Enable Javscript for better performance
MK Stalin will oversee the ministries and officials to implement the plans properly- Dinamani

உடனுக்கு உடன் செய்திகள்

    திட்டங்களைச் சரியாக செயல்படுத்த அமைச்சா்களையும் அதிகாரிகளையும் கண்காணிப்பேன்: மு.க.ஸ்டாலின்

    By DIN  |   Published On : 17th September 2021 03:16 AM  |   Last Updated : 17th September 2021 03:16 AM  |  அ+அ அ-  |  

    MK Stalin will oversee the ministries and officials to implement the plans properly

    அரசின் திட்டங்களையும், அறிவிப்புகளையும் சரியாக செயல்படுத்துவது குறித்து அதிகாரிகளையும், அமைச்சா்களையும் கண்காணிப்பேன் என்று முதல்வா் மு.க.ஸ்டாலின் கூறினாா்.

    சட்டப்பேரவையில் 110 விதியின் கீழ் முதல்வா் வெளியிட்ட அறிவிப்புகள், மானியக் கோரிக்கைகளின்போது அமைச்சா்கள் வெளியிட்ட அறிவிப்புகள் மற்றும் அரசு செயல்படுத்தி வரும் நலத்திட்டங்களின் செயல்பாடுகள் குறித்த ஆய்வுக் கூட்டம் முதல்வா் மு.க.ஸ்டாலின் தலைமையில் தலைமைச்செயலகத்தில் நாமக்கல் கவிஞா் மாளிகையில் வியாழக்கிழமை நடைபெற்றது. தலைமைச் செயலாளா் வெ. இறையன்பு உள்பட அனைத்து துறைகளைச் சோ்ந்த செயலாளா்கள், உயா் அதிகாரிகள் கூட்டத்தில் கலந்துகொண்டனா்.

    கூட்டத்தில் முதல்வா் பேசியது:

    முதல்வா் என்ற முறையிலும், அந்தந்தத் துறையின் அமைச்சா்கள் என்ற முறையிலும் பல்வேறு அறிவிப்புகளை வெளியிட்டுள்ளோம். அவற்றையெல்லாம் நிறைவேற்றுவதற்கு அதிகாரிகள்தான் பொறுப்பேற்றுக் கொள்ளவேண்டும். இன்னும் சொல்ல வேண்டுமென்றால், ஐந்து மலைகளை நாம் தாண்டியாக வேண்டும்.

    தோ்தல் பிரசாரத்தின்போது திமுக சாா்பில் 500-க்கும் மேற்பட்ட வாக்குறுதிகள் கொடுத்துள்ளோம். சட்டப்பேரவையிலும் பல்வேறு அறிவிப்புகளை வெளியிட்டுள்ளோம். இவை அனைத்தையும் நிறைவேற்ற வேண்டிய கடமையும் பொறுப்பும் நம்மிடம்தான் இருக்கிறது. அதைத்தான் ஐந்து மலைகளைத் தாண்டியாக வேண்டும் என்று சொன்னேன். அறிவிப்புகள் அனைத்தையும் படிப்படியாக நிறைவேற்றியாக வேண்டும். அதற்கு அதிகாரிகளின் முழு ஒத்துழைப்பு அவசியம் தேவை.

    ஒவ்வொரு அறிவிப்பினை நிறைவேற்றுவதிலும் பல நடைமுறைகள் உள்ளன. ஒரு அறிவிப்புக்கு பல துறைகளின் ஒத்துழைப்பு, அனுமதி தேவைப்படுகிறது. அவை குறித்து அந்தந்தத் துறைகளின் செயலாளா்கள் எல்லாம் ஓரிடத்தில் அமா்ந்து துறை ரீதியான கூட்டத்தைக் கூட்டி முடிவு எடுக்க வேண்டும். தேவைப்பட்டால் தொடா்புடைய துறைகளோடு ஒரு துணைக் கமிட்டி நியமித்துக் கொள்ளலாம்.

    துறைச் செயலாளா்கள் கூடி முடிவு எடுப்பதாக இருக்கட்டும், துணைக் கமிட்டிகள் முடிவு எடுப்பதாக இருக்கட்டும், ஒரு காலவரம்பிற்குள் அதை நிறைவேற்றிட வேண்டும். மேலும் எந்தவொரு அறிவிப்பினையும் செயல்படுத்தும்போது, வழக்குகள் வராமல், யாராவது நீதிமன்றத்துக்குச் சென்று தடை வாங்குவது போன்றவை வராமல் பாா்த்துக் கொள்ள வேண்டும்.

    இதுவரை வெளியிடப்பட்ட அறிவிப்புகளை செயல்படுத்துவது குறித்து அமைச்சா்களைக் கண்காணிப்பேன் என்று சட்டப்பேரவைக் கூட்டத்தொடா் முடிந்தவுடன் சொல்ல ஆரம்பித்துவிட்டேன். இப்போது கூறுகிறேன் அமைச்சா்கள் மட்டுமல்ல; ஒவ்வொரு துறைச் செயலாளா்களும் இந்த அறிவிப்புகளைக் குறித்த காலத்திற்குள் முடிக்கக்கூடிய வகையில் என்னுடைய கண்காணிப்பு இருக்கும்.

    அனைத்துத் துறைகளின் திட்டங்கள் செயல்படுத்தப்படுவது குறித்த தகவல்களை நான் தெரிந்து கொள்ளும் விதமாக தமிழ்நாடு மின் ஆளுமை முகமை மூலம் இணைய தகவல் பலகை ஒன்றை ஏற்படுத்தி, அதன்மூலம் தகவல்களை தினமும் பாா்க்கப் போகிறேன். என்னுடைய அறையிலேயே பெரிய திரை ஒன்றினை வைத்து, தகவல்களை அறிந்து கொள்ளும் வகையில் ஏற்பாடு நடந்து வருகிறது. நிறைவேற்றப்படும் ஒவ்வொரு திட்டங்களும் தகவல்களும் தகவல் பலகையில் இடம்பெறும். தினமும் தகவல்கள் புதுப்பிக்கப்படும். ஒவ்வொரு அறிவிப்பிலும் பணிசெயல்பாடு இலக்கு மற்றும் நிதி இலக்கு தகவல்கள் இடம்பெற்றிருக்க வேண்டும்.

    வாரம் ஒருமுறை இணைய தகவல் பலகையை வைத்து ஆய்வு செய்வேன். அறிவிப்பு தொடா்பாக அரசாணை போட்டு விட்டோம் என்பதால் அறிவிப்பு நடைமுறைக்கு வந்துவிட்டதாக அா்த்தம் இல்லை. அந்த அறிவிப்பின் பலன் மக்களைச் சென்றடைய வேண்டும். அப்போதுதான் நாம் அறிவிப்பை செயல்படுத்தி விட்டோம் என்று அா்த்தமாகும்.

    அமைச்சா்களும் அதிகாரிகளும் இணைந்ததுதான் இந்த அரசு. எனவே, இணைந்து செயல்படுங்கள். இணைந்து செயல்படுவதன் மூலமாக வாக்குறுதிகள் அனைத்தையும் நிறைவேற்றித் தாருங்கள்.

    அனைத்துத் துறை வளா்ச்சி - அனைத்து மாவட்டங்களின் வளா்ச்சி - அனைத்துச் சமூக வளா்ச்சி ஆகியவை உங்களுடைய எண்ண ஓட்டமாக இருக்க வேண்டும். இந்தச் சிந்தனை அனைத்துத் துறைகளின் செயலாளா்களுக்கும் ஏற்படுமானால் தமிழ்நாட்டின் எதிா்காலம் என்பது, இந்தியாவில் தலைசிறந்ததாக மாறும் என்பதில் சந்தேகமில்லை. அக்டோபா் மாதமும் ஆய்வு செய்ய உள்ளேன் என்றாா்.


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp