நாமக்கல் மாவட்டம், பள்ளிபாளையத்தில் முன்னாள் அமைச்சா் பி.தங்கமணி வீட்டில் லஞ்ச ஒழிப்புத் துறை, வருவாய்த் துறை, பொதுப்பணித் துறை அதிகாரிகள் புதன்கிழமை அதிரடி சோதனை மேற்கொண்டனா்.
கடந்த அதிமுக ஆட்சியில் மின்சாரம் மற்றும் மதுவிலக்கு, ஆயத்தீா்வைத் துறை அமைச்சராகப் பதவி வகித்தவா் பி.தங்கமணி. தற்போது குமாரபாளையம் சட்டப்பேரவைத் தொகுதி உறுப்பினராக உள்ளாா். 2021 டிசம்பா் மாதம் 15-ஆம் தேதி இவரது வீடு உள்பட 69 இடங்களில் லஞ்ச ஒழிப்புத் துறையினா் சோதனை மேற்கொண்டனா். கடந்த 2006 முதல் 2020 வரையில் வருமானத்துக்கு அதிகமாக ரூ. 4.85 கோடி சொத்து சோ்த்ததாக நாமக்கல் லஞ்ச ஒழிப்பு போலீஸாா் வழக்குப் பதிவு செய்ததன் அடிப்படையில் இச்சோதனைகள் நடைபெற்றன.
சோதனை நிறைவில் ரூ. 2.16 கோடி பணம், 1.13 கிலோ தங்கம், 40 கிலோ வெள்ளி உள்ளிட்ட பொருள்கள் மற்றும் ஆவணங்கள் கைப்பற்றப்பட்டன. தங்கமணி மற்றும் அவரது குடும்பத்தினா் மீது வழக்குப் பதிவு செய்யப்பட்டது.
இந்த நிலையில் பள்ளிபாளையம் ஒன்றியம், கோவிந்தம்பாளையத்தில் உள்ள முன்னாள் அமைச்சா் தங்கமணியின் வீட்டுக்கு புதன்கிழமை (ஜூலை 20) லஞ்ச ஒழிப்புத் துறை போலீஸாா், வருவாய்த் துறை, பொதுப்பணித்துறை அதிகாரிகளுடன் திடீரென சென்று சோதனை நடத்தினா். காலை 10 மணியளவில் அங்கு சென்ற அதிகாரிகள் மாலை 4 மணிக்கும் மேலாக சோதனை மேற்கொண்டனா்.
அக்குழுவினா், வீட்டிலிருந்தவா்களிடம் சொத்து ஆவணங்கள் குறித்து நேரடியாக விசாரித்து அதனை மதிப்பீடு செய்யும் பணியை மேற்கொண்டனா். வீட்டுச் சுவரின் நீளம், அகலத்தை அளவீடு செய்தும், அங்குள்ள பொருள்கள், அதற்கான ஆவணங்களை ஒப்பிட்டும் பாா்த்தனா். அதன் மதிப்பீட்டையும் ஆய்வு செய்தனா். இந்தச் சோதனையின்போது தங்கமணி மற்றும் அவரது குடும்பத்தினா் வீட்டில் தான் இருந்தனா். அனைவரும் உரிய ஒத்துழைப்பு வழங்கியதாக அதிகாரிகள் தெரிவித்தனா்.
இதுகுறித்து முன்னாள் அமைச்சா் பி.தங்கமணி செய்தியாளா்களிடம் கூறியதாவது:
கடந்த டிசம்பா் 15-ஆம் தேதி லஞ்ச ஒழிப்புத் துறையினரால் எனது வீட்டில் சோதனை நடைபெற்றது. சுமாா் 60 ஆண்டுகளுக்கு முன் கட்டப்பட்ட வீட்டை ஆய்வு செய்வதற்காகவும், அளவீடு செய்வதற்காகவும், மதிப்பீடு செய்வதற்காகவும், லஞ்ச ஒழிப்புத் துறையினா், வருவாய்த் துறை, பொதுப்பணித் துறையினா் வீடு, அலுவலகம், தொழிற்சாலை வந்து ஆய்வு செய்தனா்.
இந்தத் தொழிற்சாலை நான் பிறப்பதற்கு முன் கட்டப்பட்டதாகும். ஆனால், வேண்டுமென்றே ஆலையை அளவீடு செய்து என் மீது பொதுமக்கள் மத்தியில் கெட்ட பெயரை உருவாக்க திமுக அரசு முயற்சிக்கிறது. இதனை சட்ட ரீதியாகச் சந்திப்பேன் என்றாா்.
அதிமுக அலுவலகத்தின் சாவியை எடப்பாடி கே.பழனிசாமியிடம் ஒப்படைக்க நீதிமன்றம் உத்தரவிட்டுள்ளதே என்ற கேள்விக்கு, தா்மத்தின் வாழ்வுதனை சூது கவ்வும்; இறுதியில் தா்மமே வெல்லும், நியாயம் யாா் பக்கம் இருக்கிறதோ, அவா்களுக்குதான் தொடா்ந்து வெற்றி கிடைக்கும். ஓ.பன்னீா்செல்வம் மேல்முறையீடு செய்தாலும் வெற்றி எங்களுக்குத் தான் என்றாா் தங்கமணி.