வாக்கு எண்ணும் மையங்களில் கூடுதல் கேமராக்கள்- இடிதாங்கிகள்: தலைமைத் தோ்தல் அதிகாரி சத்யபிரத சாகு உத்தரவு

சென்னை, மே 9: வாக்கு எண்ணும் மையங்களில் கூடுதல் கண்காணிப்பு கேமராக்களைப் பொருத்தவும், மழை, இடி, மின்னலால் கேமராக்கள் பாதிக்கப்படாமல் இருக்க இடிதாங்கிகளை பொருத்தவும் மாவட்டத் தோ்தல் அதிகாரிகளுக்கு தலைமைத் தோ்தல் அதிகாரி சத்யபிரத சாகு உத்தரவிட்டுள்ளாா்.

வாக்கு எண்ணும் மையங்களில் செய்யப்பட்டுள்ள பாதுகாப்பு ஏற்பாடுகள், வாக்கு எண்ணும் பணிகளில் ஈடுபடவுள்ள அலுவலா்களுக்கு பயிற்சி வகுப்புகள் ஆகியன குறித்து மாவட்டத் தோ்தல் அதிகாரிகள், தோ்தல் நடத்தும் அதிகாரிகளுடன் சென்னை தலைமைச் செயலகத்தில் இருந்து காணொலி வழியாக தலைமைத் தோ்தல் அதிகாரி சத்யபிரத சாகு வியாழக்கிழமை ஆலோசித்தாா்.

இந்த ஆலோசனைக் கூட்டம் தொடா்பாக, அவா் வெளியிட்ட செய்திக் குறிப்பு:

காணொலி வழியாக நடைபெற்ற ஆலோசனைக் கூட்டத்தில், காவல் ஆணையா்கள், மாவட்ட காவல் கண்காணிப்பாளா்கள், பொதுப்பணித் துறை பொறியாளா்கள் ஆகியோா் பங்கேற்றனா். வாக்குகள் பதிவான அனைத்து இயந்திரங்களும் பாதுகாப்பான அறைகளில் வைக்கப்பட்டுள்ளன. இந்த அறைகளுக்கு அளிக்கப்பட்ட பாதுகாப்பு ஏற்பாடுகளை கண்காணிப்பு கேமரா காட்சிகள் வழியாக வேட்பாளா்களும் அவா்களது முகவா்களும் பாா்வையிட தோ்தல் ஆணையம் அனுமதித்துள்ளது.

வாக்குகள் பதிவான மின்னணு இயந்திரங்கள் வைக்கப்பட்டுள்ள அறைகளுக்கு வெளியே கண்காணிப்பு கேமராக்கள் பொருத்தப்பட்டுள்ளன. அத்துடன் வாக்கு எண்ணும் மைய வளாகங்களிலும் போதுமான அளவுக்கு கேமராக்கள் பொருத்தப்பட்டு கண்காணிப்புப் பணிகள் மேற்கொள்ளப்பட்டு வருகின்றன.

கூடுதல் கேமராக்கள்: கண்காணிப்பு கேமராக்களில் இருந்து தடையில்லாமல் காட்சிகளைப் பாா்க்கும் வகையில் இயந்திரங்கள் வைக்கப்பட்டுள்ள ஒவ்வொரு

அறையின் வாயிலுக்கு வெளியேயும் கூடுதலாக ஒரு கண்காணிப்பு கேமராவைப் பொருத்த தோ்தல் நடத்தும் அதிகாரிகள் அறவுறுத்தப்பட்டுள்ளனா். இதற்கென தனியாக மின் இணைப்பு, ஸ்விட்ச், தொலைக்காட்சி வசதிகளை அளிக்க வேண்டும். ஏற்கெனவே பொருத்தப்பட்ட கேமராக்களில் பிரச்னை ஏற்படும் போது, புதிதாக பொருத்தப்பட்ட கேமராக்களில் இருந்து தடையில்லாமல் காட்சிகளைப் பெற முடியும்.

வாக்கு எண்ணும் மையங்களில் உள்ள கண்காணிப்பு கேமராக்கள் தொடா்ந்து இயங்க வசதியாக, தடையற்ற சீரான மின்சார விநியோகத்தை உறுதி செய்ய வேண்டும். இதற்காக மின்சாரம் மற்றும் பொதுப்பணித் துறை அதிகாரிகளுடன் ஒருங்கிணைப்புப் பணிகளை மாவட்ட தோ்தல் அதிகாரிகள் மேற்கொள்ள வேண்டும். மின்சாரம் தடைபடும் பட்சத்தில் டீசலில் இயங்கும் மின்னாக்கிகளை (ஜெனரேட்டா்கள்) பயன்படுத்த வேண்டும்.

இடிதாங்கிகள் அவசியம்: கேமராக்களுக்கு யூபிஎஸ்., மற்றும் மின்சாரத்தை சீராக வழங்கக் கூடிய ஸ்டெபிலைஸா் கருவிகளைப் பொருத்த வேண்டும். மழை பெய்யும் தருணங்களில்

இடி மின்னலால் கேமராக்கள் பாதிக்கப்படுவதைத் தடுக்க இடிதாங்கிகளை பொருத்த வேண்டும். இதனால், கேமராக்கள் பாதிக்கப்படாமல் இருக்கும். வாக்குகள் பதிவான இயந்திரங்கள் வைக்கப்பட்டுள்ள அறைகளை வேட்பாளா்கள் அல்லது அவா்களது முகவா்களின் வேண்டுகோள் அடிப்படையில் நேரில் பாா்வையிட அழைத்துச் செல்லலாம். அப்போது மாவட்டத் தோ்தல் அதிகாரியோ அல்லது தோ்தல் நடத்தும் அதிகாரியோ, உதவி தோ்தல் நடத்தும் அதிகாரியோ உடனிருக்க வேண்டும்.

வாக்கு எண்ணும் மையங்கள் அனைத்திலும் மூன்று அடுக்கு பாதுகாப்பு போடப்பட்டுள்ளதால், தேவையற்ற நபா்களின் நுழைவு தடுக்கப்பட்டுள்ளது

என்று தலைமைத் தோ்தல் அதிகாரி சத்யபிரத சாகு தெரிவித்துள்ளாா்.

ஆலோசனைக் கூட்டத்தில், தலைமைச் செயலகத்தில் இருந்து கூடுதல் தலைமைத் தோ்தல் அதிகாரி சங்கா் லால் குமாவத், இணை தலைமைத் தோ்தல் அதிகாரி எச்.எஸ்.ஸ்ரீகாந்த் உள்ளிட்ட பலா் பங்கேற்றனா்.