தமிழகத்தில் கரோனா பாதிப்பு எண்ணிக்கை செவ்வாய்க்கிழமை 72-ஆக உயா்ந்தது. கடந்த சில வாரங்களாக குறைந்து வந்த தொற்று எண்ணிக்கை திடீரென உயா்ந்திருப்பதை அடுத்து மாநிலம் முழுவதும் கண்காணிப்பு நடவடிக்கைகள் தீவிரப்படுத்தப்பட்டுள்ளன.
புதிதாக தொற்றுக் கண்டறியப்பட்டவா்களில் அதிகபட்சமாக சென்னையில் 52 பேருக்கும், செங்கல்பட்டில் 9 பேருக்கும் பாதிப்பு உறுதி செய்யப்பட்டது. திருவள்ளூரில் மூவருக்கும், கோவை, காஞ்சிபுரத்தில் தலா இருவருக்கும் தொற்று ஏற்பட்டுள்ளது. மதுரை, ராமநாதபுரம், சேலம், வேலூா் உள்ளிட்ட சில மாவட்டங்களில் கரோனா தொற்று பதிவாகியுள்ளது. மருத்துவமனைகள், வீடுகளில் 404 போ் சிகிச்சையில் உள்ளனா்.