வடலூர் பெருவெளி ஆர்ப்பாட்டத்திற்கு சென்ற 42 பேர் சிதம்பரத்தில் கைது செய்யப்பட்டனர்.
கடலூர் மாவட்டம், வடலூரில் பெருவெளியில் வள்ளலார் ஆய்வு மையம் அமைக்க எதிர்ப்பு தெரிவித்து நடைபெறும் ஆர்ப்பாட்டத்தில் பங்கேற்க சேலத்தைச் சேர்ந்த சிம்மம் சத்தியபாமா அம்மையார் சிவனடியார் மற்றும் அவரது குழுவினர் 9.35 மணிக்கு சிதம்பரம் வழியாக சென்றனர். அப்போது சிதம்பரம் நடராஜர் கோயில் கனகசபை மேடை மேல் நின்று சாமி தரிசனம் செய்து சங்கு ஊதி தேவாரம் திருவாசகம் பாடினர்.
அதற்கு தீட்சிதர்கள் தரப்பில் எதிர்ப்பு தெரிவித்தனர். அப்போது பாதுகாப்பிலிருந்த சிதம்பரம் காவல் உதவி கண்காணிப்பாளர் பி.ரகுபதி தலைமையிலான போலீஸார் இருவரையும் சமாதானம் செய்ததின் பேரில் சத்தியபாமா குழுவினரை தமிழில் தேவாரம் திருவாசகம் 10 நிமிடம் பாடிவிட்டு சாமி தரிசனம் முடித்துவிட்டு கீழே இறங்கினர்.
பின்னர், வடலூரில் நடைபெற உள்ள பெருவெளியில் வள்ளலார் ஆராய்ச்சி மையம் வள்ளலார் இடத்தில் கட்டக்கூடாது என்ற கோரிக்கையை வலியுறுத்திக் கண்டன ஆர்ப்பாட்டத்திற்குப் போகும் வழியில் சிதம்பரம் கீழவீதி தேரடி அருகே காவல்துறையினர் 8 பெண்கள் உள்ளிட்ட 42 பேரை கைது செய்து ஆறு நாட்டார் வேளாளர் மண்டபத்தில் தங்க வைத்துள்ளார்கள்.
சென்னை உயர்நீதிமன்றத்தில் கடந்த ஏப்ரல் 10 அன்று நீதிபதிகள் ஆதிகேசவலு, ஆர்.மகாதேவன் ஆகியோர் முன்னிலையில் வந்த நடராஜர் கோயில் வழக்கு விசாரணையில் கனக சபையின் மீது சாமி தரிசனம் குறித்த விவகாரத்தில் காவல்துறையினர் மத ரீதியான விஷயங்களில் தலையிடக்கூடாது என அறிவுறுத்தி குற்றவியல் அரசு முதன்மை வழக்குரைஞர் வழியாக காவல் துறைக்கு அறிவுறுத்தப்பட்டுள்ளது. அதனை மீறி மே 4 ம் தேதி சனிக்கிழமை காலை சிதம்பரம் நடராஜர் கோவிலில் போலீஸ் பாதுகாப்புடன் ககைசபை மீது சங்கு ஊதி தேவார திருவாசகம் பாடப்பட்டுள்ளது என்பது குறிப்பிடத்தக்கது.