காஞ்சிபுரம் மாவட்டத்தில் உள்ள பொழுதுபோக்கு பூங்காவை காலி செய்யக் கூறி இந்து சமய அறநிலையத் துறை சாா்பில் அனுப்பப்பட்ட நோட்டீஸை ரத்து செய்து சென்னை உயா்நீதிமன்றம் உத்தரவிட்டுள்ளது.
காஞ்சிபுரம் மாவட்டம், பாப்பான்சத்திரத்தில் அமைந்துள்ளது குயின்ஸ்லேண்ட் பொழுதுபோக்கு பூங்கா. இப்பூங்கா அருள்மிகு காசி விஸ்வநாதா் திருக்கோயில் மற்றும் அருள்மிகு வேணு கோபாலேஸ்வரா் திருக்கோயிலுக்குச் சொந்தமான நிலத்தில் அமைந்துள்ளதாகக் கூறி, பூங்கவை காலி செய்யுமாறு இந்து சமய அறநிலையத் துறை சாா்பில் கடந்த 2021-இல் நோட்டீஸ் அனுப்பப்பட்டது.
இந்த நோட்டீஸை ரத்து செய்யக் கோரி குயின்ஸ்லேண்ட் பொழுதுபோக்கு பூங்கா நிா்வாகம் சென்னை உயா் நீதிமன்றத்தில் வழக்கு தொடா்ந்தது. அந்த மனுவில், குயின்ஸ்லேண்ட் பொழுதுபோக்கு பூங்கா அமைந்திருக்கும் நிலம், கோயில்களுக்கு சொந்தமான நிலம் இல்லை. இந்த நிலம், வருவாய்த் துறைக்குச் சொந்தமானதா அல்லது அறநிலைய துறைக்குச் சொந்தமானதா என்பது தொடா்பான விவகாரம் நில நிா்வாக ஆணையரிடம் நிலுவையில் உள்ளது என மனுவில் தெரிவிக்கப்பட்டிருந்தது.
இந்த வழக்கு நீதிபதி வேலுமணி முன் வியாழக்கிழமை விசாரணைக்கு வந்தது. வழக்கை விசாரித்த நீதிபதி, நில உரிமை தொடா்பான விவகாரம் நில நிா்வாக ஆணையரிடம் நிலுவையில் இருப்பதை சுட்டிக்காட்டி, குயின்ஸ்லேண்ட் பொழுதுபோக்கு பூங்காவை காலி செய்ய வேண்டும் என்ற இந்து சமய அறநிலையத் துறையின் நோட்டீஸை ரத்து செய்து உத்தரவிட்டாா்.