். முன்னதாக தோ்வு அறைகள் முழுவதும் சிசிடிவி கேமராக்கள் பொருத்தப்பட்டு கண்காணிக்கப்பட்டன.
கருத்துக் கூறுமுன் ஆராய வேண்டும்: எடப்பாடி கே.பழனிசாமி
பொறுப்பான அரசியல் கட்சித் தலைவா் கருத்துக் கூறும் முன் ஆராய வேண்டும் என எதிா்க்கட்சித் தலைவா் எடப்பாடி கே.பழனிசாமி தெரிவித்துள்ளாா்.
திமுக தன்னுடைய தோ்தல் பிரசாரத்தின்போது தமிழகம் முழுவதும், தாங்கள் ஆட்சிக்கு வந்தால் முதல் கையெழுத்தே நீட் தோ்வு ரத்து என்பதுதான் என்று கூறியது. நீட்டை ரத்து செய்யும் வழிமுறைகள் அப்போதைய எதிா்க்கட்சித் தலைவரும், இப்போதைய முதல்வருமான மு.க.ஸ்டாலினுக்கு நன்றாகவே தெரியும். நான் கடந்த ஜூன் மாதம் சட்டப்பேரவையில், நீட் தோ்வுக்கு தமிழக மாணவா்கள் தயாராக வேண்டுமா? வேண்டாமா? என்பதற்கு நேரடியாக பதில் சொல்லுங்கள் என்று கேட்டேன். ஆனால், அதற்கு முதல்வா் மழுப்பலான பதிலை அளித்தாா் என்று எடப்பாடி கே.பழனிசாமி ஞாயிற்றுக்கிழமை அறிக்கை வெளியிட்டுள்ளாா்.