பள்ளிகளில் ‘தி ரெட் பலூன்’ குறும்படம் நாளை திரையிடல்

ஆஸ்காா் விருது பெற்ற ‘தி ரெட் பலூன்’ குறும்படம் அரசுப் பள்ளிகளில் வியாழக்கிழமை திரையிடப்படவுள்ளது.

இது குறித்து ஒருங்கிணைந்த பள்ளிக் கல்வியின் மாநிலத் திட்ட இயக்ககம் சாா்பில் அனைத்து மாவட்ட முதன்மைக் கல்வி அலுவலா்களுக்கு அனுப்பியுள்ள சுற்றறிக்கை: மாதத்தின் ஒவ்வொரு இரண்டாவது வாரமும் அனைத்து அரசு நடுநிலை, உயா்நிலை மற்றும் மேல்நிலைப் பள்ளிகளிலும் 6 முதல் 9-ஆம் வகுப்பு வரை பயிலும் மாணவா்களுக்கு, அவற்றுக்காக ஒதுக்கப்பட்டுள்ள பாடவேளைகளில் சிறாா் திரைப்படங்கள் திரையிட ஏற்கெனவே உத்தரவிடப்பட்டுள்ளது.

அந்த வகையில் வியாழக்கிழமை (அக்.13-ஆம் தேதி) ‘தி ரெட் பலூன்’ திரைப்படம் திரையிடப்படும். இந்தப் படம் பிரெஞ்சு மொழியில் ஆஸ்காா் விருது பெற்ற குறும்படமாகும். படத்தின் சுருக்கம் சுற்றறிக்கையுடன் அனுப்பி வைக்கப்படும்.

இணைப்பு (லிங்க்) மூலம் பள்ளிகளுக்கு அனுப்பப்பட்ட திரைப்படத்தை மட்டுமே திரையிட வேண்டும். வேறு எந்தப் படத்தையும் மாற்றாகக் காட்டக் கூடாது. ஏனெனில் ஆவணப்படுத்தும்போது படத்திலிருந்து மாணவா் வாரியாக கற்றல் மதிப்பீடு செய்யப்படும்.

பதிவிறக்கம் செய்வதில் சிக்கல் இருந்தால் பள்ளியுடன் இணைக்கப்பட்டுள்ள ஆசிரியா் பயிற்றுநா் அல்லது மாவட்ட ஒருங்கிணைப்பாளரை தலைமை ஆசிரியா்கள் தொடா்பு கொள்ள வேண்டும். பொறுப்பு ஆசிரியா் திரைப்படம் திரையிடும் நாளுக்கு முன் படத்தைப் பாா்க்க வேண்டும்.

கதைச் சுருக்கத்தைப் படித்து படத்தின் கதைக் களத்தை வெளிப்படுத்தாமல் மாணவா்களுக்கு அடிப்படை பின்னணியைக் கொடுக்க வேண்டும். இணைப்பை பதிவிறக்கம் செய்ய அதிவேக இணையம் என்றால் 7 முதல் 10 நிமிஷங்கள் வரையிலும், குறைந்த வேக இணையம் என்றால் 15 முதல் 20 நிமிஷங்கள் வரை காத்திருக்க வேண்டும் என்பதை நினைவில் கொள்ள வேண்டும் எனத் தெரிவிக்கப்பட்டுள்ளது.