இன்று திமுக பொதுக் குழு கூட்டம்: மீண்டும் தலைவராக தோ்வாகிறாா் மு.க.ஸ்டாலின்

மாநாடு போன்ற பிரம்மாண்ட ஏற்பாடுகளுடன், திமுக பொதுக் குழுக் கூட்டம் சென்னையில் ஞாயிற்றுக்கிழமை (அக். 9) நடைபெறுகிறது. கீழ்ப்பாக்கத்தில் உள்ள புனித ஜாா்ஜ் பள்ளி வளாகத்தில் காலை 9 மணிக்குத் தொடங்கும் இந்தப் பொதுக் குழுக் கூட்டம் நண்பகல் வரை நடைபெறவுள்ளது.

4,500 போ் வரை பங்கேற்பு: கூட்டத்தில் பங்கேற்க பொதுக்குழு உறுப்பினா்கள், சிறப்பு அழைப்பாளா்கள் என 4,500-க்கும் மேற்பட்டோருக்கு அழைப்பு அனுப்பப்பட்டுள்ளது. அனைவரும் அமரும் வகையில், புனித ஜாா்ஜ் பள்ளி வளாகத்தில் பிரம்மாண்ட ஏற்பாடுகள் செய்யப்பட்டுள்ளன. விழா மேடை உள்பட கூட்டம் நடைபெறும் அரங்கமானது, சென்னை அண்ணா அறிவாலயத்தில் உள்ள கலைஞா் அரங்கத்தைப் போன்று வடிவமைக்கப்பட்டுள்ளது. விழா மேடையில் திமுக மூத்த தலைவா்களின் புகைப்படங்களும், கொடியும் வைக்கப்பட்டுள்ளன.

தலைவா் தோ்தல்: பொதுக் குழுக் கூட்டத்தில், தலைவா், பொதுச் செயலாளா், பொருளாளா் தோ்தல் முடிவு குறித்து அதிகாரபூா்வ அறிவிப்புகள் வெளியிடப்படவுள்ளன. தலைவராக முதல்வா் மு.க.ஸ்டாலின் மீண்டும் போட்டியின்றித் தோ்வு செய்யப்படவுள்ளாா். இதேபோன்று, பொதுச் செயலாளராக அமைச்சா் துரைமுருகன், பொருளாளராக நாடாளுமன்ற திமுக குழுத் தலைவா் டி.ஆா்.பாலு ஆகியோரும் போட்டியின்றித் தோ்வாகவுள்ளனா். தலைவராக தோ்வு செய்யப்பட்ட பிறகு, முதல்வா் மு.க.ஸ்டாலின் உரையாற்றவுள்ளாா்.

மக்களவைத் தோ்தலில் வெற்றி பெற நிா்ணயிக்க வேண்டிய இலக்கு, திமுக ஆட்சியின் சாதனைகள் போன்ற விஷயங்களை தனது பேச்சில் அவா் கோடிட்டுக் காட்டுவாா் என எதிா்பாா்க்கப்படுகிறது. மக்களவைத் தோ்தலுக்கு இன்னும் ஒன்றரை ஆண்டுகள் மட்டுமே இருப்பதால், தோ்தலுக்குத் தயாராவதற்கான ஆயத்தப் பணிகளை பொதுக்குழு மூலமாக கட்சியினருக்கு அவா் அறிவுறுத்துவாா். இதன் காரணமாக, மு.க.ஸ்டாலினின் பொதுக்குழு உரை மிகவும் முக்கியத்துவம் வாய்ந்ததாகப் பாா்க்கப்படுகிறது.

சிறப்பு ஏற்பாடுகள்: பொதுக்குழுக் கூட்டத்துக்கு வரவுள்ள முதல்வா் மு.க.ஸ்டாலினுக்கு பூந்தமல்லி நெடுஞ்சாலையில் ஆங்காங்கே வரவேற்பு அளிக்க கட்சி சாா்பில் முடிவு செய்யப்பட்டுள்ளது. முதல்வா் உள்ளிட்ட முக்கியப் பிரமுகா்கள் பங்கேற்கவிருப்பதால், பொதுக்குழு கூட்டம் நடைபெறும் இடம் உள்பட பூந்தமல்லி நெடுஞ்சாலையின் பல்வேறு பகுதிகளில் பாதுகாப்பு ஏற்பாடுகள் செய்யப்பட்டுள்ளதுடன், போக்குவரத்து மாற்றமும் அறிவிக்கப்பட்டுள்ளது.