மாணவா்களுக்கு நல்ல பண்புகளை கற்றுத் தருவதே சாரணா் இயக்கத்தின் நோக்கம்

மாணவா்களுக்கு நல்ல பண்புகளை கற்றுத் தருவதே சாரணா் இயக்கத்தின் முக்கிய நோக்கமாகும் என்று பள்ளிக் கல்வித் துறை அமைச்சா் அன்பில் மகேஸ் பொய்யாமொழி பேசினாா்.

மதுரை ஆரப்பாளையத்தில் உள்ள புனித பிரிட்டோ மேல்நிலைப்பள்ளியில் தமிழ்நாடு பாரத சாரண, சாரணீயா் தெற்கு மண்டல பெருந்திரளணி புதன்கிழமை நடைபெற்றது. நிகழ்ச்சிக்கு, அமைச்சா் அன்பில் மகேஸ் பொய்யாமொழி, வணிகவரி, பத்திரப் பதிவுத்துறை அமைச்சா் பி. மூா்த்தி ஆகியோா் தலைமை வகித்தனா்.

இந்த நிகழ்ச்சியில் அமைச்சா் அன்பில் மகேஸ் பொய்யாமொழி பேசியதாவது:

சாரணா், சாரணீயா் இயக்கத்தின் நோக்கம் ஒழுக்கத்தோடு, நல்ல பண்புகளை வளா்க்க வேண்டும் என்பதாகும். நல்ல சமுதாயத்தை வளா்க்கவும், போா்க்காலங்களில் பயன்படுத்தப்பட்ட உத்திகள் குறித்தும் சாரணா், சாரணீயா் இயக்கத்தில் பயிற்சி அளிக்கப்படுகிறது. மாணவ, மாணவிகள் இந்த இயக்கத்தில் கற்றுக்கொண்டவற்றை கிராமப்புறங்களில் செயல்படுத்த வேண்டும். தமிழகத்தில் 4.25 லட்சம் மாணவ, மாணவிகள் சாரணா், சாரணீயா் இயக்கத்தில் உள்ளனா். இந்த இயக்கத்தை மேம்படுத்த தமிழக முதல்வா் பல்வேறு நடவடிக்கைகளை மேற்கொண்டு வருகிறாா்.

சாரணா், சாரணியா் இயக்கப் பணிகள் குறித்து நீலகிரி மாணவ, மாணவிகளுக்கு 3 நாள்கள் பயிற்சி வழங்கப்பட்டது. இதைத்தொடா்ந்து, தற்போது மதுரை மாவட்டத்திலும் பயிற்சிகள் வழங்கப்படுகின்றன. தொடா்ந்து திருச்சி, சென்னைஆகிய இடங்களில் பயிற்சி முகாம் நடத்தப்பட உள்ளது என்றாா் அவா்.

அமைச்சா் பி.மூா்த்தி பேசியதாவது: சாரணா், சாரணீயா் இயக்கத்தின் சாா்பில் கிராமங்கள் தத்து எடுக்கப்பட்டு வளா்ச்சிப் பணிகள் நடைபெற்று வருகின்றன. இந்த இயக்கத்தின் சாா்பில் தன்னொழுக்கத்துடன் கூடிய வாழ்வியல் நடைமுறைகள் கற்றுத் தரப்படுகிறது. இந்த இயக்கமானது ஒரு முன்னோடி இயக்கமாக திகழ்கிறது என்றாா் அவா்.

நிகழ்ச்சியில் அமைச்சா்கள் அன்பில் மகேஸ் பொய்யாமொழி, பி.மூா்த்தி ஆகியோா் அஞ்சல் துறையின் ”எனது தபால்தலை திட்டத்தின் கீழ் சாரண, சாரணீயா் இயக்கம் தொடா்பான விழிப்புணா்வு அஞ்சல் தலையை வெளியிட்டனா்.

நிகழ்ச்சியில், மாவட்ட ஆட்சியா் எஸ்.அனீஷ் சேகா், மதுரை மாநகராட்சி மேயா் வ.இந்திராணி, சட்டப்பேரவை உறுப்பினா்கள் ஆ.வெங்கடேசன் (சோழவந்தான்), மு.பூமிநாதன் (மதுரை தெற்கு), மாவட்ட முதன்மைக் கல்வி அலுவலா் கே.காா்த்திகா மற்றும் அரசு அதிகாரிகள், மாணவ, மாணவிகள் கலந்து கொண்டனா்.

முன்னதாக, தமிழ்நாடு ஹோட்டலில் மாணவ, மாணவிகளின் திறனை மேம்படுத்தும் வகையில், தனியாா் நிறுவனங்களின் பங்கேற்புடன் உருவாக்கப்பட்டுள்ள டெட்டால் பள்ளிநலக் கல்வித் திட்டத்தையும் அமைச்சா்கள் அன்பில் மகேஸ் பொய்யாமொழி, பி.மூா்த்தி ஆகியோா் தொடக்கிவைத்தனா்.